Pardhan Web Series: ਚੌਪਾਲ ਓ.ਟੀ.ਟੀ. ’ਤੇ ਸਟੂਡੈਂਟ ਪਾਲੀਟਿਕਸ ਨੂੰ ਬਿਆਨ ਕਰਦੀ ਨਵੀਂ ਵੈੱਬ ਸੀਰੀਜ਼ ‘ਪ੍ਰਧਾਨ’ ਰਿਲੀਜ਼
ਕਾਲਜ ਚੋਣਾਂ, ਦੋਸਤੀ ਅਤੇ ਲੀਡਰਸ਼ਿਪ ਦੀ ਗੁੰਝਲਦਾਰ ਦਾਸਤਾਨ ਬਿਆਨ ਕਰਦੀ 6 ਐਪੀਸੋਡਾਂ ਦੀ ਇਹ ਸੀਰੀਜ਼ ਖਿੱਚ ਰਹੀ ਹੈ ਲੋਕਾਂ ਦਾ ਧਿਆਨ
Pardhan Web Series: ਪੰਜਾਬੀ ਮਨੋਰੰਜਨ ਜਗਤ ਦੇ ਪ੍ਰਮੁੱਖ ਓ.ਟੀ.ਟੀ. ਪਲੇਟਫਾਰਮ ‘ਚੌਪਾਲ’ (Chaupal) ਨੇ ਆਪਣੀ ਨਵੀਂ ਓਰੀਜਨਲ ਵੈੱਬ ਸੀਰੀਜ਼ ‘ਪ੍ਰਧਾਨ’ (Pardhan) ਨੂੰ ਦਰਸ਼ਕਾਂ ਦੇ ਰੂ-ਬ-ਰੂ ਕਰ ਦਿੱਤਾ ਹੈ, ਜਿਸ ਦਾ ਪ੍ਰੀਮੀਅਰ ਲੰਘੀ 18 ਜੂਨ 2026 ਨੂੰ ਕੀਤਾ ਗਿਆ। ਛੇ ਐਪੀਸੋਡਾਂ ਦੀ ਇਹ ਲਿਮਟਿਡ ਸੀਰੀਜ਼ ਕਾਲਜ ਅਤੇ ਯੂਨੀਵਰਸਿਟੀਆਂ ਦੀ ਵਿਦਿਆਰਥੀ ਰਾਜਨੀਤੀ (ਸਟੂਡੈਂਟ ਪਾਲੀਟਿਕਸ) ਦੇ ਆਲੇ-ਦੁਆਲੇ ਘੁੰਮਦੀ ਹੈ। ਇਸ ਵਿੱਚ ਲੀਡਰਸ਼ਿਪ, ਵੱਡੀਆਂ ਉਮੀਦਾਂ, ਸੱਤਾ ਦੀ ਭੁੱਖ ਅਤੇ ਕੈਂਪਸ ਲਾਈਫ ਦੌਰਾਨ ਆਪਸੀ ਰਿਸ਼ਤਿਆਂ ਵਿੱਚ ਆਉਂਦੇ ਉਤਾਰ-ਚੜ੍ਹਾਅ ਵਰਗੇ ਗੰਭੀਰ ਵਿਸ਼ਿਆਂ ਨੂੰ ਬਹੁਤ ਹੀ ਬਾਰੀਕੀ ਨਾਲ ਪਰਦੇ 'ਤੇ ਉਤਾਰਿਆ ਗਿਆ ਹੈ।
ਅਮਿਤ ਪਰਾਸ਼ਰ ਦੇ ਨਿਰਦੇਸ਼ਨ ਹੇਠ ਬਣੀ ਅਤੇ ਵਿਵੇਕ ਸੈਣੀ ਵੱਲੋਂ ਲਿਖੀ ਗਈ ਇਸ ਸੀਰੀਜ਼ ਦਾ ਮੁੱਖ ਕੇਂਦਰ ਕੈਂਪਸ ਦੀਆਂ ਚੋਣਾਂ ਅਤੇ ਉਸ ਦੇ ਪਿੱਛੇ ਚੱਲਣ ਵਾਲੀ ਸਿਆਸੀ ਸ਼ਤਰੰਜ ਹੈ। ਕਹਾਣੀ ਕੁਝ ਅਜਿਹੇ ਵਿਦਿਆਰਥੀਆਂ ਦੀ ਜ਼ਿੰਦਗੀ ਨੂੰ ਪੇਸ਼ ਕਰਦੀ ਹੈ ਜੋ ਰਾਜਨੀਤਿਕ ਮੁਕਾਬਲੇਬਾਜ਼ੀ, ਬਦਲਦੇ ਸਮੀਕਰਨਾਂ ਅਤੇ ਆਪਣੇ ਨਿੱਜੀ ਮਨੋਰਥਾਂ ਕਾਰਨ ਇੱਕ-ਦੂਜੇ ਦੇ ਸਾਹਮਣੇ ਆ ਖੜ੍ਹੇ ਹੁੰਦੇ ਹਨ। ਇਸ ਨਾਟਕੀ ਤਾਣੇ-ਬਾਣੇ ਰਾਹੀਂ ਇਹ ਲੜੀਵਾਰ ਸਵਾਲ ਖੜ੍ਹੇ ਕਰਦਾ ਹੈ ਕਿ ਸੱਤਾ ਅਤੇ ਚੌਧਰ ਦੀ ਲਾਲਸਾ ਵਿੱਚ ਵਫ਼ਾਦਾਰੀ ਦੀਆਂ ਹੱਦਾਂ ਕੀ ਹੁੰਦੀਆਂ ਹਨ ਅਤੇ ਤਾਕਤ ਦਾ ਰਿਸ਼ਤਿਆਂ 'ਤੇ ਕੀ ਅਸਰ ਪੈਂਦਾ ਹੈ।
ਸ਼ਾਨਦਾਰ ਸਟਾਰਕਾਸਟ ਅਤੇ ਅਦਾਕਾਰੀ
ਇਸ ਸੀਰੀਜ਼ ਵਿੱਚ ਪੰਜਾਬੀ ਇੰਡਸਟਰੀ ਦੇ ਨਾਮਵਰ ਕਲਾਕਾਰਾਂ ਦੀ ਫ਼ੌਜ ਦੇਖਣ ਨੂੰ ਮਿਲ ਰਹੀ ਹੈ, ਜਿਨ੍ਹਾਂ ਵਿੱਚ ਮੁੱਖ ਭੂਮਿਕਾ ਨਿਭਾਅ ਰਹੇ ਕਰਨ ਸੈਂਬੀ (Karan Sehmbi) ਤੋਂ ਇਲਾਵਾ ਆਤਿਸ਼, ਤਰਲੋਕ ਸਿੰਘ, ਸੰਨੀ ਕਾਹਲੋਂ, ਨਵਦੀਪ ਬਾਜਵਾ, ਪ੍ਰਿਅੰਕਾ ਖਹਿਰਾ ਅਤੇ ਕਰਮਨ ਕੌਰ ਮਿਗਲਾਨੀ ਸ਼ਾਮਲ ਹਨ। ਇਨ੍ਹਾਂ ਕਲਾਕਾਰਾਂ ਦੀ ਦਮਦਾਰ ਅਦਾਕਾਰੀ ਨੇ ਨੌਜਵਾਨਾਂ ਦੇ ਸਿਆਸੀ ਮਾਹੌਲ ਅਤੇ ਵਿਦਿਆਰਥੀ ਜੀਵਨ ਦੀਆਂ ਗੁੰਝਲਾਂ ਨੂੰ ਬਾਖ਼ੂਬੀ ਪਰਦੇ ’ਤੇ ਜਿਊਂਦਾ ਕੀਤਾ ਹੈ।
ਪੰਜਾਬੀ ਡਿਜੀਟਲ ਸਪੇਸ ਵਿੱਚ ਇਹ ਸੀਰੀਜ਼ ‘ਚੌਪਾਲ’ ਦੇ ਓਰੀਜਨਲ ਕੰਟੈਂਟ ਦਾ ਇੱਕ ਅਹਿਮ ਹਿੱਸਾ ਹੈ, ਜੋ ਕਿ ਪੰਜਾਬੀ ਭਾਸ਼ਾ ਵਿੱਚ ਵੱਖਰੀ ਕਿਸਮ ਦੇ ਵਿਸ਼ਿਆਂ 'ਤੇ ਕੰਮ ਕਰਨ ਦੀ ਪਲੇਟਫਾਰਮ ਦੀ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ। ਪੰਜਾਬੀ ਸਟ੍ਰੀਮਿੰਗ ਜਗਤ ਵਿੱਚ ਵਿਦਿਆਰਥੀ ਰਾਜਨੀਤੀ ਦੇ ਵਿਸ਼ੇ 'ਤੇ ਆਮ ਤੌਰ 'ਤੇ ਘੱਟ ਹੀ ਕੰਮ ਦੇਖਣ ਨੂੰ ਮਿਲਦਾ ਹੈ, ਅਜਿਹੇ ਵਿੱਚ ‘ਪ੍ਰਧਾਨ’ ਇੱਕ ਨਵਾਂ ਤਜ਼ਰਬਾ ਸਾਬਤ ਹੋ ਰਹੀ ਹੈ।
ਪੁਸਤਕਾਂ ਅਤੇ ਫ਼ਿਲਮਾਂ ਵਾਂਗ ਹੀ ਡਿਜੀਟਲ ਸਕ੍ਰੀਨ 'ਤੇ ਆਏ ਇਸ ਬਦਲਾਅ ਬਾਰੇ ਗੱਲ ਕਰਦਿਆਂ ਨਿਰਦੇਸ਼ਕ ਅਮਿਤ ਪਰਾਸ਼ਰ ਨੇ ਕਿਹਾ, “ ‘ਪ੍ਰਧਾਨ’ ਰਾਹੀਂ ਅਸੀਂ ਇੱਕ ਅਜਿਹੀ ਕਹਾਣੀ ਪੇਸ਼ ਕਰਨਾ ਚਾਹੁੰਦੇ ਸੀ ਜੋ ਅੱਜ ਦੇ ਨੌਜਵਾਨਾਂ ਦੇ ਅਸਲ ਤਜ਼ਰਬਿਆਂ, ਭਾਵਨਾਵਾਂ ਅਤੇ ਸੱਤਾ ਦੀ ਦੌੜ ਦੌਰਾਨ ਉਨ੍ਹਾਂ ਦੇ ਸਾਹਮਣੇ ਆਉਣ ਵਾਲੀਆਂ ਚੁਣੌਤੀਆਂ ਨੂੰ ਦਰਸਾਉਂਦੀ ਹੋਵੇ। ਸਾਨੂੰ ਖੁਸ਼ੀ ਹੈ ਕਿ ਦਰਸ਼ਕਾਂ ਵੱਲੋਂ ਇਸ ਸੀਰੀਜ਼ ਨੂੰ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ ਅਤੇ ਉਮੀਦ ਹੈ ਕਿ ਇਹ ਨੌਜਵਾਨਾਂ ਦੇ ਮਨਾਂ ਵਿੱਚ ਸਾਰਥਕ ਚਰਚਾ ਨੂੰ ਜਨਮ ਦੇਵੇਗੀ।”
