ਛੋਟਾ ਪਰਦਾ

ਖੁਲ੍ਹ ਕੇ ਬੋਲਣ ਵਾਲੀ ਇਨਸਾਨ ਨੇਹਾ ਰਾਣਾ

ਅਦਾਕਾਰਾ ਨੇਹਾ ਰਾਣਾ ਦਾ ਟੈਲੀਵਿਜ਼ਨ ’ਤੇ ਅੱਜਕੱਲ੍ਹ ਬਹੁਤ ਵਧੀਆ ਦੌਰ ਚੱਲ ਰਿਹਾ ਹੈ। ਕਲਰਜ਼ ਟੀਵੀ ਦੇ ਲੜੀਵਾਰ ‘ਮਹਾਦੇਵ ਐਂਡ ਸਨਜ਼’ ਵਿੱਚ ਉਸ ਦਾ ਨਰਮਦਾ ਦਾ ਕਿਰਦਾਰ ਅਜਿਹਾ ਹੈ, ਜਿਸ ਨਾਲ ਉਹ ਰੂਹ ਤੋਂ ਜੁੜ ਗਈ ਹੈ। ਉਸ ਨੇ ਹੁਣ ਤੱਕ ਦੇ ਆਪਣੇ ਸਫ਼ਰ ਅਤੇ ਖ਼ੁਦ ਨੂੰ ਪ੍ਰੇਰਿਤ ਰੱਖਣ ਵਾਲੀਆਂ ਚੀਜ਼ਾਂ ਬਾਰੇ ਖੁੱਲ੍ਹ ਕੇ ਗੱਲਬਾਤ ਕੀਤੀ।

ਉਸ ਨੇ ਕਿਹਾ, ‘‘ਨਰਮਦਾ ਦਾ ਕਿਰਦਾਰ ਨਿਭਾਉਣਾ ਸੱਚਮੁੱਚ ਇੱਕ ਰੱਬੀ ਦਾਤ ਵਰਗਾ ਹੈ। ਹਰ ਰੋਜ਼ ਇਸ ਰੋਲ ਨੂੰ ਜਿਊਣ ਨਾਲ ਮੈਨੂੰ ਇੱਕ ਅਦਾਕਾਰ ਵਜੋਂ ਕਈ ਨਵੇਂ ਤੇ ਖ਼ੂਬਸੂਰਤ ਪਹਿਲੂਆਂ ਨੂੰ ਜਾਣਨ ਦਾ ਮੌਕਾ ਮਿਲਿਆ ਹੈ।’’

‘ਜਨੂੰਨੀਅਤ’ ਸ਼ੋਅ ਵਿੱਚ ਮੁੱਖ ਭੂਮਿਕਾ ਨਿਭਾਉਣ ਤੋਂ ਬਾਅਦ ਉਸ ਨੇ ਇੰਡਸਟਰੀ ਵਿੱਚ ਇੱਕ ਲੰਮਾ ਪੈਂਡਾ ਤੈਅ ਕੀਤਾ ਹੈ। ਉਸ ਨੇ ਪੁਰਾਣੇ ਦਿਨਾਂ ਨੂੰ ਯਾਦ ਕਰਦਿਆਂ ਕਿਹਾ, ‘‘ਉਹ ਸ਼ੋਅ ਮੇਰੇ ਕਰੀਅਰ ਲਈ ਇੱਕ ਬਹੁਤ ਵੱਡਾ ਮੋੜ ਸਾਬਤ ਹੋਇਆ ਸੀ। ਫਿਰ ‘ਮੇਘਾ ਬਰਸੇਂਗੇ’ ਆਇਆ। ਮੈਂ ਹੁਣ ਤੱਕ ਜਿੰਨੇ ਵੀ ਕਿਰਦਾਰ ਨਿਭਾਏ ਹਨ, ਹਰ ਇੱਕ ਨੇ ਮੈਨੂੰ ਜ਼ਿੰਦਗੀ ਵਿੱਚ ਕੁਝ ਨਾ ਕੁਝ ਵੱਖਰਾ ਸਿਖਾਇਆ ਹੈ।’’

‘ਮਹਾਦੇਵ ਐਂਡ ਸਨਜ਼’ ਵਿੱਚ ਨਰਮਦਾ ਇੱਕ ਅਜਿਹੀ ਨੂੰਹ ਹੈ ਜੋ ਇੱਕ ਸਖ਼ਤ ਅਤੇ ਰੂੜ੍ਹੀਵਾਦੀ ਪਰਿਵਾਰ ਵਿੱਚ ਆਉਂਦੀ ਹੈ। ਉਸ ਦਾ ਵਿਆਹ ਘਰ ਦੇ ਦੂਜੇ ਪੁੱਤਰ ਕੇਤਨ ਨਾਲ ਹੋਇਆ ਹੈ, ਜਿਸਦਾ ਕਿਰਦਾਰ ਮੋਹਿਤ ਜੋਸ਼ੀ ਨਿਭਾ ਰਿਹਾ ਹੈ। ਦਿਲਚਸਪ ਗੱਲ ਇਹ ਹੈ ਕਿ ਉਹ ਬਾਗ਼ੀ ਸੁਭਾਅ ਦੀ ਨਹੀਂ ਹੈ, ਪਰ ਉਸ ਦੇ ਅੰਦਰ ਇੱਕ ਸ਼ਾਂਤ ਅਤੇ ਦ੍ਰਿੜ੍ਹ ਤਾਕਤ ਹੈ। ਨੇਹਾ ਨੇ ਦੱਸਿਆ, ‘‘ਉਹ ਪਰਿਵਾਰਕ ਸਾਂਝ ਨੂੰ ਬਹੁਤ ਅਹਿਮੀਅਤ ਦਿੰਦੀ ਹੈ। ਚਾਹੇ ਮੁਸ਼ਕਲ ਸਮੇਂ ਵਿੱਚ ਆਪਣੇ ਪਤੀ ਦਾ ਸਾਥ ਦੇਣਾ ਹੋਵੇ ਜਾਂ ਆਰਥਿਕ ਤੰਗੀ ਦੌਰਾਨ ਪਰਿਵਾਰ ਦੀ ਮਦਦ ਲਈ ਆਪਣੀਆਂ ਚੀਜ਼ਾਂ ਦੀ ਕੁਰਬਾਨੀ ਦੇਣੀ ਹੋਵੇ, ਉਹ ਹਮੇਸ਼ਾ ਪਰਿਵਾਰ ਨੂੰ ਸਭ ਤੋਂ ਅੱਗੇ ਰੱਖਦੀ ਹੈ। ਉਹ ਅਜਿਹੀ ਹੀ ਸਬਰ ਸੰਤੋਖ ਵਾਲੀ ਕੁੜੀ ਹੈ।’’

ਕੀ ਉਹ ਅਸਲ ਜ਼ਿੰਦਗੀ ਵਿੱਚ ਵੀ ਇਸ ਕਿਰਦਾਰ ਵਰਗੀ ਹੈ? ਇਸ ਬਾਰੇ ਨੇਹਾ ਨੇ ਕਿਹਾ, ‘‘ਬਿਲਕੁਲ, ਮੈਂ ਵੀ ਪਰਿਵਾਰਕ ਰਿਸ਼ਤਿਆਂ ਨੂੰ ਬਹੁਤ ਤਰਜੀਹ ਦਿੰਦੀ ਹਾਂ। ਪਰ ਅਸਲ ਜ਼ਿੰਦਗੀ ਵਿੱਚ, ਮੈਂ ਆਪਣੇ ਦਿਲ ਦੀ ਗੱਲ ਜ਼ਿਆਦਾ ਖੁੱਲ੍ਹ ਕੇ ਬੋਲਣ ਵਾਲੀ ਇਨਸਾਨ ਹਾਂ। ਨਰਮਦਾ ਦਾ ਰੋਲ ਨਿਭਾਉਣ ਲਈ ਮੈਨੂੰ ਖ਼ੁਦ ਨੂੰ ਥੋੜ੍ਹਾ ਬੰਨ੍ਹ ਕੇ ਰੱਖਣਾ ਪੈਂਦਾ ਹੈ, ਆਪਣੀਆਂ ਅੱਖਾਂ ਅਤੇ ਛੋਟੇ-ਛੋਟੇ ਇਸ਼ਾਰਿਆਂ ਨਾਲ ਗੱਲ ਕਹਿਣੀ ਪੈਂਦੀ ਹੈ। ਇਹ ਚੁਣੌਤੀਪੂਰਨ ਜ਼ਰੂਰ ਹੈ, ਪਰ ਮੈਨੂੰ ਇਸ ਨਾਲ ਸਕੂਨ ਮਿਲਦਾ ਹੈ।’’

ਉਸ ਨੂੰ ਅਦਾਕਾਰੀ ਦੇ ਖੇਤਰ ਵੱਲ ਕਿਹੜੀ ਚੀਜ਼ ਖਿੱਚਦੀ ਹੈ? ਇਸ ਦਾ ਜਵਾਬ ਦਿੰਦਿਆਂ ਉਸ ਨੇ ਆਖਿਆ, ‘‘ਇੱਕੋ ਜ਼ਿੰਦਗੀ ਵਿੱਚ ਕਈ ਹੋਰ ਜ਼ਿੰਦਗੀਆਂ ਜਿਊਣ ਦਾ ਮੌਕਾ ਮਿਲਣਾ। ਇੱਕ ਦਿਨ ਤੁਸੀਂ ਇੱਕ ਆਧੁਨਿਕ ਮਹਿਲਾ ਹੁੰਦੇ ਹੋ, ਤਾਂ ਅਗਲੇ ਹੀ ਦਿਨ ਤੁਸੀਂ ਕਿਸੇ ਛੋਟੇ ਸ਼ਹਿਰ ਦੇ ਇੱਕ ਸਾਂਝੇ ਪਰਿਵਾਰ ਨੂੰ ਸੰਭਾਲ ਰਹੇ ਹੁੰਦੇ ਹੋ। ਸੱਚ ਕਹਾਂ ਤਾਂ, ਇਸ ਚੀਜ਼ ਦਾ ਇੱਕ ਨਸ਼ਾ ਹੋ ਜਾਂਦਾ ਹੈ। ਜਦੋਂ ਡਾਇਰੈਕਟਰ ‘ਐਕਸ਼ਨ’ ਬੋਲਦਾ ਹੈ, ਤਾਂ ਤੁਸੀਂ ਬਸ ਆਪਣੀ ਦੁਨੀਆ ਭੁੱਲ ਕੇ ਕੋਈ ਹੋਰ ਸ਼ਖ਼ਸੀਅਤ ਬਣ ਜਾਂਦੇ ਹੋ।’’

ਜਦੋਂ ਕਠਪੁਤਲੀ ਬਣ ਗਿਆ ਸੀ ਮਾਹਿਰ

‘ਬੇਬਾਕੀ’, ‘ਵੰਸ਼ਜ’ ਅਤੇ ‘ਛੋਟੀ ਸਰਦਾਰਨੀ’ ਵਰਗੇ ਲੜੀਵਾਰਾਂ ਰਾਹੀਂ ਆਪਣੀ ਪਛਾਣ ਬਣਾਉਣ ਵਾਲਾ ਅਦਾਕਾਰ ਮਾਹਿਰ ਪਾਂਧੀ ਦਿਖਾਵੇ ਦੀ ਸੰਤੁਸ਼ਟੀ ਵਿੱਚ ਯਕੀਨ ਨਹੀਂ ਰੱਖਦਾ। ‘ਵਿਮਲ ਖ਼ਨਨ’ ਵਿੱਚ ‘ਬੋਸਕੋ’ ਦੇ ਕਿਰਦਾਰ ਲਈ ਚਰਚਾ ਵਿੱਚ ਆਏ ਇਸ ਅਦਾਕਾਰ ਨੇ ਇੰਡਸਟਰੀ ਵਿੱਚ ਲੰਮਾ ਸਮਾਂ ਗੁਜ਼ਾਰਿਆ ਹੈ, ਜਿਸ ਸਦਕਾ ਉਸ ਨੂੰ ਇਸ ਦੇ ਕੰਮਕਾਜ ਦੀ ਡੂੰਘੀ ਸਮਝ ਹੋ ਗਈ ਹੈ।

ਉਸ ਦਾ ਕਹਿਣਾ ਹੈ ਕਿ ਕਿਸੇ ਵੀ ਚੀਜ਼ ਦੀ ਸ਼ੁਰੂਆਤ ਸਪੱਸ਼ਟ ਸੋਚ ਨਾਲ ਹੁੰਦੀ ਹੈ ਅਤੇ ਇਸ ਨੁਕਤੇ ਨੂੰ ਸਮਝਣ ਵਿੱਚ ਉਸ ਨੂੰ ਕਈ ਸਾਲ ਲੱਗ ਗਏ। ਉਸ ਨੇ ਦੱਸਿਆ, ‘‘ਮੈਂ ਜ਼ਿੰਦਗੀ ਦੇ ਅਜਿਹੇ ਪੜਾਅ ’ਤੇ ਹਾਂ ਜਿੱਥੇ ਮੇਰੀ ਸੋਚ ਬਿਲਕੁਲ ਸਾਫ਼ ਹੈ। ਜਦੋਂ ਤੁਸੀਂ ਅਦਾਕਾਰ ਬਣਨ ਦਾ ਸੁਪਨਾ ਲੈ ਕੇ ਪਹਿਲੀ ਵਾਰ ਮੁੰਬਈ ਆਉਂਦੇ ਹੋ, ਤਾਂ ਆਪਣੇ ਨਾਲ ਅਸੁਰੱਖਿਆ ਦੀ ਭਾਵਨਾ ਦਾ ਇੱਕ ਵੱਡਾ ਬੋਝ ਲੈ ਕੇ ਆਉਂਦੇ ਹੋ। ਫਿਰ ਜਦੋਂ ਲੋਕ ਤੁਹਾਨੂੰ ਨਕਾਰਨ ਲੱਗਦੇ ਹਨ ਕਿ ਇਹ ਠੀਕ ਨਹੀਂ ਹੈ; ਉਹ ਚੰਗਾ ਨਹੀਂ ਹੈ; ਇਹ ਚੀਜ਼ ਨਹੀਂ ਚੱਲੇਗੀ; ਉਹ ਕੰਮ ਨਹੀਂ ਕਰੇਗੀ ਤਾਂ ਹੌਲੀ-ਹੌਲੀ ਇਹ ਬੋਝ ਹੋਰ ਵਧਦਾ ਜਾਂਦਾ ਹੈ। ਹਾਂ, ਤੁਸੀਂ ਉਨ੍ਹਾਂ ਚੀਜ਼ਾਂ ਨੂੰ ਸੁਧਾਰਨ ਦੀ ਕੋਸ਼ਿਸ਼ ਜ਼ਰੂਰ ਕਰਦੇ ਹੋ, ਪਰ ਅਸੁਰੱਖਿਆ ਦਾ ਉਹ ਝੋਲਾ ਹੋਰ ਭਾਰੀ ਹੁੰਦਾ ਜਾਂਦਾ ਹੈ।’’

ਉਸ ਨੇ ਅੱਗੇ ਕਿਹਾ, ‘‘ਹਰ ਕਲਾਕਾਰ ਕਦੇ ਨਾ ਕਦੇ ਅਸੁਰੱਖਿਆ ਦੀ ਭਾਵਨਾ ਵਿੱਚੋਂ ਜ਼ਰੂਰ ਲੰਘਦਾ ਹੈ, ਪਰ ਇੱਕ ਸਮੇਂ ਤੋਂ ਬਾਅਦ, ਘੱਟੋ-ਘੱਟ ਮੈਨੂੰ ਇਹ ਅਹਿਸਾਸ ਹੋ ਗਿਆ ਕਿ ਮੈਂ ਆਪਣੀ ਜ਼ਿੰਦਗੀ ਦਾ ਕੁਝ ਹਿੱਸਾ ਕਠਪੁਤਲੀ ਵਾਂਗ ਜੀਵਿਆ ਹੈ। ਲੋਕ ਮੈਨੂੰ ਕਹਿੰਦੇ ਸਨ, ‘ਇਹ ਬੋਲੋ, ਉਹ ਨਾ ਬੋਲੋ। ਇਹ ਕਰੋ, ਉਹ ਨਾ ਕਰੋ।’ ਆਖ਼ਰਕਾਰ, ਜੇਕਰ ਮੈਂ ਡਿਪਲੋਮੈਟਿਕ ਤੌਰ ’ਤੇ ਸਹੀ ਦਿਖਣ ਦੀ ਕੋਸ਼ਿਸ਼ ਵਿੱਚ ਆਪਣੀ ਅਸਲੀ ਪਛਾਣ ਹੀ ਗੁਆ ਬੈਠਾਂ, ਤਾਂ ਮੈਂ ਕਠਪੁਤਲੀ ਬਣ ਕੇ ਨਹੀਂ ਰਹਿ ਸਕਦਾ।’’

ਉਸ ਨੇ ਇਸ ਗੱਲ ’ਤੇ ਜ਼ੋਰ ਦਿੱਤਾ ਕਿ ਰੱਬ ਨੇ ਸਾਨੂੰ ਜੋ ਸਭ ਤੋਂ ਖ਼ੂਬਸੂਰਤ ਤੋਹਫ਼ਾ ਦਿੱਤਾ ਹੈ, ਉਹ ਸਾਡੀਆਂ ਭਾਵਨਾਵਾਂ ਹਨ। ‘‘ਬਸ ਆਪਣੀਆਂ ਭਾਵਨਾਵਾਂ ਸਾਂਝੀਆਂ ਕਰੋ। ਜਿਹੜੇ ਲੋਕ ਤੁਹਾਨੂੰ ਪਸੰਦ ਕਰਦੇ ਹਨ, ਉਹ ਉਦੋਂ ਵੀ ਕਰਨਗੇ ਜਦੋਂ ਤੁਸੀਂ ਸਭ ਤੋਂ ਖ਼ਰਾਬ ਕੰਮ ਕੀਤਾ ਹੋਵੇਗਾ ਅਤੇ ਜੋ ਤੁਹਾਨੂੰ ਨਫ਼ਰਤ ਕਰਦੇ ਹਨ, ਉਹ ਕਦੇ ਵੀ ਤੁਹਾਡੇ ਪੱਖ ਵਿੱਚ ਨਹੀਂ ਹੋਣਗੇ। ਮੈਨੂੰ ਸਾਕਿਤੇ ਚੌਧਰੀ ਅਤੇ ਅਭਿਨਵ ਪਾਰਿਕ ਨਾਲ ਕੰਮ ਕਰਨ ਦਾ ਮੌਕਾ ਮਿਲਿਆ। ਬੋਸਕੋ ਦਾ ਕਿਰਦਾਰ ਨਿਭਾਉਂਦੇ ਹੋਏ ਮੈਂ ਆਪਣਾ ਸਭ ਕੁਝ ਝੋਕ ਦਿੱਤਾ, ਬਾਕੀ ਸਭ ਕਿਸਮਤ ਦੇ ਹੱਥ ਹੈ।’’

ਉਸ ਦਾ ਮੰਨਣਾ ਹੈ ਕਿ ਅਸਲ ਵਿੱਚ ਅਸਫਲਤਾ ਨੇ ਹੀ ਉਸ ਨੂੰ ਆਜ਼ਾਦ ਕੀਤਾ ਹੈ। ਉਸ ਨੇ ਕਿਹਾ, ‘‘ਜਦੋਂ ਤੁਸੀਂ ਕਿਸੇ ਚੀਜ਼ ਦਾ ਬਹੁਤ ਜ਼ਿਆਦਾ ਸਾਹਮਣਾ ਕਰ ਲੈਂਦੇ ਹੋ... ਜੇਕਰ ਤੁਸੀਂ ਕਿਸੇ ਬੱਚੇ ਨੂੰ ਵਾਰ-ਵਾਰ ਡਰਾਓਗੇ ਤਾਂ ਇੱਕ ਸਮਾਂ ਅਜਿਹਾ ਆਉਂਦਾ ਹੈ ਜਦੋਂ ਬੱਚੇ ਦੇ ਮਨ ਵਿੱਚੋਂ ਡਰ ਹੀ ਖ਼ਤਮ ਹੋ ਜਾਂਦਾ ਹੈ। ਅਸੁਰੱਖਿਆ ਦੀ ਭਾਵਨਾ ਨਾਲ ਵੀ ਅਜਿਹਾ ਹੀ ਹੁੰਦਾ ਹੈ। ਮੈਨੂੰ ਲੱਗਦਾ ਹੈ ਕਿ ਮੈਂ ਜ਼ਿੰਦਗੀ ਦੇ ਸ਼ੁਰੂਆਤੀ ਦੌਰ ਵਿੱਚ ਹੀ ਬਹੁਤ ਸਾਰੀਆਂ ਨਾਕਾਮੀਆਂ ਦੇਖ ਲਈਆਂ ਸਨ। ਮੈਂ ਵੈੱਬ ਸ਼ੋਅ ਤੋਂ ਸ਼ੁਰੂਆਤ ਕੀਤੀ ਸੀ।’’

ਉਸ ਨੇ ਅੱਗੇ ਦੱਸਿਆ, ‘‘ਮੇਰਾ ਪਹਿਲਾ ਵੈੱਬ ਸ਼ੋਅ ਸ਼ਾਦ ਅਲੀ ਨਾਲ ਸੀ ਅਤੇ ਉਨ੍ਹਾਂ ਦਾ ਵੀ ਇਹ ਪਹਿਲਾ ਵੈੱਬ ਸ਼ੋਅ ਸੀ। ਉਨ੍ਹਾਂ ਨੇ ‘ਬੰਟੀ ਔਰ ਬਬਲੀ’ ਵਰਗੀਆਂ ਕਈ ਯਾਦਗਾਰੀ ਫਿਲਮਾਂ ਬਣਾਈਆਂ ਹਨ, ਪਰ ਉਹ ਸ਼ੋਅ ਫਲੌਪ ਹੋ ਗਿਆ। ਮੇਰੇ ਆਲੇ-ਦੁਆਲੇ ਹਮੇਸ਼ਾ ਚੰਗੇ ਲੋਕ ਰਹੇ ਹਨ। ਮੈਂ ਵੱਡੇ ਨਾਮਾਂ ਨਾਲ ਕੰਮ ਕੀਤਾ ਹੈ। ਜੇਕਰ ਕੋਈ ਚੀਜ਼ ਨਹੀਂ ਚੱਲਦੀ, ਤਾਂ ਨਹੀਂ ਚੱਲਦੀ, ਪਰ ਹਰ ਅਦਾਕਾਰ ਦੀਆਂ ਹਰ ਸ਼ੋਅ ਨਾਲ ਉਮੀਦਾਂ ਜੁੜੀਆਂ ਹੁੰਦੀਆਂ ਹਨ।’’

ਉਸ ਨੇ ਅੱਗੇ ਕਿਹਾ, ‘‘ਤੁਸੀਂ ਚਾਹੁੰਦੇ ਹੋ ਕਿ ਉਹ ਚੰਗਾ ਕਰੇ ਅਤੇ ਸਫਲ ਹੋਵੇ। ਪਰ ਇੱਕ ਸਮੇਂ ਤੋਂ ਬਾਅਦ, ਤੁਸੀਂ ਉਸ ਬਾਰੇ ਸੋਚਣਾ ਛੱਡ ਦਿੰਦੇ ਹੋ। ਜੇਕਰ ਉਹ ਚੱਲ ਪੈਂਦਾ ਹੈ ਤਾਂ ਬਹੁਤ ਵਧੀਆ ਹੈ। ਜੇਕਰ ਤੁਹਾਡੇ ਕਰੀਅਰ ਵਿੱਚ ਕੁਝ ਵੱਡਾ ਹੋਣ ਵਾਲਾ ਹੈ, ਤਾਂ ਖ਼ੁਦ-ਬ-ਖ਼ੁਦ ਫੋਨ ਆਉਣ ਲੱਗ ਪੈਂਦੇ ਹਨ ਅਤੇ ਲੋਕਾਂ ਨੂੰ ਪਤਾ ਲੱਗ ਜਾਂਦਾ ਹੈ, ਨਹੀਂ ਤਾਂ ਜ਼ਿੰਦਗੀ ਚੱਲਦੀ ਰਹਿੰਦੀ ਹੈ। ਮੈਂ ਹੁਣ ਉਸੇ ਮੁਕਾਮ ’ਤੇ ਪਹੁੰਚ ਗਿਆ ਹਾਂ।’’

ਬਹੁਤ ਸਿੱਧੀ-ਸਾਦੀ ਹੈ ਸੋਮਾ ਰਾਠੌੜ

ਪ੍ਰਤੀਕ ਸ਼ਰਮਾ ਅਤੇ ਪਾਰਥ ਸ਼ਾਹ ਦੇ ਲੜੀਵਾਰ ‘ਤੁਮ ਸੇ ਤੁਮ ਤਕ’ ਵਿੱਚ ਨਜ਼ਰ ਆ ਰਹੀ ਅਦਾਕਾਰਾ ਸੋਮਾ ਰਾਠੌੜ ਨੇ ਦੱਸਿਆ ਕਿ ਸੈੱਟ ’ਤੇ ਉਸ ਦੇ ਸਹਿ-ਕਲਾਕਾਰਾਂ ਨਾਲ ਬਹੁਤ ਗੂੜ੍ਹੀ ਦੋਸਤੀ ਹੋ ਗਈ ਹੈ। ਉਸ ਨੇ ਖ਼ਾਸ ਤੌਰ ’ਤੇ ਇੱਕ ਰਿਸ਼ਤੇ ਬਾਰੇ ਬੜੀ ਖ਼ੁਸ਼ੀ ਨਾਲ ਗੱਲ ਸਾਂਝੀ ਕੀਤੀ।

ਉਸ ਨੇ ਕਿਹਾ, ‘‘ਦੋਸਤੀ ਤਾਂ ਲਗਭਗ ਸਾਰਿਆਂ ਨਾਲ ਹੀ ਹੋ ਜਾਂਦੀ ਹੈ, ਪਰ ਹਾਲ ਹੀ ਵਿੱਚ ਨੀਲਾਕਸ਼ੀ ਨਾਲ ਮੇਰੀ ਬਹੁਤ ਵਧੀਆ ਸਾਂਝ ਬਣ ਗਈ ਹੈ, ਜੋ ਸ਼ੋਅ ਵਿੱਚ ‘ਮਾਮੀ’ ਦਾ ਕਿਰਦਾਰ ਨਿਭਾ ਰਹੀ ਹੈ। ਸਾਡੀ ਸੋਚ ਅਤੇ ਸੁਭਾਅ ਕਾਫ਼ੀ ਮਿਲਦੇ-ਜੁਲਦੇ ਹਨ।’’

ਸੋਮਾ ਰਾਠੌੜ ਸਿਰਫ਼ ਪਰਦੇ ’ਤੇ ਹੀ ਸਾਦਾ ਅਤੇ ਜ਼ਮੀਨ ਨਾਲ ਜੁੜਿਆ ਕਿਰਦਾਰ ਨਹੀਂ ਨਿਭਾਉਂਦੀ, ਬਲਕਿ ਅਸਲ ਜ਼ਿੰਦਗੀ ਵਿੱਚ ਵੀ ਉਹ ਬਿਲਕੁਲ ਅਜਿਹੀ ਹੀ ਹੈ। ਉਸ ਨੇ ਦੱਸਿਆ, ‘‘ਮੈਂ ਬਹੁਤ ਸਾਧਾਰਨ ਅਤੇ ਲਗਭਗ ਸਾਧੂ-ਸੰਤਾਂ ਵਰਗੀ ਜ਼ਿੰਦਗੀ ਜਿਊਣ ਵਾਲੀ ਇਨਸਾਨ ਹਾਂ। ਮੈਨੂੰ ਪਾਰਟੀਆਂ, ਸ਼ਰਾਬ, ਸਜਣ-ਸੰਵਰਨ, ਗਹਿਣੇ ਪਾਉਣ, ਸ਼ਾਪਿੰਗ ਕਰਨ ਜਾਂ ਘੁੰਮਣ-ਫਿਰਨ ਦਾ ਕੋਈ ਸ਼ੌਕ ਨਹੀਂ ਹੈ ਅਤੇ ਨਾ ਹੀ ਮੈਨੂੰ ਮਹਿੰਗੀਆਂ ਗੱਡੀਆਂ ਦਾ ਕੋਈ ਚਾਅ ਹੈ। ਸ਼ਾਇਦ ਇਸ ਮਾਮਲੇ ਵਿੱਚ ਮੈਂ ਥੋੜ੍ਹੀ ਵੱਖਰੀ ਹਾਂ। ਮੈਨੂੰ ਚੰਗਾ ਖਾਣਾ ਪਸੰਦ ਹੈ ਅਤੇ ਦੂਜਿਆਂ ਨੂੰ ਖੁਆਉਣ ਵਿੱਚ ਬਹੁਤ ਮਜ਼ਾ ਆਉਂਦਾ ਹੈ। ਮੈਨੂੰ ਜਾਨਵਰਾਂ ਨਾਲ ਲਗਾਅ ਹੈ ਅਤੇ ਉਨ੍ਹਾਂ ਨਾਲ ਸਮਾਂ ਬਿਤਾਉਣਾ ਚੰਗਾ ਲੱਗਦਾ ਹੈ। ਮੈਂ ਆਪਣੇ ਰੱਬ, ਆਪਣੇ ਪਰਿਵਾਰ ਅਤੇ ਆਪਣੇ ਬੱਚਿਆਂ ਨੂੰ ਬਹੁਤ ਪਿਆਰ ਕਰਦੀ ਹਾਂ। ਮੇਰੀ ਜ਼ਿੰਦਗੀ ਜ਼ਿਆਦਾਤਰ ਘਰ ਤੋਂ ਕੰਮ ਅਤੇ ਕੰਮ ਤੋਂ ਘਰ ਤੱਕ ਹੀ ਸੀਮਿਤ ਹੈ।’’

ਸੋਮਾ ਨੂੰ ਉਦੋਂ ਤੱਕ ਘਰੋਂ ਬਾਹਰ ਨਿਕਲਣਾ ਪਸੰਦ ਨਹੀਂ ਹੈ, ਜਦੋਂ ਤੱਕ ਕੋਈ ਬਹੁਤ ਜ਼ਰੂਰੀ ਕੰਮ ਨਾ ਹੋਵੇ। ਉਸ ਨੇ ਕਿਹਾ, ‘‘ਜੇਕਰ ਕੰਮ ਨਾਲ ਜੁੜੀ ਕੋਈ ਬਹੁਤ ਜ਼ਰੂਰੀ ਪਾਰਟੀ ਹੋਵੇ, ਤਾਂ ਹੀ ਮੈਂ ਉੱਥੇ ਜਾਂਦੀ ਹਾਂ, ਨਹੀਂ ਤਾਂ ਮੈਨੂੰ ਸਾਦਾ ਜੀਵਨ ਹੀ ਪਸੰਦ ਹੈ। ਮੈਂ ਅਜਿਹੀ ਹੀ ਹਾਂ। ਅੱਜ ਦੀ ਪੀੜ੍ਹੀ ਸਾਡੇ ਵਰਗੇ ਲੋਕਾਂ ਨੂੰ ਅਕਸਰ ਪੁਰਾਣੇ ਖ਼ਿਆਲਾਂ ਦੇ ਜਾਂ ਪੱਛੜੇ ਹੋਏ ਮੰਨਦੀ ਹੈ, ਪਰ ਸੱਚ ਕਹਾਂ ਤਾਂ ਮੈਨੂੰ ਇਹੀ ਜ਼ਿੰਦਗੀ ਪਸੰਦ ਹੈ ਅਤੇ ਇਸੇ ਵਿੱਚ ਮੈਨੂੰ ਦਿਲੋਂ ਖ਼ੁਸ਼ੀ ਮਿਲਦੀ ਹੈ।’’

ਉਹ ਜ਼ਿੰਦਗੀ ਵਿੱਚ ‘ਨਿੱਜਤਾ’ ਅਤੇ ‘ਮਰਿਆਦਾਵਾਂ’ (ਸੀਮਾਵਾਂ) ਦੀ ਅਹਿਮੀਅਤ ਨੂੰ ਚੰਗੀ ਤਰ੍ਹਾਂ ਸਮਝਦੀ ਹੈ ਅਤੇ ਪਰਦੇ ’ਤੇ ਆਮ ਜ਼ਿੰਦਗੀ ਵਿੱਚ ਵੀ ਇਸ ਦਾ ਪੂਰਾ ਖ਼ਿਆਲ ਰੱਖਦੀ ਹੈ। ਉਸ ਨੇ ਆਖਿਆ, ‘‘ਮੇਰਾ ਸੁਭਾਅ ਅਜਿਹਾ ਹੈ ਕਿ ਮੈਂ ਸੈੱਟ ’ਤੇ ਵੀ ਉਵੇਂ ਹੀ ਰਹਿੰਦੀ ਹਾਂ ਜਿਵੇਂ ਘਰ ਵਿੱਚ। ਆਪਣੇ ਬੱਚਿਆਂ ਨਾਲ ਮੇਰਾ ਜਿਹੋ ਜਿਹਾ ਰਿਸ਼ਤਾ ਹੈ—ਹੱਸਣਾ-ਖੇਡਣਾ ਅਤੇ ਕਦੇ-ਕਦੇ ਡਾਂਟਣਾ—ਉਹੋ ਜਿਹਾ ਵਿਵਹਾਰ ਹੀ ਮੈਂ ਸੈੱਟ ’ਤੇ ਲੋਕਾਂ ਨਾਲ ਕਰਦੀ ਹਾਂ। ਮੇਰੇ ਸੁਭਾਅ ਵਿੱਚ ਕੋਈ ਦੋਗਲਾਪਣ ਨਹੀਂ ਹੈ।’’

ਪਰ ਇੱਕ ਜਗ੍ਹਾ ਜਿੱਥੇ ਉਹ ਸੱਚਮੁੱਚ ਅਦਾਕਾਰੀ ਕਰਦੀ ਹੈ, ਉਹ ਹੈ ਕੈਮਰੇ ਦੇ ਸਾਹਮਣੇ। ਸੋਮਾ ਨੇ ਆਪਣੀ ਗੱਲ ਖ਼ਤਮ ਕਰਦਿਆਂ ਕਿਹਾ, ‘‘ਮੈਂ ਸਿਰਫ਼ ਕੈਮਰੇ ਦੇ ਸਾਹਮਣੇ ਹੀ ਐਕਟਿੰਗ ਕਰਦੀ ਹਾਂ ਅਤੇ ਉਹ ਵੀ ਅਕਸਰ ਮੇਰੇ ਲਈ ਬਹੁਤ ਕੁਦਰਤੀ ਹੁੰਦੀ ਹੈ। ਮੈਨੂੰ ਬਿਨਾਂ ਵਜ੍ਹਾ ਕਿਸੇ ਹੋਰ ਵਰਗੇ ਬਣਨ ਦਾ ਦਿਖਾਵਾ ਕਰਨਾ ਬਿਲਕੁਲ ਪਸੰਦ ਨਹੀਂ, ਕਿਉਂਕਿ ਮੈਂ ਕਦੇ ਵੀ ਦੋਗਲਾਪਣ ਜਾਂ ਦੋਹਰੀ ਸ਼ਖ਼ਸੀਅਤ ਅਪਣਾਉਣ ਵਿੱਚ ਯਕੀਨ ਨਹੀਂ ਰੱਖਿਆ।