ਮੁੰਬਈ: ਫਿਲਮ ‘ਸੁਖੀ’ ਵਿੱਚ ਤਨਵੀ ਦਾ ਕਿਰਦਾਰ ਨਿਭਾਉਣ ਵਾਲੀ ਅਦਾਕਾਰਾ ਪਵਲੀਨ ਗੁਜਰਾਲ ਦਾ ਕਹਿਣਾ ਹੈ ਕਿ ਉਹ ਸ਼ੁਰੂ ਵਿਚ ਹੀ ਫਿਲਮ ਦੇ ਵਿਸ਼ੇ ਨੂੰ ਲੈ ਕੇ ਖਾਸੀ ਪ੍ਰਭਾਵਿਤ ਹੋਈ। ਉਸ ਨੇ ਦੱਸਿਆ ਕਿ ਫਿਲਮ ਵਿਚ ਉਸ ਦਾ ਕਿਰਦਾਰ ਕਮਾਲ ਦਾ ਹੈ। ਪਵਲੀਨ ਨੇ ਕਿਹਾ, ‘ਮੁਕੇਸ਼ ਛਾਬੜਾ ਦੀ ਕਾਸਟਿੰਗ ਕੰਪਨੀ ਨੇ ਫਿਲਮ ਦੀ ਸ਼ੂਟਿੰਗ ਸ਼ੁਰੂ ਕਰਨ ਤੋਂ ਦੋ ਸਾਲ ਪਹਿਲਾਂ ਤਨਵੀ ਦੇ ਰੋਲ ਲਈ ਮੇਰੇ ਨਾਲ ਸੰਪਰਕ ਕੀਤਾ। ਮੈਨੂੰ ਸ਼ੁਰੂ ਵਿਚ ਹੀ ਫਿਲਮ ਲਈ ਚੁਣਿਆ ਗਿਆ ਸੀ। ਉਹ ਕੁੜੀਆਂ ਦੇ ਮਸਤੀ ਕਰਨ ਅਤੇ ਗੂੜ੍ਹੇ ਰਿਸ਼ਤੇ ਬਣਾਉਣ ਬਾਰੇ ਇੱਕ ਫਿਲਮ ਬਣਾਉਣਾ ਚਾਹੁੰਦੇ ਸਨ। ਮੈਂ ਪਹਿਲਾਂ ਐਂਗਰੀ ਇੰਡੀਅਨ ਗੋਡੈਸਿਸ’ ਨਾਮ ਦੀ ਇੱਕ ਫਿਲਮ ਵਿੱਚ ਕੰਮ ਕੀਤਾ ਸੀ ਜੋ ਮੇਰੀ ਪਹਿਲੀ ਫਿਲਮ ਸੀ ਅਤੇ ਇਸ ਫਿਲਮ ਨੇ ਕਈ ਪੁਰਸਕਾਰ ਜਿੱਤੇ ਸਨ। ਉਸ ਫਿਲਮ ਤੇ ਇਸ ਫਿਲਮ ਦਾ ਵਿਸ਼ਾ ਇਕੋ ਜਿਹਾ ਸੀ, ਇਸ ਲਈ ਉਨ੍ਹਾਂ ਨੇ ਮੈਨੂੰ ਇਸ ਫਿਲਮ ਦਾ ਹਿੱਸਾ ਬਣਨ ਲਈ ਕਿਹਾ।’ ਉਸ ਨੇ ਅੱਗੇ ਕਿਹਾ ਕਿ ਤਨਵੀ ਦੇ ਕਿਰਦਾਰ ਦਾ ਸਭ ਤੋਂ ਦਿਲਚਸਪ ਪਹਿਲੂ ਇਹ ਹੈ ਕਿ ਤਨਵੀ ਦੋਹਰੀ ਜ਼ਿੰਦਗੀ ਬਤੀਤ ਕਰ ਰਹੀ ਹੈ। ਇੱਕ ਪਾਸੇ ਉਹ ਪੂਰੀ ਤਰ੍ਹਾਂ ਰਵਾਇਤੀ ਬਣ ਕੇ ਰਹਿੰਦੀ ਹੈ ਤੇ ਪਰਿਵਾਰ ਦੇ ਨਿਯਮਾਂ ਦਾ ਪਾਲਣ ਕਰਦੀ ਹੈ ਅਤੇ ਦੂਜੇ ਪਾਸੇ ਜਦੋਂ ਉਹ ਆਪਣੇ ਦੋਸਤਾਂ ਨਾਲ ਹੁੰਦੀ ਹੈ ਤਾਂ ਉਹ ਬਿਲਕੁੱਲ ਵੱਖਰੀ ਤਰ੍ਹਾਂ ਦੀ ਹੋ ਜਾਂਦੀ ਹੈ। ਉਹ ਦੋਵੇਂ ਭਾਗਾਂ ਨੂੰ ਖੂਬਸੂਰਤੀ ਨਾਲ ਨਿਭਾਉਂਦੀ ਹੈ। ਉਸ ਨੇ ਕਿਹਾ, ‘ਇਸ ਫਿਲਮ ਵਿੱਚ ਮੈਂ ਜੋ ਕਿਰਦਾਰ ਨਿਭਾ ਰਹੀ ਹਾਂ ਉਹ ਇੱਕ ਅਜਿਹੀ ਔਰਤ ਦਾ ਹੈ ਜਿਸ ਦਾ ਵਿਆਹ ਇੱਕ ਸ਼ਾਹੀ ਪਰਿਵਾਰ ਵਿੱਚ ਹੁੰਦਾ ਹੈ ਅਤੇ ਉਸ ਦੀ ਜ਼ਿੰਦਗੀ ਮੋਤੀਆਂ ਅਤੇ ਸਾੜੀਆਂ ਪਹਨਿਣ ਦੀਆਂ ਸ਼ਾਹੀ ਪਰੰਪਰਾਵਾਂ ਦੀਆਂ ਪੇਚੀਦਗੀਆਂ ਦੇ ਆਲੇ ਦੁਆਲੇ ਘੁੰਮਦੀ ਹੈ। ਇਸ ਭੂਮਿਕਾ ਦੀ ਤਿਆਰੀ ਲਈ ਮੈਂ ਮਹਾਰਾਣੀ ਗਾਇਤਰੀ ਦੇਵੀ ਅਤੇ ਪਟਿਆਲਾ ਦੀ ਰਾਜਕੁਮਾਰੀ ਵਰਗੀਆਂ ਸ਼ਖਸੀਅਤਾਂ ਤੇ ਉਨ੍ਹਾਂ ਦੀ ਜੀਵਨ ਸ਼ੈਲੀ, ਪਹਿਰਾਵੇ ਅਤੇ ਵਿਹਾਰ ਨੂੰ ਸਮਝਣ ਲਈ ਖੋਜ ਕੀਤੀ ਕਿਉਂਕਿ ਮੈਂ ਇਸ ਕਿਰਦਾਰ ਨਾਲ ਨਿਆਂ ਕਰਨਾ ਚਾਹੁੰਦੀ ਸੀ। -ਆਈਏਐੱਨਐੱਸ
