ਮੁੰਬਈ: ਸ਼ੋਅ ‘ਕੁਰਬਾਨ ਹੁਆ’ ਵਿੱਚ ਨੀਲ ਦੀ ਭੂਮਿਕਾ ਨਿਭਾਉਣ ਵਾਲਾ ਟੈਲੀਵਿਜ਼ਨ ਅਦਾਕਾਰ ਰਾਜਵੀਰ ਸਿੰਘ ਬੌਲੀਵੁੱਡ ਸਟਾਰ ਰਣਬੀਰ ਕਪੂਰ ਦੀ ਸ਼ਖ਼ਸੀਅਤ ਅਤੇ ਉਸ ਦੀ ਅਦਾਕਾਰੀ ਤੋਂ ਬਹੁਤ ਪ੍ਰਭਾਵਿਤ ਹੈ। ਰਣਬੀਰ ਕਪੂਰ ਦੇ ਅਦਾਕਾਰੀ ਦੇ ਹੁਨਰ ਤੋਂ ਪ੍ਰਭਾਵਿਤ ਰਾਜਵੀਰ ਸਿੰਘ ਨੂੰ ਹਮੇਸ਼ਾ ਤੋਂ ਰਣਬੀਰ ਨਾਲ ਸਕਰੀਨ ਸਾਂਝੀ ਕਰਨ ਦੀ ਇੱਛਾ ਰਹੀ ਹੈ। ਰਾਜਵੀਰ ਸਿੰਘ ਨੇ ਕਿਹਾ, ‘‘ਮੈਂ ਕਦੇ ਕਿਸੇ ਅਦਾਕਾਰ ਨੂੰ ਬਹੁਗੁਣੀ ਨਹੀਂ ਦੇਖਿਆ, ਜਦੋਂ ਉਹ ਅਦਾਕਾਰੀ ਕਰਦਾ ਹੈ ਤਾਂ ਫਿਲਮਾਂ ਵਿੱਚ ਉਸ ਦੇ ਕਿਰਦਾਰ ਉੱਭਰ ਕੇ ਸਾਹਮਣੇ ਆਉਂਦੇ ਹਨ। ਦਰਅਸਲ, ਰਣਬੀਰ ਕਪੂਰ ਇੱਕ ਅਜਿਹਾ ਵਿਅਕਤੀ ਹੈ, ਜੋ ਅਦਾਕਾਰੀ, ਪੇਸ਼ਕਾਰੀ ਅਤੇ ਹਰ ਰੀਜ਼ ਵਿੱਚ ਜਾਨ ਪਾ ਦਿੰਦਾ ਹੈ। ਉਹ ਕਿਰਦਾਰ ਨੂੰ ਤਨ ਅਤੇ ਮਨ ਤੋਂ ਅਪਣਾਉਂਦਾ ਹੈ, ਜੋ ਹਮੇਸ਼ਾ ਮੈਨੂੰ ਪ੍ਰਭਾਵਿਤ ਕਰਦਾ ਹੈ। ਮੇਰੇ ਲਈ ਇਹ ਬੇਹੱਦ ਮਾਣ ਅਤੇ ਖੁਸ਼ੀ ਵਾਲੀ ਗੱਲ ਹੋਵੇਗੀ, ਜੇਕਰ ਮੈਨੂੰ ਉਸ ਨਾਲ ਸਕਰੀਨ ਸਾਂਝੀ ਕਰਨ ਦਾ ਇੱਕ ਵੀ ਮੌਕਾ ਮਿਲੇ। ਇਹ ਇਸ ਲਈ ਨਹੀਂ ਕਿ ਉਹ ਇੱਕ ਸਟਾਰ ਹੈ, ਬਲਕਿ ਇਸ ਲਈ ਕਿ ਜਦੋਂ ਉਹ ਕੋਈ ਕਿਰਦਾਰ ਨਿਭਾਉਂਦਾ ਹੈ ਤਾਂ ਉਸੇ ਭੂਮਿਕਾ ਦੇ ਰੰਗ ਵਿੱਚ ਰੰਗਿਆ ਜਾਂਦਾ ਹੈ।’’ ਰਾਜਵੀਰ ਸਿੰਘ ਦਾ ਸ਼ੋਅ ‘ਕੁਰਬਾਨ ਹੁਆ’ ਜ਼ੀ ਟੀਵੀ ’ਤੇ ਦਿਖਾਇਆ ਜਾਂਦਾ ਹੈ। -ਆਈਏਐੱਨਐੱਸ