ਚੱਕ ਕੇ ਬਾਹਰ ਮਾਰੋ...ਝੰਡੇ ਦਿਖਾਉਣ ਵਾਲਿਆਂ ਨੂੰ ਸਿੱਧਾ ਹੋਇਆ Diljit Dosanjh

ਗਲੋਬਲ ਸਟਾਰ ਦਿਲਜੀਤ ਦੋਸਾਂਝ ਇਨੀਂ ਦਿਨੀਂ ਆਪਣੇ 'ਔਰਾ ਟੂਰ' ਨਾਲ ਪੂਰੀ ਦੁਨੀਆ 'ਚ ਧੂਮ ਮਚਾ ਰਹੇ ਹਨ, ਪਰ ਕੈਨੇਡਾ ਦੇ ਕੈਲਗਰੀ ਸ਼ੋਅ ਤੋਂ ਬਾਅਦ ਇੱਕ ਅਜਿਹਾ ਵਿਵਾਦ ਖੜ੍ਹਾ ਹੋ ਗਿਆ ਹੈ, ਜਿਸ ਨੇ ਦਿਲਜੀਤ ਨੂੰ ਗੁੱਸੇ 'ਚ ਆਉਣ ਲਈ ਮਜਬੂਰ ਕਰ ਦਿੱਤਾ। ਦਿਲਜੀਤ ਨੇ ਸੋਸ਼ਲ ਮੀਡੀਆ 'ਤੇ ਸਖ਼ਤ ਸ਼ਬਦਾਂ 'ਚ ਚਿਤਾਵਨੀ ਦਿੱਤੀ ਹੈ ਕਿ ਉਹ ਆਪਣੇ ਪ੍ਰਸ਼ੰਸਕਾਂ ਨਾਲ ਬਦਤਮੀਜ਼ੀ ਬਰਦਾਸ਼ਤ ਨਹੀਂ ਕਰਨਗੇ—ਚਾਹੇ ਹੱਥ 'ਚ ਕੋਈ ਵੀ ਝੰਡਾ ਹੋਵੇ।

ਦਰਅਸਲ, ਕੈਲਗਰੀ ਸ਼ੋਅ ਦੌਰਾਨ ਕੁਝ ਅਜਿਹੀਆਂ ਘਟਨਾਵਾਂ ਵਾਪਰੀਆਂ ਜਿੱਥੇ ਪ੍ਰਦਰਸ਼ਨਕਾਰੀਆਂ ਅਤੇ ਪ੍ਰਸ਼ੰਸਕਾਂ ਵਿਚਾਲੇ ਟਕਰਾਅ ਦੇਖਣ ਨੂੰ ਮਿਲਿਆ। ਦਿਲਜੀਤ ਨੇ ਇੰਸਟਾਗ੍ਰਾਮ 'ਤੇ ਲੰਮੀ-ਚੌੜੀ ਪੋਸਟ ਸਾਂਝੀ ਕਰਦਿਆਂ ਲਿਖਿਆ "ਬਾਹਰ ਖੜ੍ਹੇ ਹੋ ਕੇ ਸ਼ਾਂਤੀਪੂਰਵਕ ਵਿਰੋਧ ਕਰਨਾ ਤੁਹਾਡਾ ਹੱਕ ਹੈ। ਪਰ ਜੇਕਰ ਤੁਸੀਂ ਅੰਦਰ ਆ ਕੇ ਮੇਰੇ ਪ੍ਰਸ਼ੰਸਕਾਂ ਨੂੰ ਪਰੇਸ਼ਾਨ ਕਰੋਗੇ, ਤਾਂ ਇਹ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ।"

ਦਿਲਜੀਤ ਨੇ ਸਾਫ਼ ਕੀਤਾ ਕਿ ਉਹ ਕਿਸੇ ਖਾਸ ਝੰਡੇ ਜਾਂ ਬੈਨਰ ਦੇ ਵਿਰੁੱਧ ਨਹੀਂ ਹਨ। ਉਨ੍ਹਾਂ ਕਿਹਾ ਕਿ ਲੋਕ ਅਕਸਰ ਝੰਡੇ ਇਹ ਦਿਖਾਉਣ ਲਈ ਲਿਆਉਂਦੇ ਹਨ ਕਿ ਉਹ ਕਿੱਥੋਂ ਆਏ ਹਨ, ਪਰ ਜੇਕਰ ਉਹੀ ਬੈਨਰ ਵਾਲੇ ਪ੍ਰਸ਼ੰਸਕਾਂ ਨੂੰ ਗਾਲ੍ਹਾਂ ਕੱਢਣ ਜਾਂ ਮਾਹੌਲ ਖਰਾਬ ਕਰਨ ਲਈ ਵਰਤਿਆ ਜਾਵੇਗਾ, ਤਾਂ ਸਖ਼ਤ ਐਕਸ਼ਨ ਲਿਆ ਜਾਵੇਗਾ।

ਦਿਲਜੀਤ ਇੰਨੇ ਨਾਰਾਜ਼ ਸਨ ਕਿ ਉਨ੍ਹਾਂ ਨੇ ਸਟੇਜ ਤੋਂ ਸਕਿਓਰਿਟੀ ਨੂੰ ਹਦਾਇਤ ਦੇ ਦਿੱਤੀ। ਉਨ੍ਹਾਂ ਕਿਹਾ- ਮੈਂ ਸਕਿਓਰਿਟੀ ਨੂੰ ਕਿਹਾ ਕਿ ਕੇ ਜੋ ਵੀ ਪ੍ਰੋਗਰਾਮ ਨੂੰ ਖਰਾਬ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ ਚੱਕ ਕੇ ਬਾਹਰ ਮਾਰੋ.. ਦਿਲਜੀਤ ਨੇ ਇਹ ਵੀ ਕਿਹਾ ਕਿ ਉਨ੍ਹਾਂ ਦੇ ਬਿਆਨ ਨੂੰ ਕਿਸੇ ਖਾਸ ਧਿਰ ਦੇ ਖਿਲਾਫ ਨਾ ਜੋੜਿਆ ਜਾਵੇ ਅਤੇ ਕੋਈ 'ਫੇਕ ਨੈਰੇਟਿਵ' ਯਾਨੀ ਝੂਠੀਆਂ ਕਹਾਣੀਆਂ ਨਾ ਫੈਲਾਈਆਂ ਜਾਣ। ਉਨ੍ਹਾਂ ਕਿਹਾ "ਮੈਂ ਪਿਛਲੇ ਸਾਲ ਤੋਂ ਇਸ ਬਾਰੇ ਬੋਲਣ ਤੋਂ ਪਰਹੇਜ਼ ਕਰ ਰਿਹਾ ਸੀ, ਪਰ ਹੁਣ ਹੱਦ ਹੋ ਗਈ ਹੈ। ਸਿਰਫ ਪਿਆਰ ਅਤੇ ਸ਼ਾਂਤੀ ਦੀ ਗੱਲ ਕਰੋ।

ਸਿਰਫ ਇੰਨਾ ਹੀ ਨਹੀਂ, ਦਿਲਜੀਤ ਨੂੰ ਹਾਲ ਹੀ ਵਿੱਚ ਪੰਜਾਬ ਦੇ ਸਾਬਕਾ ਅਧਿਕਾਰੀਆਂ ਵੱਲੋਂ ਸਿਆਸਤ ਵਿੱਚ ਆਉਣ ਦੀ ਪੇਸ਼ਕਸ਼ ਵੀ ਮਿਲੀ ਸੀ। ਜਿਸ 'ਤੇ ਦਿਲਜੀਤ ਨੇ ਦੋ ਟੁੱਕ ਜਵਾਬ ਦਿੱਤਾ "ਕਦੇ ਵੀ ਨਹੀਂ! ਮੇਰਾ ਕੰਮ ਮਨੋਰੰਜਨ ਕਰਨਾ ਹੈ ਅਤੇ ਮੈਂ ਆਪਣੇ ਖੇਤਰ ਵਿੱਚ ਬਹੁਤ ਖੁਸ਼ ਹਾਂ।"

ਦਿਲਜੀਤ ਦੋਸਾਂਝ ਨੇ ਇਹ ਸਾਫ਼ ਕਰ ਦਿੱਤਾ ਹੈ ਕਿ ਕਲਾਕਾਰ ਲਈ ਉਸ ਦੇ ਪ੍ਰਸ਼ੰਸਕ ਸਭ ਤੋਂ ਉੱਪਰ ਹਨ ਅਤੇ ਸ਼ੋਅ ਦੇ ਅੰਦਰ ਸਿਰਫ਼ ਸੰਗੀਤ ਤੇ ਪਿਆਰ ਦੀ ਥਾਂ ਹੈ, ਨਫ਼ਰਤ ਦੀ ਨਹੀਂ।