ਯੂਨੀਵਰਸਿਟੀ ਵਿੱਚ ਕੌਮਾਂਤਰੀ ਕਵੀ ਬੰਨ੍ਹਣਗੇ ਰੰਗ

ਇਥੇ ਆਗਾਮੀ 2 ਅਤੇ 3 ਦਸੰਬਰ ਨੂੰ ਪੰਜਾਬੀ ਵਿਭਾਗ ਅਤੇ ਐਜੂਕੇਸ਼ਨਲ ਮਲਟੀਮੀਡੀਆ ਰਿਸਰਚ ਸੈਂਟਰ ਦੇ ਸਹਿਯੋਗ ਨਾਲ ਸੰਗਤ ਪੰਜਾਬ ਅਤੇ ਚੇਅਰ ਪੋਇਟਰੀ ਈਵਨਿੰਗਜ਼ ਕੋਲਕਾਤਾ ਵੱਲੋਂ ਦੂਜਾ ‘ਚੇਅਰ ਪੋਏਟਰੀ ਸੰਗਤ ਅੰਤਰਰਾਸ਼ਟਰੀ ਕਵਿਤਾ ਉਤਸਵ’ ਕਰਵਾਇਆ ਜਾ ਰਿਹਾ ਹੈ ਜਿਸ ਵਿੱਚ ਨਾਮਵਰ ਕੌਮਾਂਤਰੀ ਕਵੀ ਤੇ ਸ਼ਾਇਰ ਪੁੱੱਜਣਗੇ। ਇਹ ਜਾਣਕਾਰੀ ਪੰਜਾਬੀ ਵਿਭਾਗ ਦੇ ਮੁਖੀ ਡਾ. ਰਾਜਵੰਤ ਕੌਰ ਪੰਜਾਬੀ, ਈ ਐੱਮ ਆਰ ਸੀ ਡਾਇਰੈਕਟਰ ਦਲਜੀਤ ਅਮੀ, ਭਾਸ਼ਾ ਵਿਭਾਗ ਦੇ ਡਾਇਰੈਕਟਰ ਜਸਵੰਤ ਜ਼ਫ਼ਰ ਅਤੇ ਕਵਿਤਾ ਉਤਸਵ ਦੇ ਡਾਇਰੈਕਟਰ ਸਹਿਜਮੀਤ ਨੇ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਇਸ ਦੌਰਾਨ ਫ਼ਰਾਂਸ ਦੇ ਕਵੀ ਮੈਲੇਨੀ ਲੈਬਲਾਂ, ਨੀਦਰਲੈਂਡ ਤੋਂ ਕੀਰਾ ਵੁੱਕ, ਤਿੱਬਤ ਤੋਂ ਤੇਨਜ਼ਿੰਗ ਸੁੰਦੇਅ ਅਤੇ ਨੇਪਾਲ ਤੋਂ ਕੇਵਲ ਬਿਨਾਬੀ ਸ਼ਿਰਕਤ ਕਰਨਗੇ।

ਇਸੇ ਤਰ੍ਹਾਂ ਪਟਿਆਲਾ ਤੋਂ ਸੰਤੋਖ ਸਿੰਘ ਸੁੱਖੀ ਤੇ ਨਰਿੰਦਰਪਾਲ ਕੌਰ, ਲੁਧਿਆਣਾ ਤੋਂ ਮੁਕੇਸ਼ ਆਲਮ, ਫ਼ਿਰੋਜ਼ਪੁਰ ਤੋਂ ਗੁਰਤੇਜ ਕੋਹਾਰਵਾਲਾ, ਅੰਮ੍ਰਿਤਸਰ ਤੋਂ ਬਿਪਨਪ੍ਰੀਤ, ਅੰਬਰੀਸ਼ ਤੇ ਕਮਲਪ੍ਰੀਤ ਸਿੰਘ, ਮਾਨਸਾ ਤੋਂ ਗੁਰਪ੍ਰੀਤ, ਮੋਗਾ ਤੋਂ ਅਜੀਤਪਾਲ ਜਟਾਣਾ, ਆਨੰਦਪੁਰ ਸਾਹਿਬ ਤੋਂ ਅਨੂ ਬਾਲਾ, ਬਠਿੰਡਾ ਤੋਂ ਨੀਤੂ, ਚੰਡੀਗੜ੍ਹ ਤੋਂ ਰਮਨ ਸੰਧੂ ਅਤੇ ਮਲੋਟ ਤੋਂ ਸੁਖਦੇਵ ਮਠਾੜੂ ਅਤੇ ਹਰਿਆਣਾ ਦੇ ਅੰਬਾਲਾ ਤੋਂ ਪਾਲ ਕੌਰ ਸ਼ਾਮਲ ਹੋਣਗੇ। ਬੀਰਦਵਿੰਦਰ ਸਿੰਘ ਨੇ ਦੱਸਿਆ ਕਿ ਸਾਰੇ ਕਵੀ ਆਪੋ ਆਪਣੀ ਮਾਂ ਬੋਲੀ ਰਚਨਾਵਾਂ ਪੇਸ਼ ਕਰਨਗੇ ਪਰ ਨਾਲ ਇਨ੍ਹਾਂ ਰਚਨਾਵਾਂ ਦਾ ਪੰਜਾਬੀ ਤੇ ਅੰਗਰੇਜ਼ੀ ਦਾ ਤਰਜਮਾ ਵੀ ਪੇਸ਼ ਕੀਤਾ ਜਾਵੇਗਾ।