ਗੁਰਦੀਪ ਸਿੰਘ ਲਾਲੀ
ਸੰਗਰੂਰ, 27 ਮਈ
ਜ਼ਿਲ੍ਹਾ ਪੁਲੀਸ ਨੇ ਭਵਾਨੀਗੜ੍ਹ ਵਿੱਚ ਆੜ੍ਹਤੀਏ ਦੀ ਦੁਕਾਨ ’ਚੋਂ 6 ਲੱਖ ਦੀ ਚੋਰੀ ਦੇ ਮਾਮਲੇ ਵਿੱਚ ਆੜ੍ਹਤੀ ਦੇ ਡਰਾਈਵਰ ਗਾਮਾ ਸਿੰਘ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਜ਼ਿਲ੍ਹਾ ਪੁਲੀਸ ਮੁਖੀ ਮਨਦੀਪ ਸਿੰਘ ਸਿੱਧੂ ਨੇ ਦੱਸਿਆ ਕਿ ਚੋਰੀ ਦੀ ਰਕਮ ਚੋਂ 3 ਲੱਖ 26 ਹਜ਼ਾਰ 800 ਰੁਪਏ ਬਰਾਮਦ ਕਰ ਲਏ ਹਨ। ਗਾਮਾ ਸਿੰਘ ਨੇ ਚੋਰੀ ਕੀਤੇ ਪੈਸੇ ਘਰ ਸਿਰਾਹਣੇ ਵਿਚ ਸਿਲਾਈ ਕਰਕੇ ਛੁਪਾ ਦਿੱਤੇ ਸਨ। ਵਾਪਸ ਦੁਕਾਨ ’ਤੇ ਪੁੱਜ ਕੇ ਚੋਰੀ ਦਾ ਰੌਲਾ ਪਾ ਦਿੱਤਾ। ਆੜ੍ਹਤੀ ਵਿਨੋਦ ਕੁਮਾਰ ਨੇ ਚੋਰੀ ਹੋਈ ਰਕਮ 6 ਲੱਖ ਦੱਸੀ ਸੀ ਪਰ ਮੁਲਜ਼ਮ ਨੇ ਚੋਰੀ ਦੀ ਰਕਮ 3 ਲੱਖ 37 ਹਜ਼ਾਰ ਦੱਸੀ ਹੈ। ਬਾਅਦ ਵਿੱਚ ਆੜ੍ਹਤੀ ਨੇ ਆਪਣੀ ਗਲਤੀ ਮੰਨੀ ਹੈ ਕਿ 6 ਲੱਖ ਗਲਤੀ ਨਾਲ ਦੱਸੇ ਗਏ ਸੀ।