ਹਾਕੀ ਇੰਡੀਆ ਲੀਗ ਜਾਰੀ ਰੱਖਣ ਦੀ ਵਕਾਲਤ

ਖਿਡਾਰਨਾਂ ਦਾ ਮੰਨਣਾ ਹੈ ਕਿ ਮਹਿਲਾ ਹਾਕੀ ਲੀਗ ਉਨ੍ਹਾਂ ਲਈ ਅੱਗੇ ਵਧਣ ਦਾ ਮੁੱਖ ਕਾਰਨ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਖ਼ਦਸ਼ਾ ਹੈ ਕਿ ਇਸ ਦੇ ਬੰਦ ਹੋਣ ਨਾਲ ਭਾਰਤ ਦੀ ਅਗਲੀ ਪੀੜ੍ਹੀ ਨੂੰ ਨੁਕਸਾਨ ਹੋ ਸਕਦਾ ਹੈ। ਉੜੀਸਾ ਵਾਰੀਅਰਜ਼ ਨੂੰ 2024-25 ਵਿੱਚ ਪਹਿਲਾ ਐੱਚ ਆਈ ਐੱਲ ਖ਼ਿਤਾਬ ਦਿਵਾਉਣ ਵਾਲੀ ਤਜਰਬੇਕਾਰ ਮਿਡਫੀਲਡਰ ਨੇਹਾ ਕਿਹਾ, ‘‘ਪਿਛਲੇ ਦੋ ਸਾਲਾਂ ’ਚ ਮਹਿਲਾ ਐੱਚ ਆਈ ਐੱਲ ਤੋਂ ਸਾਨੂੰ ਫ਼ਾਇਦਾ ਮਿਲਿਆ ਹੈ। ਜੂਨੀਅਰ ਅਤੇ ਸੀਨੀਅਰ ਕੌਮੀ ਟੂਰਨਾਮੈਂਟਾਂ ਵਿੱਚ ਇਸ ਪੱਧਰ ਦਾ ਮੁਕਾਬਲਾ ਨਹੀਂ ਹੁੰਦਾ। ਮਹਿਲਾ ਐੱਚ ਆਈ ਐੱਲ ਨੇ ਸਾਨੂੰ ਬਲਜੀਤ, ਸਾਕਸ਼ੀ ਅਤੇ ਰਿਤੁਜਾ਼ ਵਰਗੀਆਂ ਖਿਡਾਰਨਾਂ ਦਿੱਤੀਆਂ ਹਨ, ਜੋ ਇਸ ਵਿਸ਼ਵ ਕੱਪ ਟੀਮ ਦਾ ਹਿੱਸਾ ਹਨ। ਉਭਰਦੀਆਂ ਖਿਡਾਰਨਾਂ ਲਈ ਸਾਨੂੰ ਇਸ ਲੀਗ ਦੀ ਸਖ਼ਤ ਲੋੜ ਹੈ। ਇਹ ਬੰਦ ਨਹੀਂ ਕੀਤੀ ਜਾਣੀ ਚਾਹੀਦੀ।’’

ਇਹ ਅਪੀਲ ਅਜਿਹੇ ਸਮੇਂ ਸਾਹਮਣੇ ਆਈ ਹੈ ਜਦੋਂ ਮਹਿਲਾ ਐੱਚ ਆਈ ਐੱਲ ਨੂੰ ਗੰਭੀਰ ਵਿੱਤੀ ਚੁਣੌਤੀਆਂ ਦਰਪੇਸ਼ ਹਨ। ਭਾਰਤੀ ਮਹਿਲਾ ਹਾਕੀ ਟੀਮ ਦੀ ਕਪਤਾਨ ਸਲੀਮਾ ਟੇਟੇ ਨੇ ਕਿਹਾ ਕਿ ਭਾਰਤੀ ਟੀਮ ’ਚ ਕਈ ਅਜਿਹੀਆਂ ਖਿਡਾਰਨਾਂ ਹਨ, ਜਿਨ੍ਹਾਂ ਨੇ ਐੱਚ ਆਈ ਐੱਲ ’ਚ ਸ਼ਾਨਦਾਰ ਕਾਰਗੁਜ਼ਾਰੀ ਦੇ ਦਮ ’ਤੇ ਟੀਮ ’ਚ ਜਗ੍ਹਾ ਬਣਾਈ ਹੈ। ਸਲੀਮਾ ਮੁਤਾਬਕ, ‘‘ਐੱਚ ਆਈ ਐੱਲ ਬਹੁਤ ਜ਼ਰੂੁਰੀ ਹੈ, ਤਾਂ ਕਿ ਸਾਡੇ ਹੁਨਰ ਦਾ ਘੇਰਾ ਵਧੇ ਅਤੇ ਲੜਕੀਆਂ ਨੂੰ ਕੌਮਾਂਤਰੀ ਹਾਕੀ ਦੇ ਦਬਾਅ ਨੂੰ ਝੱਲਣ ਦਾ ਵਧੀਆ ਤਜਰਬਾ ਮਿਲ ਸਕੇ।’’ ਐੱਚ ਆਈ ਐੱਲ ਦੀ ਵਕਾਲਤ ਕਰਦਿਆਂ ਸਾਕਸ਼ੀ ਰਾਣਾ ਨੇ ਕਿਹਾ, ‘‘ਇਸ ਲੀਗ ਐੱਚ ਆਈ ਐੱਲ ਨੇ ਮੈਨੂੰ ਸਵੈ-ਭਰੋਸਾ ਦਿੱਤਾ ਜੋ ਇਸ ਆਲਮੀ ਕੱਪ ’ਚ ਲਾਹੇਵੰਦ ਸਾਬਤ ਹੋਇਆ।’’ ਇਸ ਦੌਰਾਨ ਨਵਨੀਤ ਕੌਰ ਨੇ ਟੀਮਾਂ ਅਤੇ ਕਾਰਪੋਰੇਟ ਘਰਾਣਿਆਂ ਨੂੰ ਲੀਗ ਦੀ ਮਦਦ ਕਰਨ ਦੀ ਅਪੀਲ ਕੀਤੀ।