Advocate Chauhan: ਧੜਕਣ ਸੁਣ ਕੇ ਖੁੱਲ੍ਹਣਗੇ ਰਾਜ਼ ! Nav Bajwa ਅਤੇ Himanshi Khurana ਦਾ ਨਵਾਂ ਕੋਰਟ ਰੂਮ ਡਰਾਮਾ
ਨਵ ਬਾਜਵਾ ਹਮੇਸ਼ਾ ਰਵਾਇਤੀ ਪੰਜਾਬੀ ਕਹਾਣੀਆਂ ਤੋਂ ਹਟ ਕੇ ਕੁਝ ਨਵਾਂ ਕਰਨ ਲਈ ਜਾਣੇ ਜਾਂਦੇ ਹਨ। 'ਰੇਡੂਆ' ਵਿੱਚ ਸਾਇੰਸ ਫ਼ਿਕਸ਼ਨ ਤੋਂ ਲੈ ਕੇ ਰੋਮਾਂਟਿਕ ਥ੍ਰਿਲਰ 'ਇਸ਼ਕਾਂ' ਅਤੇ ਕਾਮੇਡੀ 'ਕਿਟੀ ਪਾਰਟੀ' ਤੱਕ, ਉਨ੍ਹਾਂ ਨੇ ਬਤੌਰ ਅਦਾਕਾਰ, ਲੇਖਕ, ਨਿਰਦੇਸ਼ਕ ਅਤੇ ਨਿਰਮਾਤਾ ਵੱਖ-ਵੱਖ...
ਨਵ ਬਾਜਵਾ ਹਮੇਸ਼ਾ ਰਵਾਇਤੀ ਪੰਜਾਬੀ ਕਹਾਣੀਆਂ ਤੋਂ ਹਟ ਕੇ ਕੁਝ ਨਵਾਂ ਕਰਨ ਲਈ ਜਾਣੇ ਜਾਂਦੇ ਹਨ। 'ਰੇਡੂਆ' ਵਿੱਚ ਸਾਇੰਸ ਫ਼ਿਕਸ਼ਨ ਤੋਂ ਲੈ ਕੇ ਰੋਮਾਂਟਿਕ ਥ੍ਰਿਲਰ 'ਇਸ਼ਕਾਂ' ਅਤੇ ਕਾਮੇਡੀ 'ਕਿਟੀ ਪਾਰਟੀ' ਤੱਕ, ਉਨ੍ਹਾਂ ਨੇ ਬਤੌਰ ਅਦਾਕਾਰ, ਲੇਖਕ, ਨਿਰਦੇਸ਼ਕ ਅਤੇ ਨਿਰਮਾਤਾ ਵੱਖ-ਵੱਖ ਵਿਸ਼ਿਆਂ ਉੱਤੇ ਕੰਮ ਕੀਤਾ ਹੈ। ਇਸ ਵਾਰ ਉਹ 'ਐਡਵੋਕੇਟ ਚੌਹਾਨ' ਰਾਹੀਂ ਇੱਕ ਵੱਖਰੇ ਰਸਤੇ ’ਤੇ ਤੁਰੇ ਹਨ, ਜਿਸ ਵਿੱਚ ਉਹ ਕਾਨੂੰਨੀ ਲੜਾਈਆਂ ਅਤੇ ਡੂੰਘੇ ਮਨੁੱਖੀ ਜਜ਼ਬਿਆਂ ਨੂੰ ਜੋੜਦੇ ਹੋਏ ਇੱਕ ਨਜ਼ਰੋਂ ਕਮਜ਼ੋਰ (ਅੰਨ੍ਹੇ) ਵਕੀਲ ਦੀ ਮੁੱਖ ਭੂਮਿਕਾ ਨਿਭਾ ਰਹੇ ਹਨ।
ਇਸ ਹਾਈ-ਪ੍ਰੋਫਾਈਲ ਡਰਾਮਾ ਸੀਰੀਜ਼ ਵਿੱਚ ਉਨ੍ਹਾਂ ਦੇ ਨਾਲ ਹਿਮਾਂਸ਼ੀ ਖੁਰਾਣਾ, ਗੁਰਪ੍ਰੀਤ ਘੁੱਗੀ ਅਤੇ ਹੋਰ ਕਲਾਕਾਰ ਨਜ਼ਰ ਆਉਣਗੇ। ਨਵ ਬਾਜਵਾ ਵੱਲੋਂ ਲਿਖੀ ਗਈ ਇਹ ਕਹਾਣੀ ਇੱਕ ਮਹਿਲਾ ਵਕੀਲ ਆਂਚਲ ਭਾਟੀਆ ਦੀ ਅਸਲ ਜ਼ਿੰਦਗੀ ਤੋਂ ਪ੍ਰੇਰਿਤ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਇਹ ਕੋਰਟ ਰੂਮ ਡਰਾਮਾ ਬਣਾਉਣ ਦਾ ਫ਼ੈਸਲਾ ਕੀਤਾ। ਬਾਜਵਾ ਮੁਤਾਬਕ ਉਨ੍ਹਾਂ ਨੇ ਲਗਪਗ 45-50 ਦਿਨਾਂ ਵਿੱਚ ਇਸ ਕਹਾਣੀ ਨੂੰ ਤਿਆਰ ਕੀਤਾ ਅਤੇ ਫਿਰ ਇਸ ਦੀ ਸਕ੍ਰੀਨਪਲੇਅ ਤਿਆਰ ਕੀਤੀ।
ਸ਼ੂਟਿੰਗ ਦੌਰਾਨ ਦੋਵੇਂ ਕਲਾਕਾਰ ਜ਼ਖ਼ਮੀ ਹੋਣ ਦੇ ਬਾਵਜੂਦ ਪੂਰੇ ਜੋਸ਼ ਵਿੱਚ ਨਜ਼ਰ ਆਏ—ਹਿਮਾਂਸ਼ੀ ਦੀ ਕਾਲਰਬੋਨ (ਕਾਲਰ ਦੀ ਹੱਡੀ) ਵਿੱਚ ਫ੍ਰੈਕਚਰ ਸੀ ਅਤੇ ਨਵ ਦੇ ਪੈਰ ਵਿੱਚ ਸੱਟ ਲੱਗੀ ਹੋਈ ਸੀ। ਹਿਮਾਂਸ਼ੀ ਹੱਥ ਵਿੱਚ ਪਲਾਸਟਰ ਲਗਵਾ ਕੇ ਆਈ ਅਤੇ ਨਵ ਨੇ ਕ੍ਰੌਕਸ ਪਾਏ ਹੋਏ ਸਨ। ਪਰ ਦੋਵਾਂ ਨੇ ਦਰਦ ਨੂੰ ਆਪਣੇ ਉਤਸ਼ਾਹ ਦੇ ਆੜੇ ਨਹੀਂ ਆਉਣ ਦਿੱਤਾ।
ਵਰਿੰਦਰ ਰਾਮਗੜ੍ਹੀਆ ਵੱਲੋਂ ਨਿਰਦੇਸ਼ਿਤ ਇਸ ਕਹਾਣੀ ਦਾ ਮੁੱਖ ਕੇਂਦਰ ਇੱਕ ਅਜਿਹਾ ਪੇਸ਼ੇਵਰ ਮਾਹੌਲ ਹੈ ਜਿੱਥੇ ਪਾਤਰ ਆਪਣੇ ਆਪ ਨੂੰ ਸਾਬਤ ਕਰਨ ਲਈ ਸੰਘਰਸ਼ ਕਰਦੇ ਹਨ।
'ਐਡਵੋਕੇਟ ਚੌਹਾਨ' ਦੀ ਦੁਨੀਆ ਨੂੰ ਦੇਖਣਾ
ਨਵ ਬਾਜਵਾ ਲਈ ਨਜ਼ਰੋਂ ਕਮਜ਼ੋਰ ਵਕੀਲ ਦੀ ਭੂਮਿਕਾ ਨਿਭਾਉਣੀ ਆਪਣੇ ਆਪ ਵਿੱਚ ਇੱਕ ਵੱਡੀ ਚੁਣੌਤੀ ਸੀ। ਉਨ੍ਹਾਂ ਦੇ ਪਾਤਰ ਨੂੰ ਅੱਖਾਂ ਦੀ ਨਾੜੀ ਦੀ ਸਮੱਸਿਆ ਹੈ, ਜਿਸ ਕਾਰਨ ਅਦਾਕਾਰ ਨੂੰ ਅਜਿਹੀ ਦੁਨੀਆ ਵਿੱਚ ਜਿਉਣਾ ਪਿਆ ਜਿਸ ਨੂੰ ਉਹ ਆਪਣੀਆਂ ਅੱਖਾਂ ਨਾਲ ਸਹੀ ਤਰ੍ਹਾਂ ਦੇਖ ਨਹੀਂ ਸਕਦੇ ਸਨ।
ਟੀਮ ਨੇ ਕਈ ਖ਼ਾਸ ਲੈਂਸਾਂ ਨਾਲ ਤਜਰਬਾ ਕੀਤਾ ਅਤੇ ਆਖਿਰਕਾਰ ਅਜਿਹੇ ਲੈਂਸ ਚੁਣੇ ਜਿਨ੍ਹਾਂ ਨਾਲ ਉਨ੍ਹਾਂ ਦੀ ਨਜ਼ਰ ਲਗਪਗ 60 ਤੋਂ 70 ਫੀਸਦੀ ਧੁੰਦਲੀ ਹੋ ਗਈ। ਬਾਜਵਾ ਨੇ ਸ਼ੂਟਿੰਗ ਦੌਰਾਨ ਅਕਸਰ 8 ਤੋਂ 12 ਘੰਟੇ ਇਹ ਲੈਂਸ ਪਹਿਨੇ ਰੱਖੇ। ਦੇਖਣ ਦੀ ਬਜਾਏ ਆਵਾਜ਼ ਦੇ ਆਧਾਰ ਉੱਤੇ ਕੰਮ ਕਰਨਾ ਉਨ੍ਹਾਂ ਲਈ ਇੱਕ ਨਵਾਂ ਤਜਰਬਾ ਸੀ। ਉਹ ਕਹਿੰਦੇ ਹਨ ਕਿ ਜਦੋਂ ਤੁਸੀਂ ਕਿਸੇ ਕੰਮ ਨਾਲ ਬਹੁਤ ਪਿਆਰ ਕਰਦੇ ਹੋ ਤਾਂ ਤੁਹਾਨੂੰ ਉਹ ਮੁਸ਼ਕਿਲ ਨਹੀਂ ਲੱਗਦਾ।
ਇਸ ਵਾਰ ਨਵ ਬਾਜਵਾ ਨੂੰ ਸਿਰਫ਼ ਆਪਣੀ ਅਦਾਕਾਰੀ ਉੱਤੇ ਧਿਆਨ ਦੇਣ ਦਾ ਮੌਕਾ ਮਿਲਿਆ, ਕਿਉਂਕਿ ਪਿਛਲੇ ਕੁਝ ਸਾਲਾਂ ਵਿੱਚ ਉਹ ਲਿਖਣ, ਨਿਰਦੇਸ਼ਨ ਅਤੇ ਨਿਰਮਾਣ ਦੇ ਕੰਮਾਂ ਵਿੱਚ ਵੀ ਰੁੱਝੇ ਰਹਿੰਦੇ ਸਨ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਇਸ ਗੱਲ ਦੀ ਖ਼ੁਸ਼ੀ ਹੈ ਕਿ ਇਸ ਵਾਰ ਉਹ ਨਿਰਦੇਸ਼ਨ ਨਹੀਂ ਕਰ ਰਹੇ ਸਨ, ਸਿਰਫ਼ ਅਦਾਕਾਰੀ ਕਰ ਰਹੇ ਸਨ।
'ਮੈਂ ਕਿਸੇ ਤੋਂ ਨਹੀਂ ਡਰਦੀ': ਹਿਮਾਂਸ਼ੀ ਖੁਰਾਣਾ
ਹਿਮਾਂਸ਼ੀ ਇਸ ਵਿੱਚ ਇੱਕ ਨੌਜਵਾਨ ਵਕੀਲ ਦੀ ਭੂਮਿਕਾ ਨਿਭਾ ਰਹੀ ਹੈ ਜੋ ਕਿ ਆਤਮ-ਵਿਸ਼ਵਾਸੀ ਹੋਣ ਦੇ ਨਾਲ-ਨਾਲ ਭਾਵੁਕ, ਸ਼ਰਮੀਲੀ ਪਰ ਆਪਣੇ ਕੰਮ ਪ੍ਰਤੀ ਪੱਕੀ ਹੈ ਅਤੇ ਸਭ ਤੋਂ ਵੱਧ ਉਹ ਆਪਣੇ ਆਪ ਨੂੰ ਸਾਬਤ ਕਰਨਾ ਚਾਹੁੰਦੀ ਹੈ। ਆਪਣੇ ਕਿਰਦਾਰ ਬਾਰੇ ਗੱਲ ਕਰਦਿਆਂ ਹਿਮਾਂਸ਼ੀ ਦੱਸਦੀ ਹੈ ਕਿ ਉਹ ਇੱਕ ਸਥਾਪਿਤ ਵਕੀਲ ਵਿਰੁੱਧ ਲੜਾਈ ਲੜਨ ਦੀ ਚੁਣੌਤੀ ਸਵੀਕਾਰ ਕਰਦੀ ਹੈ।
ਪੰਜਾਬ ਦੀ ‘ਐਸ਼ਵਰਿਆ ਰਾਏ’ ਵਜੋਂ ਜਾਣੀ ਜਾਂਦੀ ਇਹ ਮਾਡਲ-ਅਦਾਕਾਰਾ-ਗਾਇਕਾ ਕਲਾਕਾਰ ਵਜੋਂ ਆਪਣੇ ਸਫ਼ਰ ਦੌਰਾਨ ਆਉਣ ਵਾਲੀਆਂ ਭਾਵਨਾਤਮਕ ਚੁਣੌਤੀਆਂ ਬਾਰੇ ਖੁੱਲ੍ਹ ਕੇ ਗੱਲ ਕਰਦੀ ਰਹੀ ਹੈ।
ਉਨ੍ਹਾਂ ਨੇ ਆਪਣੀ ਸਿਹਤ, ਮਾਨਸਿਕ ਤਣਾਅ ਅਤੇ ਉਦਯੋਗ ਵਿੱਚ ਦਿਖਣ ਦੇ ਦਬਾਅ ਬਾਰੇ ਖੁੱਲ੍ਹ ਕੇ ਗੱਲ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਲਈ ਇਹ ਸਫ਼ਰ ਔਖਾ ਸੀ। 'ਹਾਈ ਸਟੈਂਡਰਡ' ਗੀਤ ਦੀ ਗਾਇਕਾ ਨੇ ਲਗਪਗ 20 ਕਿਲੋ ਭਾਰ ਘਟਾਇਆ ਹੈ ਅਤੇ ਇਸ ਦਾ ਸਿਹਰਾ ਉਹ ਆਪਣੀ ਮਾਨਸਿਕ ਮਜ਼ਬੂਤੀ ਨੂੰ ਦਿੰਦੀ ਹੈ। ਉਨ੍ਹਾਂ ਕਿਹਾ ਕਿ ਸਰੀਰਕ ਜਾਂ ਭਾਵਨਾਤਮਕ ਸਿਹਤ ਮਨ ਤੋਂ ਸ਼ੁਰੂ ਹੁੰਦੀ ਹੈ ਅਤੇ ਉਨ੍ਹਾਂ ਨੇ ਇਸ ਲਈ ਹੌਲੀ-ਹੌਲੀ ਤਿਆਰੀ ਕੀਤੀ ਜਿਸ ਨੂੰ ਲਗਪਗ ਤਿੰਨ ਸਾਲ ਲੱਗੇ।
ਉਨ੍ਹਾਂ ਕਿਹਾ ਕਿ ਇੱਕ ਕਲਾਕਾਰ ਨੂੰ ਵਾਰ-ਵਾਰ ਰੋਣਾ, ਗੁੱਸਾ ਜਾਂ ਖ਼ੁਸ਼ੀ ਦਿਖਾਉਣੀ ਪੈਂਦੀ ਹੈ ਅਤੇ ਫਿਰ ਸੀਨ ਖ਼ਤਮ ਹੋਣ ਤੋਂ ਬਾਅਦ ਉਸ ਭਾਵਨਾ ਵਿੱਚੋਂ ਬਾਹਰ ਆਉਣਾ ਪੈਂਦਾ ਹੈ। ਔਰਤਾਂ ਲਈ ਇਹ ਦਬਾਅ ਹੋਰ ਵੀ ਵੱਧ ਜਾਂਦਾ ਹੈ ਕਿਉਂਕਿ ਉਨ੍ਹਾਂ ਨੂੰ ਇੱਕੋ ਸਮੇਂ ਕਈ ਕੰਮ ਕਰਨ ਦੇ ਨਾਲ-ਨਾਲ ਆਪਣੀ ਦਿੱਖ, ਕਰੀਅਰ ਅਤੇ ਨਿੱਜੀ ਜੀਵਨ ਦਾ ਧਿਆਨ ਰੱਖਣਾ ਪੈਂਦਾ ਹੈ। ਹਿਮਾਂਸ਼ੀ ਕਹਿੰਦੀ ਹੈ ਕਿ ਉਹ ਅੱਜ ਜਿਸ ਮੁਕਾਮ ’ਤੇ ਹੈ, ਉਸ ਉੱਤੇ ਉਸ ਨੂੰ ਮਾਣ ਹੈ। ਬਚਪਨ ਦੇ ਦੁੱਖਾਂ ਅਤੇ ਸਿਹਤ ਸਬੰਧੀ ਮੁਸ਼ਕਿਲਾਂ ਨੂੰ ਪਾਰ ਕਰਨ ਤੋਂ ਬਾਅਦ ਹੁਣ ਉਨ੍ਹਾਂ ਵਿੱਚ ਇੱਕ ਨਵਾਂ ਆਤਮ-ਵਿਸ਼ਵਾਸ ਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਉਹ ਹੁਣ ਕਿਸੇ ਤੋਂ ਨਹੀਂ ਡਰਦੀ ਅਤੇ ਆਪਣੇ ਆਪ ਤੋਂ ਖ਼ੁਸ਼ ਹੈ।
ਮੁਸ਼ਕਿਲ ਸਮੇਂ ਵਿੱਚ ਤਾਕਤ ਬਾਰੇ ਪੁੱਛੇ ਜਾਣ ’ਤੇ ਉਨ੍ਹਾਂ ਦਾ ਜਵਾਬ ਸੀ—ਪ੍ਰਾਰਥਨਾ। ਉਨ੍ਹਾਂ ਕਿਹਾ ਕਿ ਜਦੋਂ ਉਹ ਖ਼ੁਦ ਰੱਬ ਅੱਗੇ ਅਰਦਾਸ ਕਰ ਸਕਦੀ ਹੈ ਤਾਂ ਹੋਰਾਂ ਨੂੰ ਕਿਉਂ ਪੁੱਛੇ।
ਇਹੀ ਹਿੰਮਤ ਉਨ੍ਹਾਂ ਦੇ ਕਿਰਦਾਰ ਵਿੱਚ ਵੀ ਨਜ਼ਰ ਆਉਂਦੀ ਹੈ, ਜੋ ਕਿਸੇ ਸਥਾਪਿਤ ਵਕੀਲ ਤੋਂ ਡਰਦੀ ਨਹੀਂ ਹੈ ਸਗੋਂ ਅਦਾਲਤ ਵਿੱਚ ਆਪਣੀ ਕਾਬਲੀਅਤ ਸਾਬਤ ਕਰਨਾ ਚਾਹੁੰਦੀ ਹੈ।
ਸੈੱਟ ’ਤੇ ਮਸਤੀ ਅਤੇ ਅੱਗੇ ਦੀਆਂ ਯੋਜਨਾਵਾਂ
ਕੋਰਟ ਰੂਮ ਤੋਂ ਬਾਹਰ, ਕਲਾਕਾਰਾਂ ਵਿਚਕਾਰ ਆਪਸੀ ਦੋਸਤੀ ਵੀ ਦੇਖਣ ਨੂੰ ਮਿਲੀ। ਨਵ ਬਾਜਵਾ ਨੇ ਦੱਸਿਆ ਕਿ ਹਿਮਾਂਸ਼ੀ ਸੈੱਟ ’ਤੇ ਮਾਹੌਲ ਨੂੰ ਜਿਉਂਦਾ-ਜਾਗਦਾ ਰੱਖਦੀ ਹੈ, ਜਦੋਂ ਕਿ ਹਿਮਾਂਸ਼ੀ ਨੇ ਯਾਦ ਕੀਤਾ ਕਿ ਉਹ ਕਾਸਟ ਅਤੇ ਕਰੂ ਨੂੰ ਕੈਂਡੀਜ਼ ਵੰਡਦੀ ਸੀ, ਜਿਸ ਨਾਲ ਡਾਈਟ ਦਾ ਧਿਆਨ ਰੱਖਣ ਵਾਲੇ ਲੋਕ ਕਈ ਵਾਰ ਮਸਤੀ ਵਿੱਚ ਪਰੇਸ਼ਾਨ ਵੀ ਹੁੰਦੇ ਸਨ।
ਨਵ ਬਾਜਵਾ ਲਈ ਇਸ ਸੀਰੀਜ਼ ਨੇ ਸੀਜ਼ਨ-2 ਜਾਂ ਕਿਸੇ ਹੋਰ ਭਾਗ ਦੀ ਸੰਭਾਵਨਾ ਦੇ ਦਰਵਾਜ਼ੇ ਵੀ ਖੋਲ੍ਹ ਦਿੱਤੇ ਹਨ। ਟ੍ਰੇਲਰ ਨੂੰ ਮਿਲੇ ਹੁੰਗਾਰੇ ਤੋਂ ਬਾਅਦ ਉਨ੍ਹਾਂ ਨੂੰ ਉਮੀਦ ਹੈ ਕਿ ਦਰਸ਼ਕ ਇਸ ਕਹਾਣੀ ਨੂੰ ਪਸੰਦ ਕਰਨਗੇ ਅਤੇ ਉਨ੍ਹਾਂ ਨੇ ਇਸਨੂੰ ਸਿਨੇਮਾਂਘਰਾਂ ਵਿੱਚ ਲਿਆਉਣ ਦਾ ਵੀ ਇਸ਼ਾਰਾ ਕੀਤਾ ਹੈ।
'ਐਡਵੋਕੇਟ ਚੌਹਾਨ' 27 ਅਗਸਤ ਨੂੰ ਚੌਪਾਲ (Chaupal) ਉੱਤੇ ਰਿਲੀਜ਼ ਹੋ ਰਹੀ ਹੈ।
