ਮੇਜਰ ਸਿੰਘ ਮੱਟਰਾਂ
ਭਵਾਨੀਗੜ੍ਹ, 25 ਸਤੰਬਰ
ਨੇੜਲੇ ਪਿੰਡ ਮਾਝਾ ਵਿੱਚ ਮਗਨਰੇਗਾ ਮਜ਼ਦੂਰਾਂ ਅਤੇ ਪਿੰਡ ਵਾਸੀਆਂ ਨੇ ਹੱਡਾਰੋੜੀ ਦੇ ਮਸਲੇ ਨੂੰ ਲੈ ਕੇ ਆਮ ਆਦਮੀ ਪਾਰਟੀ ਦੇ ਵਾਲੰਟੀਅਰ ਬਲਕਾਰ ਸਿੰਘ ਬਾਲੀ ਵਿਰੁੱਧ ਨਾਅਰੇਬਾਜ਼ੀ ਕੀਤੀ। ਪਿੰਡ ਦੇ ਸਾਬਕਾ ਫੌਜੀ ਅਜੈਬ ਸਿੰਘ ਨੇ ਦੱਸਿਆ ਕਿ ‘ਆਪ’ ਵਾਲੰਟੀਅਰ ਬਲਕਾਰ ਸਿੰਘ ਬਾਲੀ ਮੌਜੂਦਾ ਸਰਕਾਰ ਦਾ ਕਥਿਤ ਦਬਾਅ ਬਣਾ ਕੇ ਪਿੰਡ ਦੇ ਮਗਨਰੇਗਾ ਮਜ਼ਦੂਰਾਂ ਸਣੇ ਹੋਰਨਾਂ ਲੋਕਾਂ ਨੂੰ ਤੰਗ ਕਰ ਰਿਹਾ ਹੈ। ਉਨ੍ਹਾਂ ਦੋਸ਼ ਲਗਾਇਆ ਕਿ ਬਲਕਾਰ ਸਿੰਘ ਬਾਲੀ ਹੱਡਾਰੋੜੀ ਵਾਲੇ ਠੇਕੇਦਾਰ ਚਮਕੌਰ ਸਿੰਘ ਤੋਂ 80 ਹਜ਼ਾਰ ਰੁਪਏ ਰਿਸ਼ਵਤ ਦੇ ਰੂਪ ਵਿੱਚ ਲੈ ਕੇ ਬਾਹਰਲੇ ਪਿੰਡਾਂ ਦੇ ਮਰੇ ਹੋਏ ਪਸ਼ੂ ਵੀ ਪਿੰਡ ਦੀ ਹੱਡਾ ਰੋੜੀ ਵਿੱਚ ਸੁਟਵਾ ਰਿਹਾ ਹੈ। ਇਸ ਸਬੰਧੀ ਵੀਡੀਓ ਵੀ ਵਾਇਰਲ ਹੋ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਬਾਹਰਲੇ ਪਿੰਡਾਂ ਦੇ ਮਰੇ ਹੋਏ ਜਾਨਵਰਾਂ ਨੂੰ ਇੱਥੇ ਸੁੱਟਣ ਕਾਰਨ ਲੋਕਾਂ ਨੂੰ ਪ੍ਰੇਸ਼ਾਨੀ ਹੋ ਰਹੀ ਹੈ। ਇਸ ਮੌਕੇ ਮਗਨਰੇਗਾ ਵਰਕਰ ਸੁਮਨਦੀਪ ਕੌਰ ਨੇ ਦੱਸਿਆ ਕਿ ‘ਆਪ’ ਵਾਲੰਟੀਅਰ ਬਲਕਾਰ ਬਾਲੀ ਨੇ ਕਥਿਤ ਦਖ਼ਲਅੰਦਾਜ਼ੀ ਕਰਕੇ ਉਸ ਨੂੰ ਮਗਨਰੇਗਾ ਵਿੱਚੋਂ ਹਟਾ ਦਿੱਤਾ ਗਿਆ। ਉਨ੍ਹਾਂ ਕਿਹਾ ਕਿ ਬਲਕਾਰ ਸਿੰਘ ਬਾਲੀ ਖ਼ਿਲਾਫ਼ ਸਖ਼ਤ ਕਾਰਵਾਈ ਹੋਣੀ ਚਾਹੀਦੀ ਹੈ।
ਇਸ ਮੌਕੇ ਬਲਵਿੰਦਰ ਸਿੰਘ ਸਾਬਕਾ ਪੰਚ, ਗਿਆਨ ਜੀਤ ਕੌਰ, ਗੁਰਜੰਟ ਸਿੰਘ, ਬੁੱਧ ਰਾਮ, ਬਲਵਿੰਦਰ ਸਿੰਘ ਮਾਝੀ, ਪੱਪੂ ਸਿੰਘ ਸਮੇਤ ਮਗਨਰੇਗਾ ਮਜ਼ਦੂਰ ਅਤੇ ਲੋਕ ਹਾਜ਼ਰ ਸਨ।
‘ਆਪ’ ਵਾਲੰਟੀਅਰ ਨੇ ਦੋਸ਼ ਨਕਾਰੇ
ਆਪਣੇ ’ਤੇ ਲੱਗੇ ਦੋਸ਼ਾਂ ਨੂੰ ਨਕਾਰਦਿਆਂ ‘ਆਪ’ ਦੇ ਵਾਲੰਟੀਅਰ ਬਲਕਾਰ ਸਿੰਘ ਬਾਲੀ ਨੇ ਕਿਹਾ ਕਿ ਉਸ ਨੇ ਚਮਕੌਰ ਸਿੰਘ ਤੋਂ 80 ਹਜ਼ਾਰ ਰੁਪਏ ਵਿਆਜ ’ਤੇ ਲਏ ਹਨ, ਜਿਸ ਦੇ ਬਦਲੇ ਉਸ ਨੇ ਆਪਣਾ ਚੈੱਕ ਵੀ ਠੇਕੇਦਾਰ ਨੂੰ ਦਿੱਤਾ ਹੋਇਆ ਹੈ। ਇਸੇ ਦੌਰਾਨ ਹੱਡਾ ਰੋੜੀ ਦੇ ਠੇਕੇਦਾਰ ਚਮਕੌਰ ਸਿੰਘ ਨੇ ਆਪਣੇ ਪਹਿਲੇ ਬਿਆਨ ਤੋਂ ਮੁਕਰਦਿਆਂ ਕਿਹਾ ਕਿ ਉਸ ਨੇ ਬਾਲੀ ਨੂੰ 80 ਰੁਪਏ ਰਿਸ਼ਵਤ ਨਹੀਂ, ਸਗੋਂ ਵਿਆਜ ’ਤੇ ਦਿੱਤੇ ਹਨ।