ਮੁੰਬਈ: ਅਦਾਕਾਰਾ ਮ੍ਰਿਨਾਲ ਠਾਕੁਰ ਮਸ਼ਹੂਰ ਤਾਮਿਲ ਫਿਲਮ ‘ਥਡਮ’ ਦੇ ਹਿੰਦੀ ਰੀਮੇਕ ਵਿੱਚ ਆਦਿੱਤਿਆ ਰੌਇ ਕਪੂਰ ਨਾਲ ਦਿਖਾਈ ਦੇਵੇਗੀ। ਫਿਲਮ ਦੇ ਹਿੰਦੀ ਰੂਪਾਂਤਰਨ ਦਾ ਨਿਰਦੇਸ਼ਨ ਵਰਦਾਨ ਕੇਟਕਰ ਕਰਨਗੇ ਅਤੇ ‘ਤੂਫ਼ਾਨ’ ਦੀ ਅਦਾਕਾਰਾ ਪੁਲੀਸ ਕਰਮੀ ਦੀ ਭੂਮਿਕਾ ਨਿਭਾਏਗੀ। ਰਿਤਿਕ ਰੌਸ਼ਨ ਦੀ ਫਿਲਮ ‘ਸੁਪਰ 30’ ਅਤੇ ਜੌਹਨ ਅਬਰਾਹਿਮ ਦੀ ਫਿਲਮ ‘ਬਾਟਲਾ ਹਾਊਸ’ ਵਿੱਚ ਭੂਮਿਕਾ ਨਿਭਾਉਣ ਵਾਲੀ ਠਾਕੁਰ ਨੇ ਕਿਹਾ ਕਿ ਉਸ ਨੇ ਕਹਾਣੀ ਸੁਣਦਿਆਂ ਸਾਰ ਹੀ ਫਿਲਮ ਕਰਨ ਦਾ ਮਨ ਬਣਾ ਲਿਆ ਸੀ। ਮ੍ਰਿਨਾਲ ਠਾਕੁਰ ਨੇ ਕਿਹਾ, ‘‘ਮੇਰਾ ਕਿਰਦਾਰ ਬਹੁਤ ਹੀ ਦਿਲਚਸਪ ਹੈ ਅਤੇ ਪੁਲੀਸ ਦੀ ਭੂਮਿਕਾ ਨਿਭਾਉਣਾ ਹਮੇਸ਼ਾ ਮੇਰੀ ਤਾਂਘ ਰਿਹਾ ਹੈ। ਇਹ ਉਨ੍ਹਾਂ ਸਾਰੇ ਕਿਰਦਾਰਾਂ ਵਿੱਚੋਂ ਵੱਖਰੀ ਭੂਮਿਕਾ ਹੋਵੇਗੀ, ਜੋ ਮੈਂ ਹੁਣ ਤੱਕ ਨਿਭਾਏ ਹਨ ਅਤੇ ਮੈਂ ਉਮੀਦ ਕਰਦੀ ਹਾਂ ਕਿ ਦਰਸ਼ਕ ਇਸ ਨੂੰ ਦੇਖਣਗੇ।’’ ਸਾਲ 2019 ਵਿੱਚ ਆਈ ਇਸ ਤਾਮਿਲ ਐਕਸ਼ਨ ਫਿਲਮ ਦਾ ਨਿਰਦੇਸ਼ਨ ਮਗੀਜ਼ ਤਿਰੂਮੇਨੀ ਨੇ ਕੀਤਾ ਸੀ ਅਤੇ ਇਸ ਵਿੱਚ ਅਰੁਣ ਵਿਜੈ ਨੇ ਦੋਹਰੀ ਭੂਮਿਕਾ ਨਿਭਾਈ ਸੀ। ਫਿਲਮ ’ਚ ਤਾਨਿਆ ਹੋਪ, ਸਮਰਿਤੀ ਵੈਂਕਟ ਅਤੇ ਵਿਦਿਆ ਪ੍ਰਦੀਪ ਨੇ ਵੀ ਕੰਮ ਕੀਤਾ ਸੀ। ਇਸ ਦਾ ਹਿੰਦੀ ਰੂਪਾਂਤਰਨ ਇਸ ਸਾਲ ਅਕਤੂਬਰ ਵਿੱਚ ਰਿਲੀਜ਼ ਹੋਵੇਗੇ। ਮ੍ਰਿਨਾਲ ਠਾਕੁਰ ਹਾਲ ਹੀ ਵਿੱਚ ਐਮਾਜ਼ੋਨ ਪ੍ਰਾਈਮ ’ਤੇ ਰਿਲੀਜ਼ ਹੋਈ ਫਿਲਮ ‘ਤੂਫਾਨ’ ਵਿੱਚ ਫਰਹਾਨ ਅਖ਼ਤਰ ਨਾਲ ਦਿਖਾਈ ਦਿੱਤੀ ਸੀ। ਉਹ ਜਲਦੀ ਹੀ ਸ਼ਾਹਿਦ ਕਪੂਰ ਨਾਲ ‘ਜਰਸੀ’ ਵਿੱਚ ਦਿਖਾਈ ਦੇਵਗੀ। -ਪੀਟੀਆਈ
