ਹਾੜ੍ਹ ਦੇ ਪਹਿਲੇ ਮੀਂਹ ਮਗਰੋਂ ਕਿਸਾਨਾਂ ਦੇ ਚਿਹਰੇ ਖਿੜੇ

ਹਾੜ੍ਹ ਮਹੀਨੇ ਦੇ ਮੀਂਹ ਨੇ ਤਪਦੇ ਖੇਤਾਂ ਦਾ ਸੀਨਾ ਠਾਰ ਦਿੱਤਾ ਹੈ ਅਤੇ ਲੋਕਾਂ ਨੂੰ ਵੀ ਅੰਤਾਂ ਦੀ ਗਰਮੀ ਤੋਂ ਰਾਹਤ ਮਿਲੀ ਹੈ। ਭਾਰੀ ਮੀਂਹ ਨਾਲ ਝੋਨੇ ਦੇ ਖੇਤ ਜਲਥਲ ਹੋ ਗਏ ਹਨ ਅਤੇ ਝੋਨੇ ਦੀ ਲਵਾਈ ਵਿੱਚ ਜੁਟੇ ਕਿਸਾਨ ਬਾਗੋ-ਬਾਗ ਹਨ।

ਦੂਜੇ ਪਾਸੇ ਸ਼ਹਿਰ ਵਿੱਚ ਹਾੜ੍ਹ ਮਹੀਨੇ ਦੇ ਪਹਿਲੇ ਮੀਂਹ ਨੇ ਹੀ ਸੀਵਰੇਜ ਦੀ ਪੋਲ ਖੋਲ੍ਹ ਕੇ ਰੱਖ ਦਿੱਤੀ ਹੈ, ਜਦੋਂ ਕਿ ਸਾਉਣ ਮਹੀਨੇ ਦੇ ਮੀਂਹ ਅਜੇ ਬਾਕੀ ਹਨ। ਜ਼ਿਲ੍ਹਾ ਸੰਗਰੂਰ ਵਿੱਚ ਔਸਤਨ ਕੁੱਲ 47.6 ਐੱਮ ਐੱਮ ਮੀਂਹ ਪਿਆ ਹੈ।

ਭਾਵੇਂ ਕਿ ਹਾੜ੍ਹ ਮਹੀਨੇ ’ਚ ਕਹਿਰ ਦੀ ਗਰਮੀ ਪੈ ਰਹੀ ਸੀ ਅਤੇ ਕਿਸਾਨਾਂ ਨੂੰ ਵੀ ਝੋਨੇ ਦੀ ਲਵਾਈ ਲਈ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ। ਜਿਹੜੇ ਖੇਤਾਂ ਵਿਚ ਝੋਨੇ ਦੀ ਲਵਾਈ ਹੋ ਚੁੱਕੀ ਹੈ, ਉਨ੍ਹਾਂ ਨੂੰ ਵੀ ਲੋੜੀਂਦਾ ਪਾਣੀ ਨਸੀਬ ਨਹੀਂ ਹੋ ਰਿਹਾ ਸੀ। ਗਰਮੀ ਦੇ ਮੱਦੇਨਜ਼ਰ ਵਧ ਰਹੇ ਤਾਪਮਾਨ ਕਾਰਨ ਬਿਜਲੀ ਦੀ ਮੰਗ ਪੂਰੇ ਸਿਖ਼ਰ ’ਤੇ ਪੁੱਜ ਗਈ ਸੀ, ਜਿਸ ਕਾਰਨ ਬਿਜਲੀ ਦੇ ਕੱਟ ਵੀ ਲੱਗ ਰਹੇ ਸਨ। ਬਿਜਲੀ ਕੱਟਾਂ ਖ਼ਿਲਾਫ਼ ਕਿਸਾਨ ਜਥੇਬੰਦੀਆਂ ਵੱਲੋਂ ਪਾਵਰਕੌਮ ਦੇ ਸਰਕਲ ਦਫ਼ਤਰਾਂ ਅੱਗੇ ਰੋਸ ਧਰਨੇ ਦਿੱਤੇ ਗਏ। ਪਾਣੀ ਤੋਂ ਵਾਂਝੇ ਝੋਨੇ ਦੇ ਖੇਤਾਂ ਕਾਰਨ ਕਿਸਾਨ ਫਿਕਰਮੰਦ ਸਨ ਪਰ ਬੀਤੀ ਰਾਤ ਦੇ ਮੀਂਹ ਮਗਰੋਂ ਕਿਸਾਨਾਂ ਦੇ ਚਿਹਰੇ ਖਿੜ ਗਏ ਹਨ। ਮੌਸਮ ਦਾ ਮਿਜ਼ਾਜ ਬਦਲਣ ਮਗਰੋਂ ਪਾਵਰਕੌਮ ਨੂੰ ਵੀ ਸੁੱਖ ਦਾ ਸਾਹ ਆਇਆ ਹੈ।

ਸ਼ਹਿਰ ਦੀਆਂ ਜਨਤਕ ਥਾਵਾਂ ’ਤੇ ਪਾਣੀ ਭਰਨ ਕਾਰਨ ਆਮ ਜਨਜੀਵਨ ਵੀ ਪ੍ਰਭਾਵਿਤ ਹੋਇਆ ਹੈ। ਸ਼ਹਿਰ ਦੇ ਧੂਰੀ ਗੇਟ ਬਾਜ਼ਾਰ ਨੂੰ ਜਾਂਦੀ ਸੜਕ ਜਲਥਲ ਹੋ ਗਈ, ਜਿਸ ’ਤੇ ਗੋਡੇ-ਗੋਡੇ ਪਾਣੀ ਭਰ ਗਿਆ। ਰਣਬੀਰ ਕਲੱਬ ਕੰਪਲੈਕਸ ਨੱਕੋ-ਨੱਕ ਭਰ ਗਿਆ। ਸਿਵਲ ਹਸਪਤਾਲ ਕੰਪਲੈਕਸ, ਐਸਡੀਐਮ ਕੰਪਲੈਕਸ ਦੀ ਅੰਦਰੂਨੀ ਸੜਕ ’ਤੇ ਵੀ ਪਾਣੀ ਭਰ ਗਿਆ। ਕਈ ਕਲੋਨੀਆਂ ਦੀਆਂ ਗਲੀਆਂ ਜਲਥਲ ਨਜ਼ਰ ਆਈਆਂ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਸੰਗਰੂਰ ਚ 34.2 ਐੱਮ ਐੱਮ, ਸੁਨਾਮ ਵਿੱਚ 64.0 ਐੱਮ ਐੱਮ, ਦਿੜਬਾ ਵਿੱਚ 68.0 ਐੱਮ ਐੱਮ, ਲਹਿਰਾ ਵਿੱਚ 35.0 ਐੱਮ ਐੱੱਮ, ਮੂਨਕ ਵਿਚ 62.0 ਐੱਮ ਐੱਮ ਅਤੇ ਧੂਰੀ ਵਿੱਚ 22.4 ਐੱਮ ਐੱਮ ਮੀਂਹ ਪਿਆ ਹੈ, ਜਿਸ ਅਨੁਸਾਰ ਜ਼ਿਲ੍ਹਾ ਸੰਗਰੂਰ ਵਿੱਚ ਔਸਤਨ ਕੁੱਲ 47.6 ਐੱਮ ਐੱਮ ਮੀਂਹ ਦਰਜ ਕੀਤਾ ਗਿਆ ਹੈ।