‘Golmal 5’: ਰੋਹਿਤ ਸ਼ੈਟੀ ਵੱਲੋਂ ਨਿਰਦੇਸ਼ਤ ਫ਼ਿਲਮ ‘ਗੋਲਮਾਲ 5’ ਰਿਲੀਜ਼ ਮਿਤੀ ਦਾ ਐਲਾਨ

ਫ਼ਿਲਮ ਨਿਰਮਾਤਾ ਰੋਹਿਤ ਸ਼ੈਟੀ ਦੀ ਫ਼ਿਲਮ “ਗੋਲਮਾਲ 5” 8 ਜਨਵਰੀ, 2027 ਨੂੰ ਰਿਲੀਜ਼ ਹੋਣ ਲਈ ਤਿਆਰ ਹੈ। ਇਹ ਫ਼ਿਲਮ ਕਾਮੇਡੀ ਫ੍ਰੈਂਚਾਇਜ਼ੀ ਦੀ ਪੰਜਵੀਂ ਕਿਸ਼ਤ ਹੈ, ਜਿਸ ਦੀ ਸ਼ੁਰੂਆਤ 2006 ਵਿੱਚ “ਗੋਲਮਾਲ: ਫਨ ਅਨਲਿਮਟਿਡ” ਨਾਲ ਹੋਈ ਸੀ। ਬਾਅਦ ਵਿੱਚ, 2008 ਵਿੱਚ ਇੱਕ ਸੀਕਵਲ ਬਣਾਇਆ ਗਿਆ, “ਗੋਲਮਾਲ ਰਿਟਰਨਜ਼”, ਜਿਸ ਤੋਂ ਬਾਅਦ 2010 ਵਿੱਚ “ਗੋਲਮਾਲ 3” ਅਤੇ 2017 ਵਿੱਚ “ਗੋਲਮਾਲ ਅਗੇਨ” ਆਈ।

ਸ਼ੈਟੀ ਨੇ ਸ਼ਨਿੱਚਰਵਾਰ ਨੂੰ ਆਪਣੇ ਇੰਸਟਾਗ੍ਰਾਮ ਹੈਂਡਲ ’ਤੇ ਇੱਕ ਪੋਸਟ ਰਾਹੀਂ ਇਹ ਖ਼ਬਰ ਸਾਂਝੀ ਕੀਤੀ, ਜਿਸ ਵਿੱਚ ਫ਼ਿਲਮ ਦਾ ਪੋਸਟਰ ਸ਼ਾਮਲ ਸੀ। ਕੈਪਸ਼ਨ ਵਿੱਚ ਲਿਖਿਆ ਸੀ, “ਹਾਸਾ, ਮੌਜ-ਮਸਤੀ, ਖ਼ੁਸ਼ੀ, ਆਨੰਦ ਅਤੇ ਪਰਿਵਾਰ... ਬੱਸ, ਹੋਰ ਕੁਝ ਨਹੀਂ, 8 ਜਨਵਰੀ 2027।”

ਅਜੇ ਦੇਵਗਨ ਦੀ ਅਗਵਾਈ ਵਾਲੀ ਇਹ ਫ਼ਿਲਮ ਸੀਰੀਜ਼ ਸ਼ਰਾਰਤੀ, ਬੇਮਕਸੱਦ ਦੋਸਤਾਂ ਦੇ ਇੱਕ ਸਮੂਹ ਦੁਆਲੇ ਘੁੰਮਦੀ ਹੈ—ਗੋਪਾਲ (ਦੇਵਗਨ), ਮਾਧਵ (ਅਰਸ਼ਦ ਵਾਰਸੀ), ਲਕਸ਼ਮਣ (ਸ਼੍ਰੇਅਸ ਤਲਪੜੇ, ਸ਼ਰਮਨ ਜੋਸ਼ੀ, ਅਤੇ ਕੁਨਾਲ ਖੇਮੂ) ਅਤੇ ਲੱਕੀ (ਤੁਸ਼ਾਰ ਕਪੂਰ), ਜੋ ਅਜੀਬੋ-ਗ਼ਰੀਬ ਅਤੇ ਹਫੜਾ-ਦਫੜੀ ਵਾਲੀਆਂ ਸਥਿਤੀਆਂ ਵਿੱਚ ਫਸ ਜਾਂਦੇ ਹਨ।

“ਗੋਲਮਾਲ 5” ਵਿੱਚ ਅਕਸ਼ੈ ਕੁਮਾਰ ਵੀ ਨਜ਼ਰ ਆਉਣਗੇ ਅਤੇ ਇਹ ਫ਼ਿਲਮ ਰਿਲਾਇੰਸ ਐਂਟਰਟੇਨਮੈਂਟ ਦੇ ਸਹਿਯੋਗ ਨਾਲ ਸ਼ੈਟੀ ਦੇ ਆਪਣੇ ਪ੍ਰੋਡਕਸ਼ਨ ਬੈਨਰ, ਰੋਹਿਤ ਸ਼ੈਟੀ ਪਿਕਚਰਜ਼ ਦੇ ਤਹਿਤ ਤਿਆਰ ਕੀਤੀ ਗਈ ਹੈ।