ਨਵੀਂ ਦਿੱਲੀ: ਨਿਰਦੇਸ਼ਕ ਚੈਤੰਨਿਆ ਤਮਹਾਨੇ ਦੀ ਮਰਾਠੀ ਭਾਸ਼ਾ ਦੀ ਫੀਚਰ ਫ਼ਿਲਮ ‘ਦਿ ਡਿਸਾਈਪਲ’ ਨੂੰ ਵੈਨਿਸ ਫ਼ਿਲਮ ਫੈਸਟੀਵਲ ਵਿੱਚ ‘ਸਰਵੋਤਮ ਸਕਰੀਨਪਲੇਅ ਐਵਾਰਡ’ ਮਿਲਿਆ ਹੈ। ਇਸ ਦੌਰਾਨ ਚੀਨੀ-ਅਮਰੀਕੀ ਫ਼ਿਲਮਸਾਜ਼ ਚਲੋ ਜ਼ਾਓ ਨੂੰ ਉਸਦੇ ਡਰਾਮੇ ‘ਨੋਮੈਡਲੈਂਡ’ ਲਈ ਸਭ ਤੋਂ ਵੱਡਾ ‘ਗੋਲਡਨ ਲਾਇਨ’ ਐਵਾਰਡ ਮਿਲਿਆ ਹੈ। ਸ਼ਨਿਚਰਵਾਰ ਨੂੰ ਜਿਊਰੀ ਵੱਲੋਂ ਮੁੱਖ ਮੁਕਾਬਲੇ ਦੇ ਜੇਤੂਆਂ ਦੇ ਨਾਵਾਂ ਦਾ ਐਲਾਨ ਕੀਤਾ ਗਿਆ। ਇਹ ਫੈਸਟੀਵਲ ਇਸ ਵਾਰ ਵਿਸ਼ਵ ਪੱਧਰ ’ਤੇ ਇੰਟਰਨੈੱਟ ਦੇ ਮਾਧਿਅਮ ਰਾਹੀਂ ਸਿੱਧਾ ਪ੍ਰਸਾਰਿਤ (ਲਾਈਵ ਸਟਰੀਮਡ) ਕੀਤਾ ਗਿਆ ਸੀ। ਦੱਸਣਯੋਗ ਹੈ ਕਿ ਮੀਰਾ ਨਾਇਰ ਮਗਰੋਂ ਇੱਕ ਯੂਰਪੀ ਫ਼ਿਲਮ ਫੈਸਟੀਵਲ ਦੀ ਮੁੱਖ ਸ਼੍ਰੇਣੀ ਵਿੱਚ ਮੁਕਾਬਲੇ ’ਚ ਹਿੱਸਾ ਲੈਣ ਵਾਲੇ ਪਹਿਲੇ ਭਾਰਤੀ ਸਿਨੇਮਾ ਦੇ ਪਹਿਲੇ ਡਾਇਰੈਕਟਰ ਹਨ। -ਪੀਟੀਆਈ