Squash ਵਿੱਚ ਅਭੈ ਨੇ ਅਲੀ ਅਬੂ ਨੂੰ ਹਰਾਇਆ

ਮਿਸਰ ਦੇ ਅਲ ਗੌਨਾ ਵਿੱਚ ਚੱਲ ਰਹੇ ਪੀ ਐੱਸ ਏ ਪਲੈਟੀਨਮ ਮੁਕਾਬਲੇ ‘ਅਲ ਗੌਨਾ ਓਪਨ’ ਦੇ ਪੁਰਸ਼ ਸਿੰਗਲਜ਼ ਵਰਗ ਵਿੱਚ ਭਾਰਤ ਦੇ ਅਭੈ ਸਿੰਘ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਜਿੱਤ ਦਰਜ ਕੀਤੀ ਹੈ। ਦੁਨੀਆ ਦੇ 25ਵੇਂ ਨੰਬਰ ਦੇ ਖਿਡਾਰੀ ਅਭੈ ਨੇ ਪਹਿਲੇ ਗੇੜ ਦੇ ਮੁਕਾਬਲੇ ਵਿੱਚ ਵੱਡਾ ਉਲਟਫੇਰ ਕਰਦਿਆਂ ਮੇਜ਼ਬਾਨ ਦੇਸ਼ ਦੇ ਦੁਨੀਆ ਦੇ 13ਵੇਂ ਨੰਬਰ ਦੇ ਖਿਡਾਰੀ ਅਲੀ ਅਬੂ ਏਲੀਨਨ ਨੂੰ 3-2 ਨਾਲ ਹਰਾ ਕੇ ਟੂਰਨਾਮੈਂਟ ਤੋਂ ਬਾਹਰ ਕਰ ਦਿੱਤਾ। ਇਸ ਰੋਮਾਂਚਕ ਮੈਚ ਵਿੱਚ ਭਾਰਤੀ ਖਿਡਾਰੀ ਨੇ 9-11, 11-8, 3-11, 11-4, 11-8 ਦੇ ਫਰਕ ਨਾਲ ਜਿੱਤ ਹਾਸਲ ਕੀਤੀ। ਹੁਣ ਉਸ ਦਾ ਮੁਕਾਬਲਾ ਮਿਸਰ ਦੇ ਹੀ ਛੇਵਾਂ ਦਰਜਾ ਪ੍ਰਾਪਤ ਅਤੇ ਦੁਨੀਆ ਦੇ ਸੱਤਵੇਂ ਨੰਬਰ ਦੇ ਖਿਡਾਰੀ ਯੂਸਫ਼ ਇਬਰਾਹਿਮ ਨਾਲ ਹੋਵੇਗਾ। ਦੂਜੇ ਪਾਸੇ ਮਹਿਲਾ ਸਿੰਗਲਜ਼ ਵਰਗ ਵਿੱਚ ਭਾਰਤ ਦੀ ਅਨਾਹਤ ਸਿੰਘ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਦੁਨੀਆ ਦੀ 20ਵੇਂ ਨੰਬਰ ਦੀ ਖਿਡਾਰਨ ਅਨਾਹਤ ਨੂੰ ਮਿਸਰ ਦੀ ਹੀ ਵਿਸ਼ਵ ਨੰਬਰ ਇੱਕ ਖਿਡਾਰਨ ਹਾਨੀਆ ਅਲ ਹਮਾਮੀ ਨੇ ਪਹਿਲੇ ਗੇੜ ਵਿੱਚ 11-8, 11-5, 9-11, 11-8 ਨਾਲ ਮਾਤ ਦਿੱਤੀ।