ਕਵੀਸ਼ਰੀ ਦਰਬਾਰ ਅਤੇ ਸਨਮਾਨ ਸਮਾਗਮ ਯਾਦਗਾਰੀ ਹੋ ਨਿੱਬੜਿਆ

ਕਵੀਸ਼ਰ ਭਵਿੱਖ ਸੁਧਾਰ ਬਾਹਮਣ ਸਭਾ ਮੌੜਾਂ ਵੱਲੋਂ ਵੈਦ ਸ਼ਿਵ ਕੁਮਾਰ ਦੇ ਮਾਪਿਆਂ ਦੀ ਯਾਦ ਵਿੱਚ ਸਿਧਾਣਾ ਕੁਟੀਆ ਮੌੜਾਂ ਵਿੱਚ ਕਵੀਸ਼ਰੀ ਦਰਬਾਰ ਅਤੇ ਸਨਮਾਨ ਸਮਾਗਮ ਕਰਵਾਇਆ ਗਿਆ ਜਿਸ ਵਿੱਚ 14 ਕਵੀਸ਼ਰੀ ਜਥਿਆਂ ਨੇ ਹਿੱਸਾ ਲਿਆ। ਇਸ ਮੌਕੇ ਕਵੀਸ਼ਰੀ ਕੋਰੜਾ ਛੰਦ ਮੁਕਾਬਲੇ...

Ranjeet Singh Sheetal

ਦਿੜ੍ਹਬਾ ਮੰਡੀ, 05:35 AM Mar 30, 2026 IST

ਕਵੀਸ਼ਰ ਓਮਕਾਰ ਮਾਝੀ ਦਾ ਸਨਮਾਨ ਕਰਨ ਮੌਕੇ ਪ੍ਰਬੰਧਕ ਅਤੇ ਮੁੱਖ ਮਹਿਮਾਨ।

ਕਵੀਸ਼ਰ ਭਵਿੱਖ ਸੁਧਾਰ ਬਾਹਮਣ ਸਭਾ ਮੌੜਾਂ ਵੱਲੋਂ ਵੈਦ ਸ਼ਿਵ ਕੁਮਾਰ ਦੇ ਮਾਪਿਆਂ ਦੀ ਯਾਦ ਵਿੱਚ ਸਿਧਾਣਾ ਕੁਟੀਆ ਮੌੜਾਂ ਵਿੱਚ ਕਵੀਸ਼ਰੀ ਦਰਬਾਰ ਅਤੇ ਸਨਮਾਨ ਸਮਾਗਮ ਕਰਵਾਇਆ ਗਿਆ ਜਿਸ ਵਿੱਚ 14 ਕਵੀਸ਼ਰੀ ਜਥਿਆਂ ਨੇ ਹਿੱਸਾ ਲਿਆ। ਇਸ ਮੌਕੇ ਕਵੀਸ਼ਰੀ ਕੋਰੜਾ ਛੰਦ ਮੁਕਾਬਲੇ ਵਿੱਚ ਓਮਕਾਰ ਮਾਝੀ ਦੇ ਜਥੇ ਨੇ ਪਹਿਲਾ ਸਥਾਨ ਹਾਸਲ ਕੀਤਾ ਜਿਨ੍ਹਾਂ ਨੂੰ 51 ਹਜ਼ਾਰ ਰੁਪਏ ਅਤੇ ਟਰਾਫੀ ਨਾਲ ਸਨਮਾਨਿਤ ਕੀਤਾ। ਜਦਕਿ 11 ਹੋਰ ਵੱਖ-ਵੱਖ ਕਵੀਸ਼ਰ ਜਥਿਆਂ ਨੂੰ ਪ੍ਰਤੀ ਜਥਾ ਗਿਆਰਾਂ ਹਜ਼ਾਰ ਰੁਪਏ ਅਤੇ ਸਨਮਾਨ ਚਿੰਨ੍ਹ ਦੇ ਕੇ ਸਨਮਾਨਿਆ ਗਿਆ। ਕਵੀਸ਼ਰੀ ਭੀਮ ਮੌੜਾਂ ਨੇ ਦੱਸਿਆ ਕਿ ਵੈਦ ਸ਼ਿਵ ਕੁਮਾਰ ਹਰ ਸਾਲ ਆਪਣੀ ਮਾਤਾ ਨਿਰਮਲਾ ਦੇਵੀ ਅਤੇ ਪਿਤਾ ਕੁਲਵੰਤ ਰਾਏ ਦੀ ਯਾਦ ਨੂੰ ਸਮਰਪਿਤ ਕਵੀਸ਼ਰੀ ਦਰਬਾਰ ਕਰਵਾਉਂਦੇ ਹਨ ਜਿਸ ਵਿੱਚ ਪੰਜਾਬ ਭਰ ਦੇ ਉੱਘੇ ਕਵੀਸ਼ਰੀ ਜਥੇ ਹਿੱਸਾ ਲੈਂਦੇ ਹਨ ਅਤੇ ਇਹ ਤੀਜਾ ਕਵੀਸ਼ਰੀ ਦਰਬਾਰ ਹੈ। ਇਸ ਦੌਰਾਨ ਜੱਜਮੈਂਟ ਦੀ ਭੂਮਿਕਾ ਸਾਬਕਾ ਪ੍ਰਿੰਸੀਪਲ ਸੁਖਬੀਰ ਸਿੰਘ ਉੱਭਾਵਾਲ, ਦਰਬਾਰ ਸਿੰਘ ਚੱਠਾ, ਰਣਜੀਤ ਸਿੰਘ ਕੋਠਾ ਗੁਰੂਕੇ, ਪ੍ਰਿੰਸੀਪਲ ਭੁਪਿੰਦਰਪਾਲ ਰਿਸ਼ੀ, ਲੈਕਚਰਾਰ ਹਰਦਿਆਲ ਸਿੰਘ ਥੂਹੀ, ਡਾ. ਮੀਤ ਖੱਟੜਾ, ਡਾ. ਜਸਵਿੰਦਰ ਸਿੰਘ ਸ਼ਰਮਾ, ਲੇਖਕ ਪ੍ਰੇਮ ਚੰਦ ਮੌੜਾਂ ਵੱਲੋਂ ਕੀਤੀ ਗਈ ਜਿਨ੍ਹਾਂ ਨੂੰ ਟਰਾਫੀ ਤੇ ਦੇਸੀ ਘਿਓ ਨਾਲ ਸਨਮਾਨਿਤ ਕੀਤਾ ਗਿਆ। ਸਮਾਗਮ ਵਿੱਚ ਮੁੱਖ ਮਹਿਮਾਨ ਵਜੋਂ ਲੋਕ ਗਾਇਕ ਪੰਮੀ ਬਾਈ ਨੇ ਸ਼ਿਰਕਤ ਕਰਦਿਆਂ ਵੈਦ ਸ਼ਿਵ ਕੁਮਾਰ ਦੇ ਉਪਰਾਲੇ ਦੀ ਸ਼ਲਾਘਾ ਕੀਤੀ। ਸਮਾਗਮ ਦੇ ਸੰਚਾਲਕ ਵੈਦ ਸ਼ਿਵ ਕੁਮਾਰ ਨੇ ਸੰਬੋਧਨ ਕਵੀਸ਼ਰੀ ਦਰਬਾਰ ਵਿੱਚ ਸ਼ਾਮਲ ਹੋਏ ਮੁੱਖ ਮਹਿਮਾਨਾਂ ਤੇ ਜਥਿਆਂ ਦਾ ਧੰਨਵਾਦ ਕੀਤਾ। ਮੰਚ ਸੰਚਾਲਨ ਹਰਭਗਵਾਨ ਸ਼ਰਮਾ ਨੇ ਕੀਤਾ।