Nabha ਵਿੱਚ ਲੁਟੇਰਿਆਂ ਨੇ ਨੌਜਵਾਨ ਦਾ ਗੁੱਟ ਵੱਢਿਆ
ਮੋਬਾਈਲ ਤੇ ਨਗ਼ਦੀ ਖੋਹ ਕੇ ਲੈ ਗਏ; ਪੁਲੀਸ ਨੇ ਕੇਸ ਦਰਜ ਕਰ ਕੇ ਕਾਰਵਾਈ ਆਰੰਭੀ
ਨਾਭਾ ਵਿਚ 19 ਸਾਲਾ ਨੌਜਵਾਨ ਨੂੰ ਸਿਵਲ ਹਸਪਤਾਲ ਲਿਆਂਦਾ ਗਿਆ ਜਿਸ ਦਾ ਗੁੱਟ ਵੱਢਿਆ ਹੋਇਆ ਸੀ। ਇਸ ਨੌਜਵਾਨ ਦੀ ਪਛਾਣ ਸੁਜਲ ਵਜੋਂ ਹੋਈ ਹੈ ਜਿਸ ਅਨੁਸਾਰ ਕੁਝ ਲੁਟੇਰਿਆਂ ਨੇ ਤੇਜ਼ਧਾਰ ਹਥਿਆਰਾਂ ਨਾਲ ਉਸ ਦੀ ਕੁੱਟਮਾਰ ਕੀਤੀ। ਡਾਕਟਰਾਂ ਵੱਲੋਂ ਉਸ ਨੂੰ ਮੁਢਲੀ ਸਹਾਇਤਾ ਦੇ ਕੇ ਪਟਿਆਲਾ ਰੈਫਰ ਕਰ ਦਿੱਤਾ ਗਿਆ ਤਾਂ ਕਿ ਸਮੇ ਸਿਰ ਇਲਾਜ ਮਿਲਣ 'ਤੇ ਉਸ ਦੀ ਬਾਂਹ ਵਾਪਸ ਜੋੜੀ ਜਾ ਸਕੇ। ਡਾਕਟਰਾਂ ਨੇ ਦੱਸਿਆ ਕਿ ਉਸ ਦੀ ਦੂਜੀ ਬਾਂਹ ਦੀ ਹੱਡੀ ਵੀ ਟੁੱਟੀ ਹੋਈ ਸੀ ਅਤੇ ਸਿਰ ਵਿਚ ਵੀ ਡੂੰਘੀ ਸੱਟ ਸੀ।
ਸੁਜਲ ਨੇ ਦੱਸਿਆ ਕਿ ਉਹ ਆਪਣੇ ਦੋਸਤ ਨਾਲ ਪੁਰਾਣੇ ਕਿਲੇ ਕੋਲੋਂ ਮੋਟਰਸਾਈਕਲ 'ਤੇ ਜਾ ਰਿਹਾ ਸੀ ਕਿ ਮੁੰਡਿਆਂ ਦੇ ਇੱਕ ਗਰੋਹ ਨੇ ਉਹਨਾਂ ਨੂੰ ਘੇਰ ਲਿਆ। ਉਨ੍ਹਾਂ ਮੋਬਾਈਲ ਮੰਗਿਆ ਤੇ ਨਾ ਦੇਣ 'ਤੇ ਉਹਨਾਂ ਨੇ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ। ਸੁਜਲ ਮੁਤਾਬਕ ਉਸ ਦੇ ਦੋਸਤ ਕੋਲ ਤਕਰੀਬਨ 4000 ਨਗਦ ਖੋਹ ਲਏ ਗਏ। ਜ਼ਿਕਰਯੋਗ ਹੈ ਕਿ ਪੀੜਤ ਵੱਲੋਂ ਘਟਨਾ ਦੀ ਜਿਹੜੀ ਥਾਂ ਦੱਸੀ ਜਾ ਰਹੀ ਹੈ, ਉਹ ਨਾਭਾ ਕੋਤਵਾਲੀ ਤੋਂ ਦੂਰ ਨਹੀਂ ਹੈ।
ਨਾਭਾ ਕੋਤਵਾਲੀ ਦੇ ਮੁਖੀ ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਲੜਾਈ ਦੀ ਘਟਨਾ ਦੀ ਇਤਲਾਹ ਅੱਜ ਪਟਿਆਲਾ ਦੇ ਇੱਕ ਨਿੱਜੀ ਹਸਪਤਾਲ ਤੋਂ ਮਿਲੀ ਹੈ ਅਤੇ ਏਐਸਆਈ ਚਮਕੌਰ ਸਿੰਘ ਨੂੰ ਪਟਿਆਲਾ ਭੇਜ ਦਿੱਤਾ ਗਿਆ ਹੈ। ਇਸ ਮਾਮਲੇ ਵਿਚ ਕੇਸ ਦਰਜ ਕਰਕੇ ਮੁਲਜ਼ਮਾਂ ਨੂੰ ਜਲਦ ਕਾਬੂ ਕਰ ਲਿਆ ਜਾਵੇਗਾ।
