ਸ਼ੇਰਪੁਰ ਹਸਪਤਾਲ ਦੀਆਂ ਐਮਰਜੈਂਸੀ ਸੇਵਾਵਾਂ ਬਹਾਲ

ਸਵੇਰੇ ਤਕਰੀਬਨ 10 ਵਜੇ ਜਦੋਂ ਧਰਨੇ ਵਿੱਚ ਲੋਕਾਂ ਦੀ ਗਿਣਤੀ ਵਧਣ ਲੱਗੀ ਅਤੇ ਇਲਾਕੇ ਦੇ ਰਾਜਨੀਤਕ ਆਗੂਆਂ, ਵਪਾਰ ਮੰਡਲ ਦੇ ਕਾਰਕੁਨਾਂ, ਕਿਸਾਨ ਜਥੇਬੰਦੀਆਂ ਅਤੇ ਹੋਰ ਲੋਕਾਂ ਦੀ ਆਮਦ ਹੋਈ ਤਾਂ ਸ਼ੇਰਪੁਰ ਦੇ ਆਲੇ-ਦੁਆਲੇ ਵਾਲੇ ਰਸਤੇ ਜਾਮ ਕਰ ਦਿੱਤੇ ਗਏ। ਨਸ਼ਾ ਰੋਕੂ ਕਮੇਟੀ ਦੇ ਬਲਵਿੰਦਰ ਸਿੰਘ ਬਿੰਦਾ ਨੇ ਕਿਹਾ ਕਿ ਪਹਿਲਾਂ ਵੀ ਇੱਥੇ ਲੰਬੀ ਲੜਾਈ ਲੜ ਕੇ ਡਾਕਟਰ ਤੇ ਹੋਰ ਸਿਹਤ ਕਰਮਚਾਰੀਆਂ ਦੀਆਂ ਖਾਲੀ ਅਸਾਮੀਆਂ ਭਰਵਾ ਕੇ ਐਮਰਜੈਂਸੀ ਸੇਵਾਵਾਂ ਚਲਾਈਆਂ ਗਈਆਂ ਸਨ ਪਰ ਹੌਲੀ-ਹੌਲੀ ਸਭ ਡਾਕਟਰਾਂ ਦੀਆਂ ਬਦਲੀਆਂ ਹੋ ਗਈਆਂ ਅਤੇ ਐਮਰਜੈਂਸੀ ਸੇਵਾਵਾਂ ਕਈ ਸਾਲਾਂ ਤੋਂ ਬੰਦ ਹੋਣ ਕਾਰਨ ਬਹੁ-ਕਰੋੜੀ ਇਮਾਰਤ ਵਾਲਾ ਇਹ ਹਸਪਤਾਲ ਮਹਿਜ਼ ‘ਰੈਫ਼ਰ ਸੈਂਟਰ’ ਬਣਕੇ ਰਹਿ ਗਿਆ ਹੈ। ਸੀ ਐੱਮ ਓ ਸੰਗਰੂਰ ਡਾ. ਅਮਰਜੀਤ ਕੌਰ ਵੱਲੋਂ ਭੇਜੀ ਡਾਕਟਰਾਂ ਦੀ ਟੀਮ ਦੇ ਮੋਹਰੀ ਤੇ ਕਾਰਜਕਾਰੀ ਜ਼ਿਲ੍ਹਾ ਸਿਹਤ ਅਫ਼ਸਰ ਡਾਕਟਰ ਮੁਨੀਸ਼ ਵਰਮਾ, ਕਰਨੈਲ ਸਿੰਘ ਜ਼ਿਲ੍ਹਾ ਮਾਸ ਮੀਡੀਆ ਅਫ਼ਸਰ, ਐੱਸ ਐੱਮ ਓ ਡਾ. ਜਸਦੀਪ ਸਿੰਘ, ਬੀ ਈ ਈ ਤਰਸੇਮ ਸਿੰਘ ਆਦਿ ਨੇ ਮੀਟਿੰਗ ਕਰ ਕੇ 18 ਫਰਵਰੀ ਤੋਂ ਐਮਰਜੈਂਸੀ ਸੇਵਾਵਾਂ ਚਾਲੂ ਦਾ ਭਰੋਸਾ ਦਿੱਤਾ ਜਿਸ ਮਗਰੋਂ ਧਰਨਾਕਾਰੀਆਂ ਨੇ ਸੰਘਰਸ਼ ਮੁਲਤਵੀ ਕਰ ਦਿੱਤਾ। ਧਰਨਾਕਾਰੀਆਂ ਦੀ ਹਮਾਇਤ ’ਚ ਅਕਾਲੀ ਦਲ ਦੇ ਹਲਕਾ ਇੰਚਾਰਜ ਨਾਥ ਸਿੰਘ ਹਮੀਦੀ, ਬਸਪਾ ਦੇ ਜ਼ਿਲ੍ਹਾ ਪ੍ਰਧਾਨ ਸਰਬਜੀਤ ਸਿੰਘ ਖੇੜੀ, ਵਪਾਰ ਮੰਡਲ ਦੇ ਮਨਦੀਪ ਖੀਪਲ, ਐਡਵੋਕੇਟ ਜਸਵੀਰ ਸਿੰਘ ਤੇ ਸਮਾਜ ਸੇਵੀ ਭਾਨ ਸਿੰਘ ਜੱਸੀ ਸਮੇਤ ਵੱਡੀ ਗਿਣਤੀ ਆਗੂ ਪੁੱਜੇ।

ਐਮਰਜੈਂਸੀ ਸੇਵਾਵਾਂ ਸ਼ੁਰੂ ਕਰਨ ਲਈ ਹਸਪਤਾਲ ਨੂੰ ਤਿੰਨ ਡਾਕਟਰ ਮਿਲੇ: ਐੱਸ ਐੱਮ ਓ

ਐੱਸ ਐੱਮ ਓ ਡਾ. ਜਸਦੀਪ ਸਿੰਘ ਨੇ ਕਿਹਾ ਕਿ ਐਮਰਜੈਂਸੀ ਸੇਵਾਵਾਂ ਭਲਕੇ 18 ਫਰਵਰੀ ਤੋਂ ਸ਼ੁਰੂ ਹੋ ਜਾਣਗੀਆਂ ਅਤੇ ਇਸ ਲਈ ਤਿੰਨ ਈ ਐੱਮ ਓਜ਼ ਡਾਕਟਰ ਰੁਪਿੰਦਰ ਸਿੰਘ, ਡਾਕਟਰ ਤੇਜਿੰਦਰ ਸਿੰਘ ਅਤੇ ਡਾਕਟਰ ਸ਼ੁਭਮ ਯਾਦਵ ਦੀ ਡਿਊਟੀ ਵਿਭਾਗ ਨੇ ਸ਼ੇਰਪੁਰ ਲਾ ਦਿੱਤੀ ਹੈ।