ਪਹਿਲੇ ਪਾਣੀ ਦਾ ਦਬਾਅ ਨਾ ਝੱਲ ਸਕਿਆ ਰਜਵਾਹਾ
ਸੁਲਤਾਨਪੁਰ ਬਧਰਾਵਾਂ ਨੇੜੇ ਰਜਵਾਹਾ ਟੁੱਟਣ ਕਾਰਨ ਸਬਜ਼ੀ ਤੇ ਝੋਨੇ ਦੀ ਫ਼ਸਲ ਡੁੱਬੀ
ਜ਼ਿਲ੍ਹਾ ਮਾਲੇਰਕੋਟਲਾ ਦੇ ਖੇਤਾਂ ਨੂੰ ਨਹਿਰੀ ਪਾਣੀ ਮੁਹੱਈਆ ਕਰਵਾਉਣ ਲਈ ਹਾਲੇ ਪਿਛਲੇ ਵਰ੍ਹੇ ਹੀ ਉਸਾਰਿਆ ਰੋਹੀੜਾ ਮਾਈਨਰ ਰਜਵਾਹਾ ਅੱਜ ਪਹਿਲੀ ਵਾਰ ਛੱਡੇ ਪਾਣੀ ਦਾ ਦਬਾਅ ਨਾ ਝੱਲ ਸਕਿਆ। ਪਾਣੀ ਛੱਡਣ ਮਗਰੋਂ ਪਿੰਡ ਸੁਲਤਾਨਪੁਰ ਬਧਰਾਵਾਂ ਨੇੜੇ ਰਜਵਾਹੇ ਵਿੱਚ ਪਏ ਪਾੜ ਕਾਰਨ ਆਲੇ-ਦੁਆਲੇ ਖੇਤਾਂ ਦੀ ਸੈਂਕੜੇ ਵਿੱਘੇ ਸਬਜ਼ੀ ਅਤੇ ਝੋਨੇ ਦੀ ਫ਼ਸਲ ਪਾਣੀ ਵਿੱਚ ਡੁੱਬ ਗਈ।
ਪੰਜਾਬ ਸਰਕਾਰ ਵੱਲੋਂ ਜ਼ਿਲ੍ਹੇ ਦੇ ਖੇਤਾਂ ਨੂੰ ਪਹਿਲੀ ਵਾਰ ਨਹਿਰੀ ਪਾਣੀ ਮੁਹੱਈਆ ਕਰਵਾਉਣ ਦੇ ਇਸ ਪ੍ਰਾਜੈਕਟ ਨੂੰ ਖੂਬ ਪ੍ਰਚਾਰਿਆ ਗਿਆ ਹੈ। ਨਹਿਰੀ ਵਿਭਾਗ ਨੇ ਅੱਜ ਸਵੱਖਤੇ ਰਜਵਾਹੇ ਵਿੱਚ ਪਹਿਲੀ ਵਾਰ ਪਾਣੀ ਛੱਡਿਆ ਸੀ। ਰਾਤੀਂ ਮੀਂਹ ਹੋਣ ਕਰ ਕੇ ਬਹੁਤੇ ਕਿਸਾਨਾਂ ਨੇ ਖੇਤਾਂ ਦੇ ਮੋਘੇ ਬੰਦ ਕੀਤੇ ਹੋਏ ਸਨ। ਬਧਰਾਵਾਂ-ਸੇਖੂਪੁਰਾ ਸੜਕ ’ਤੇ ਬਣੇ ਪੁਲ ਤੋਂ ਥੋੜੀ ਦੂਰ ਅਚਾਨਕ ਰਜਵਾਹੇ ’ਚ ਪਾੜ ਪੈ ਗਿਆ। ਕਿਸਾਨਾਂ ਮੁਤਾਬਕ ਕੰਕਰੀਟ ਦੇ ਬਣਾਏ ਰਜਵਾਹੇ ਦਾ ਤਲ ਦਬ ਗਿਆ ਅਤੇ ਪਾਣੀ ਆਲੇ-ਦੁਆਲੇ ਖੇਤਾਂ ਵਿੱਚ ਫੈਲ ਗਿਆ।
ਲੋਕਾਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਜਗੇੜਾ ਨਹਿਰੀ ਪੁਲ ਸਥਿਤ ਨਹਿਰੀ ਵਿਭਾਗ ਦੇ ਸਬੰਧਿਤ ਮੁਲਾਜ਼ਮ ਨੂੰ ਪਾੜ ਪੈਣ ਦੀ ਸੂਚਨਾ ਦਿੰਦਿਆਂ ਪਾਣੀ ਬੰਦ ਕਰਨ ਦੀਆਂ ਲਗਾਤਾਰ ਬੇਨਤੀਆਂ ਕੀਤੀਆਂ ਪਰ ਉਸ ਨੇ ਫੋਨ ’ਤੇ ਦੋ ਮਿੰਟ ’ਚ ਪਾਣੀ ਬੰਦ ਕਰਨ ਦਾ ਭਰੋਸਾ ਦੇਣ ਦੇ ਬਾਵਜੂਦ ਸਪਲਾਈ ਬੰਦ ਨਹੀਂ ਕੀਤੀ।
ਪਾਣੀ ਦੇ ਲਗਾਤਾਰ ਵਧਦੇ ਵਹਾਅ ਤੋਂ ਡਰੇ ਕਿਸਾਨਾਂ ਨੇ ਜਦੋਂ ਦੋ ਨੌਜਵਾਨਾਂ ਨੂੰ ਪੰਦਰਾਂ ਕਿਲੋਮੀਟਰ ਦੂਰ ਜਗੇੜਾ ਭੇਜਿਆ ਤਾਂ ਪਤਾ ਲੱਗਿਆ ਕਿ ਸਬੰਧਿਤ ਮੁਲਾਜਮ ਤਾਂ ਡਿਊਟੀ ’ਤੇ ਮੌਜੂਦ ਹੀ ਨਹੀਂ ਸੀ।
ਵਾਰ-ਵਾਰ ਫੋਨ ਕਰਨ ’ਤੇ ਕਾਫੀ ਸਮੇਂ ਪਿਛੋਂ ਉਹ ਡਿਊਟੀ ਸਥਾਨ ’ਤੇ ਪਹੁੰਚਿਆ ਅਤੇ ਨੌਜਵਾਨਾਂ ਨੇ ਖ਼ੁਦ ਪਾਣੀ ਬੰਦ ਕੀਤਾ। ਪਿੰਡ ਵਾਸੀਆਂ ਨੇ ਦੋਸ਼ ਲਾਇਆ ਕਿ ਰਜਵਾਹੇ ਦੀ ਉਸਾਰੀ ਵੇਲੇ ਸਬੰਧਤ ਠੇਕੇਦਾਰ ਵੱਲੋਂ ਬਿਨਾਂ ਲੈਂਟਰ ਲਾਇਆ ਮਿੱਟੀ ਪਾ ਕੇ ਰਜਵਾਹੇ ਹੇਠ ਦੱਬੇ ਸੀਮਿੰਟ ਦੇ ਸਾਈਫਨ ਪਾਈਪ ਦਬਣ ਕਰ ਕੇ ਪਾੜ ਪਿਆ ਹੈ।
