ਹਰਿਆਣਵੀ ਸੱਭਿਆਚਾਰ ਦੀ ਮਿੱਟੀ ਨਾਲ ਜੁੜੀ ਪ੍ਰੇਮ ਕਹਾਣੀ; ਫ਼ਿਲਮ ‘ਡਾਕਖਾਨਾ’ ਚੌਪਾਲ ’ਤੇ ਰਿਲੀਜ਼
ਸੋਨਮ ਮਲਿਕ ਨਾਲ ਨਿਭਾਈ ਮੁੱਖ ਭੂਮਿਕਾ
ਹਰਿਆਣਾ ਦੇ ਮਸ਼ਹੂਰ ਗਾਇਕ ਨਦੀ ਕੁੰਡੂ, ਜਿਨ੍ਹਾਂ ਨੇ ਆਪਣੀ ਆਵਾਜ਼ ਨਾਲ ਸਾਲਾਂ ਬੱਧੀ ਸਰੋਤਿਆਂ ਦੇ ਦਿਲਾਂ ’ਤੇ ਰਾਜ ਕੀਤਾ ਹੈ, ਹੁਣ ਪਰਦੇ ’ਤੇ ਅਦਾਕਾਰੀ ਦੇ ਜੌਹਰ ਦਿਖਾਉਣ ਲਈ ਤਿਆਰ ਹਨ। ਨਦੀ ਕੁੰਡੂ ਦੀ ਪਹਿਲੀ ਹਰਿਆਣਵੀ ਫ਼ਿਲਮ ‘ਡਾਕਖਾਨਾ’ (Daakkhana) OTT ਪਲੇਟਫਾਰਮ ‘ਚੌਪਾਲ’ ’ਤੇ ਰਿਲੀਜ਼ ਹੋ ਗਈ ਹੈ। ਇਹ ਫ਼ਿਲਮ ਉਸੇ ਤਰ੍ਹਾਂ ਦੀ ਨਿੱਘੀ ਅਤੇ ਪੇਂਡੂ ਜੀਵਨ ਦੀ ਊਰਜਾ ਨਾਲ ਭਰਪੂਰ ਹੈ, ਜਿਸ ਲਈ ਨਦੀ ਦੇ ਗੀਤ ਜਾਣੇ ਜਾਂਦੇ ਹਨ।
ਫ਼ਿਲਮ ਦੀ ਕਹਾਣੀ
ਫ਼ਿਲਮ ਦੀ ਕਹਾਣੀ ਹਰਿਆਣਾ ਦੇ ਦੋ ਗੁਆਂਢੀ ਪਿੰਡਾਂ ਅਤੇ ਉੱਥੇ ਸਥਿਤ ਇੱਕ ਡਾਕਖਾਨੇ ਦੇ ਆਲੇ-ਦੁਆਲੇ ਘੁੰਮਦੀ ਹੈ। ਸ਼ਹਿਰ ਦੀ ਰਹਿਣ ਵਾਲੀ ਅੰਜਲੀ (ਸੋਨਮ ਮਲਿਕ) ਪਿੰਡ ਵਿੱਚ ਪੋਸਟ ਆਫੀਸਰ ਵਜੋਂ ਆਉਂਦੀ ਹੈ, ਜਿਸ ਨਾਲ ਨਾ ਸਿਰਫ਼ ਪਿੰਡ ਦਾ ਮਾਹੌਲ ਬਦਲਦਾ ਹੈ, ਸਗੋਂ ਪਿੰਡ ਦੇ ਨੌਜਵਾਨ ਆਕਾਸ਼ (ਨਦੀ ਕੁੰਡੂ) ਦੀ ਜ਼ਿੰਦਗੀ ਵਿੱਚ ਵੀ ਨਵਾਂ ਮੋੜ ਆਉਂਦਾ ਹੈ। ਦੋਵਾਂ ਵਿਚਾਲੇ ਵਧਦੀ ਨੇੜਤਾ ਪਿੰਡ ਦੇ ਇੱਕ ਪ੍ਰਭਾਵਸ਼ਾਲੀ ਵਿਅਕਤੀ ‘ਚੀਨਾ’ ਨੂੰ ਰਾਸ ਨਹੀਂ ਆਉਂਦੀ। ਨਿੱਜੀ ਰੰਜਿਸ਼ ਤੋਂ ਸ਼ੁਰੂ ਹੋਈ ਇਹ ਕਹਾਣੀ ਹੌਲੀ-ਹੌਲੀ ਪਰਿਵਾਰਾਂ ਅਤੇ ਪੂਰੇ ਪਿੰਡ ਦੇ ਮਾਣ-ਸਨਮਾਨ ਦਾ ਮੁੱਦਾ ਬਣ ਜਾਂਦੀ ਹੈ।
ਅਦਾਕਾਰੀ ਅਤੇ ਨਿਰਮਾਣ
ਨਦੀ ਕੁੰਡੂ ਨੇ ਆਪਣੀ ਪਹਿਲੀ ਫ਼ਿਲਮ ਵਿੱਚ ਹੀ ਪ੍ਰਭਾਵਸ਼ਾਲੀ ਅਦਾਕਾਰੀ ਕੀਤੀ ਹੈ, ਜਦਕਿ ਸੋਨਮ ਮਲਿਕ ਨੇ ਆਪਣੀ ਅਦਾਕਾਰੀ ਨਾਲ ਅੰਜਲੀ ਦੇ ਕਿਰਦਾਰ ਵਿੱਚ ਤਾਜ਼ਗੀ ਭਰੀ ਹੈ। ਫ਼ਿਲਮ ਪਿੰਡਾਂ ਦੀਆਂ ਰਵਾਇਤਾਂ, ਮੁਕਾਬਲੇਬਾਜ਼ੀ ਅਤੇ ਰਿਸ਼ਤਿਆਂ ਦੀ ਗੁੰਝਲਦਾਰ ਤਾਣੀ-ਬਾਣੀ ਨੂੰ ਬਾਖ਼ੂਬੀ ਪੇਸ਼ ਕਰਦੀ ਹੈ। ਚੌਪਾਲ ਹਰਿਆਣਵੀ ਵੱਲੋਂ ਤਿਆਰ ਕੀਤੀ ਗਈ ਇਹ ‘ਓਰੀਜਨਲ ਫ਼ਿਲਮ’ ਹਰਿਆਣਵੀ ਸਿਨੇਮਾ ਨੂੰ ਇੱਕ ਨਵਾਂ ਮਿਆਰ ਦੇਣ ਦੀ ਕੋਸ਼ਿਸ਼ ਹੈ।
ਹਰਿਆਣਵੀ ਦਰਸ਼ਕਾਂ ਦੇ ਉਤਸ਼ਾਹ ਨੂੰ ਦੇਖਦੇ ਹੋਏ ‘ਚੌਪਾਲ’ ਨੇ ਇੱਕ ਖ਼ਾਸ ਪੇਸ਼ਕਸ਼ ਵੀ ਸ਼ੁਰੂ ਕੀਤੀ ਹੈ। ਦਰਸ਼ਕ ਮਹਿਜ਼ 1 ਰੁਪਏ ਵਿੱਚ 7 ਦਿਨਾਂ ਦਾ ‘ਫ੍ਰੀ ਟਰਾਇਲ’ ਲੈ ਕੇ ਇਸ ਫ਼ਿਲਮ ਦਾ ਆਨੰਦ ਮਾਣ ਸਕਦੇ ਹਨ। ‘ਡਾਕਖਾਨਾ’ ਸਿਰਫ਼ ਚੌਪਾਲ ਹਰਿਆਣਵੀ ’ਤੇ ਸਟ੍ਰੀਮ ਹੋ ਰਹੀ ਹੈ।
