ਪੈਨਸ਼ਨ ਨੂੰ ਤਰਸਦੇ ਬਾਬੇ ਸੜਕ ’ਤੇ ਨਿਤਰੇ

ਪੈਨਸ਼ਨ ਨਾ ਮਿਲਣ ਦੇ ਰੋਸ ਵਜੋਂ ਪੀ ਆਰ ਟੀ ਸੀ ਦੇ ਪੈਨਸ਼ਨਰਾਂ ਨੇ ਚੇਅਰਮੈਨ ਮੁਕੰਦ ਸਿੰਘ ਅਤੇ ਸੂਬਾਈ ਪ੍ਰਧਾਨ ਭਗਵੰਤ ਸਿੰਘ ਕੰਗਣਵਾਲ ਦੀ ਅਗਵਾਈ ਹੇਠ ਅੱਜ ਇਥੇ ਪੁਰਾਣਾ ਬੱਸ ਅੱਡਾ ਵਿੱਚ ਸੱਦੀ ਮੀਟਿੰਗ ਦੌਰਾਨ ਸਰਕਾਰ ਤੇ ਮੈਨੇਜਮੈਂਟ ਖਿਲਾਫ਼ ਧਰਨਾ ਸ਼ੁਰੂ ਕਰ ਦਿੱਤਾ। ਇਸ ਮਗਰੋਂ ਉਹ ਰੋਸ ਮਾਰਚ ਕਰਦੇ ਹੋਏ ਬੱਤੀਆਂ ਵਾਲ਼ੇ ਚੌਕ ਤੱਕ ਅੱਪੜ ਗਏ ਤੇ ਧਰਨਾ ਮਾਰ ਕੇ ਆਵਾਜਾਈ ਠੱਪ ਕਰ ਦਿੱਤੀ। ਮੈਨੇਜਮੈਂਟ ਅਤੇ ਪੰਜਾਬ ਸਰਕਾਰ ਦਾ ਖੂਬ ਪਿੱਟ ਸਿਆਪਾ ਕਰਦਿਆਂ ਉਨ੍ਹਾਂ ਤਨਖਾਹਦਾਰ ਬੀਬੀਆਂ ਦੀ ਮੁਫ਼ਤ ਸਫ਼ਰ ਸਹੂਲਤ ਬੰਦ ਕਰਨ ਅਤੇ ਕੱਚੇ ਕਾਮੇ ਪੱਕੇ ਕਰਨ ਸਮੇਤ ਕੇਸ ਵਾਪਸ ਲੈਣ ਦੀ ਮੰਗ ਕੀਤੀ।

ਸ੍ਰੀ ਕੰਗਣਵਾਲ ਤੇ ਸਕੱਤਰ ਜਨਰਲ ਹਰੀ ਸਿੰਘ ਚਮਕ ਨੇ ਕਿਹਾ ਕਿ ਕਈ ਕੁਰਬਾਨੀਆਂ ਮਗਰੋਂ ਉਨ੍ਹਾਂ ਨੇ ਅਦਾਰੇ ਵਿੱਚ ਪੈਨਸ਼ਨ ਲਾਗੂ ਕਰਵਾਈ, ਪਰ ਅੱਜ ਬੁਢਾਪੇ ’ਚ ਪੁੱਜਣ ’ਤੇ ਉਨ੍ਹਾਂ ਨੂੰ ਹੀ ਪੈਨਸ਼ਨ ਤੋਂ ਵਾਂਝਾ ਕੀਤਾ ਜਾ ਰਿਹਾ ਹੈ। ਹਰੀ ਸਿੰਘ ਚਮਕ ਨੇ ਕਿਹਾ ਕਿ ਮੈਡੀਕਲ ਬਿੱਲਾਂ ਤੇ 2016 ਪੇਅ ਕਮਿਸ਼ਨ ਦੇ ਬਕਾਏ ਨਹੀਂ ਦਿੱਤੇ ਜਾ ਰਹੇ। ਕਿਲੋਮੀਟਰ ਸਕੀਮ ਬੱਸਾਂ ਨਿਜੀਕਰਨ ਵੱਲ ਕਦਮ ਵਧਾਉਣ ਦੀ ਨੀਤੀ ਹੈ। ਉਨ੍ਹਾਂ ਤਨਖਾਹ ਲੈਣ ਵਾਲੀਆਂ ਔਰਤਾਂ ਦੀ ਮੁਫ਼ਤ ਸਫ਼ਰ ਸਹੂਲਤ ਬੰਦ ਕਰਨ ’ਤੇ ਜ਼ੋਰ ਦਿੰਦਿਆਂ ਕੱਚੇ ਕਾਮੇ ਪੱਕੇ ਕਰਨ ਸਮੇਤ ਕੇਸ ਵਾਪਿਸ ਲੈਣ ਦੀ ਮੰਗ ਕੀਤੀ। ਇੱਕ ਪੈਨਸ਼ਨਰ ਨੇ ਕਿਹਾ ਕਿ ਪੈਨਸ਼ਨ ਨਾ ਮਿਲਣ ਕਰਕੇ ਉਨ੍ਹਾਂ ਦੇ ਭੁੱਖੇ ਮਰਨ ਦੀ ਨੌਬਤ ਆਈ ਹੋਈ ਹੈ। ਇੱਕ ਬਜ਼ੁਰਗ ਪੈਨਸ਼ਨਰ ਦੀ ਹਾਲਤ ਵਿਗੜਨ ਕਰਕੇ ਡਾਕਟਰ ਕੋਲ ਪਹੁੰਚਾਉਣਾ ਪਿਆ। ਇਸ ਧਰਨੇ ਨੂੰ ਜਲੌਰ ਫਰੀਦਕੋਟ ਡਿਪੂ, ਜਨਕਰਾਜ ਬਰਨਾਲਾ, ਗੁਰਮੀਤ ਕਪੂਰਥਲਾ, ਬਲਵੰਤ ਸੰਗਰੂਰ, ਸੁਖਦੇਵ ਬੁਢਲਾਡਾ, ਭਜਨ ਚੰਡੀਗੜ੍ਹ, ਜੋਗਿੰਦਰ ਪਟਿਆਲਾ ਅਤੇ ਹਰਦੇਵ ਲੁਧਿਆਣਾ ਨੇ ਵੀ ਸੰਬੋਧਨ ਕੀਤਾ।