ਅਰਿਜੀਤ ਸਿੰਘ ਵੱਲੋਂ ਪਿੱਠਵਰਤੀ ਗਾਇਕੀ ਤੋਂ ਸੰਨਿਆਸ ਦਾ ਐਲਾਨ

ਆਪਣੇ ਸੋਸ਼ਲ ਮੀਡੀਆ ਪੰਨਿਆਂ ’ਤੇ ਸਾਂਝੇ ਕੀਤੇ ਇੱਕ ਸੰਦੇਸ਼ ਵਿੱਚ ਸਿੰਘ ਨੇ ਕਿਹਾ ਕਿ ਉਸ ਨੇ ਪਿੱਠਵਰਤੀ ਗਾਇਕੀ ਤੋਂ ਦੂਰੀ ਬਣਾਉਣ ਦਾ ਫੈਸਲਾ ਕੀਤਾ ਹੈ। ਅਰੀਜੀਤ ਨੇ ਇਹ ਫੈਸਲਾ ਅਜਿਹੇ ਮੌਕੇ ਲਿਆ ਹੈ ਜਦੋਂ ਹਿੰਦੀ ਸਿਨੇਮਾ ਦੀ ਸਭ ਤੋਂ ਮਕਬੂਲ ਤੇ ਮੰਗ ਵਾਲੀ ਆਵਾਜ਼ ਕਰਕੇ ਉਹ ਆਪਣੇ ਕਰੀਅਰ ਦੀ ਸਿਖਰ ’ਤੇ ਹੈ।

ਗਾਇਕ ਨੇ ਲਿਖਿਆ, ‘‘ਨਮਸਤੇ, ਸਾਰਿਆਂ ਨੂੰ ਨਵਾਂ ਸਾਲ ਮੁਬਾਰਕ। ਮੈਂ ਤੁਹਾਡੇ ਸਾਰਿਆਂ ਦਾ ਧੰਨਵਾਦ ਕਰਨਾ ਚਾਹੁੰਦਾ ਹਾਂ ਕਿ ਤੁਸੀਂ ਮੈਨੂੰ ਇੰਨੇ ਸਾਲਾਂ ਤੱਕ ਸਰੋਤਿਆਂ ਵਜੋਂ ਇੰਨਾ ਪਿਆਰ ਦਿੱਤਾ। ਮੈਨੂੰ ਇਹ ਐਲਾਨ ਕਰਦੇ ਹੋਏ ਖੁਸ਼ੀ ਹੋ ਰਹੀ ਹੈ ਕਿ ਮੈਂ ਹੁਣ ਤੋਂ ਇੱਕ ਪਿੱਠਵਰਤੀ ਗਾਇਕ ਵਜੋਂ ਕੋਈ ਨਵਾਂ ਕੰਮ ਨਹੀਂ ਲੈਣ ਜਾ ਰਿਹਾ ਹਾਂ। ਮੈਂ ਇਸ ਨੂੰ ਖਤਮ ਕਰ ਰਿਹਾ ਹਾਂ। ਇਹ ਇੱਕ ਸ਼ਾਨਦਾਰ ਸਫ਼ਰ ਸੀ।’’

ਅਰਿਜੀਤ(38) ਨੇ ਹਾਲਾਂਕਿ ਸਾਫ਼ ਕਰ ਦਿੱਤਾ ਕਿ ਉਹ ਸੁਤੰਤਰ ਤੌਰ ’ਤੇ ਸੰਗੀਤ ਕੰਪੋਜ਼ ਕਰਨਾ ਜਾਰੀ ਰੱਖੇਗਾ ਅਤੇ ਕੁਝ ਮੌਜੂਦਾ ਵਚਨਬੱਧਤਾਵਾਂ ਨੂੰ ਪੂਰਾ ਕਰੇਗਾ। ਸਿੰਘ ਨੇ ਆਪਣੇ ਫੈਸਲੇ ਪਿਛਲੇ ਕਾਰਨਾਂ ਬਾਰੇ ਵਿਸਥਾਰ ਵਿੱਚ ਨਹੀਂ ਦੱਸਿਆ। ਹਾਲਾਂਕਿ ਬਹੁਤ ਸਾਰੇ ਪ੍ਰਸ਼ੰਸਕਾਂ ਨੇ ਗਾਇਕ ਦੇ ਇਸ ਫ਼ੈਸਲੇ ਬਾਰੇ ਨਾਰਾਜ਼ਗੀ ਜਤਾਈ ਹੈ। ਇਕ ਯੂਜ਼ਰ ਨੇ ਲਿਖਿਆ, ‘‘ਬਹੁਤ ਜਲਦੀ ਸਰ, ਇਹ ਸੱਚ ਨਹੀਂ ਹੋ ਸਕਦਾ।’’ ਇਕ ਹੋਰ ਨੇ ਲਿਖਿਆ, ‘‘ਇਹ ਸੱਚ ਨਹੀਂ ਹੋ ਸਕਦਾ। ਅਰੇ ਪਰ ਕਿਉਂ? ਤੁਸੀਂ ਸਾਡੇ ਨਾਲ ਅਜਿਹਾ ਕਿਉਂ ਕਰ ਰਹੇ ਹੋ ??? ਕਿਰਪਾ ਕਰਕੇ ਨਾ ਜਾਓ ਯਾਰ। ਸਾਨੂੰ ਘੱਟੋ-ਘੱਟ 20 ਸਾਲਾਂ ਲਈ ਤੁਹਾਡੀ ਲੋੜ ਹੈ।’’

ਭਾਰਤੀ ਸੰਗੀਤ ਜਗਤ ਵਿਚ ਅਰੀਜੀਤ ਸਿੰਘ ਦਾ ਉਭਾਰ ਕਿਸੇ ਸ਼ਾਨਦਾਰ ਘਟਨਾ ਤੋਂ ਘੱਟ ਨਹੀਂ ਰਿਹਾ ਹੈ। ਸਿੰਘ ਨੇ 2005 ਵਿੱਚ ਰਿਐਲਿਟੀ ਸ਼ੋਅ ‘ਫੇਮ ਗੁਰੂਕੁਲ’ ਵਿੱਚ ਇੱਕ ਪ੍ਰਤੀਯੋਗੀ ਵਜੋਂ ਸ਼ੁਰੂਆਤ ਕੀਤੀ ਸੀ ਅਤੇ 2011 ਵਿੱਚ ਇਮਰਾਨ ਹਾਸ਼ਮੀ ਦੀ ਵਾਲੀ ਫਿਲਮ ‘ਮਰਡਰ 2’ ਦੇ ਗੀਤ ‘ਫਿਰ ਮੁਹੱਬਤ’ ਨਾਲ ਪਿੱਠਵਰਤੀ ਗਾਇਕੀ ਵਿਚ ਪੈਰ ਧਰਿਆ ਸੀ। ਉਸ ਨੇ 2013 ਵਿੱਚ ‘ਆਸ਼ਿਕੀ 2’ ਦੇ ਰੂਹਾਨੀ ਹਿੱਟ ‘ਤੁਮ ਹੀ ਹੋ’ ਨਾਲ ਵੱਡੀ ਪੁਲਾਂਘ ਪੁੱਟੀ। ਇਸ ਗੀਤ ਦੀ ਸਫਲਤਾ ਨੇ ਉਸ ਨੂੰ ਘਰ-ਘਰ ਵਿੱਚ ਜਾਣਿਆ ਪਛਾਣਿਆ ਨਾਮ ਬਣਾ ਦਿੱਤਾ।

ਮਗਰੋਂ ਉਸ ਨੇ ਸਰੋਤਿਆਂ ਨੂੰ ‘ਚੰਨਾ ਮੇਰਿਆ’, ‘ਅਗਰ ਤੁਮ ਸਾਥ ਹੋ’, ‘ਰਾਬਤਾ’, ‘ਕੇਸਰੀਆ’, ‘ਗੇਰੂਆ’, ਐ ਦਿਲ ਹੈ ਮੁਸ਼ਕਿਲ’ ਤੇ ‘ਚਲਿਆ’ ਜਿਹੇ ਚਾਰਟਬਸਟਰ ਗੀਤ ਦਿੱਤੇ। ਉਸ ਨੇ ਸੁਪਰਸਟਾਰ ਸਲਮਾਨ ਖ਼ਾਨ ਤੇ ਸ਼ਾਹਰੁਖ਼ ਖ਼ਾਨ ਤੋਂ ਲੈ ਕੇ ਰਣਬੀਰ ਕਪੂਰ ਤੇ ਰਣਵੀਰ ਸਿੰਘ ਨੂੰ ਆਪਣੀ ਆਵਾਜ਼ ਦਿੱਤੀ। ਸਿੰਘ ਨੇ ਹਿੰਦੀ, ਬੰਗਾਲੀ, ਤਾਮਿਲ, ਤੇਲੂਗੂ, ਮਲਿਆਲਮ ਤੇ ਮਰਾਠੀ ਸਣੇ ਕਈ ਭਾਰਤੀ ਭਾਸ਼ਾਵਾਂ ’ਚ ਗੀਤ ਰਿਕਾਰਡ ਕੀਤੇ। ਉਸ ਨੇ ਕਈ ਫਿਲਮਫੇਅਰ ਐਵਾਰਡ ਵੀ ਜਿੱਤੇ, ਜਿਸ ਵਿਚ ਸਰਵੋਤਮ ਪੁਰਸ਼ ਪਿੱਠਵਰਤੀ ਗਾਇਕ ਦਾ ਸਨਮਾਨ ਵੀ ਸੀ।

ਪਿਛਲੇ ਸਾਲ ਜੁਲਾਈ ਵਿੱਚ ਸਿੰਘ ਨੇ ਗਲੋਬਲ ਪੌਪ ਸਟਾਰ ਟੇਲਰ ਸਵਿਫਟ ਅਤੇ ਐਡ ਸ਼ੀਰਾਨ ਨੂੰ ਪਿੱਛੇ ਛੱਡ ਕੇ 151 ਮਿਲੀਅਨ ਫਾਲੋਅਰਜ਼ ਦੇ ਨਾਲ ਸੰਗੀਤ ਸਟ੍ਰੀਮਿੰਗ ਪਲੇਟਫਾਰਮ ਸਪੋਟੀਫਾਈ ’ਤੇ ਸਭ ਤੋਂ ਵੱਧ ਫਾਲੋ ਕੀਤੇ ਜਾਣ ਵਾਲੇ ਕਲਾਕਾਰ ਵਜੋਂ ਨਾਮ ਦਰਜ ਕੀਤਾ।

 

View this post on Instagram

 

A post shared by Arijit Singh (@arijitsingh)