ਜੈਸਮੀਨ ਭਾਰਦਵਾਜ
ਨਾਭਾ, 24 ਜੂਨ
ਨਾਭਾ ਦੇ ਪਿੰਡ ਰਾਮਗੜ੍ਹ ਬੌੜਾਂ ਦੇ ਵਸਨੀਕਾਂ ਨੇ ਅੱਜ ਬੀਡੀਪੀਓ ਨੂੰ ਸ਼ਿਕਾਇਤ ਦਰਜ ਕਰਵਾਈ ਕਿ ਵੀਰਵਾਰ ਨੂੰ ਉਨ੍ਹਾਂ ਦੇ ਪਿੰਡ ਗ੍ਰਾਮ ਸਭਾ ਦੇ ਇਜਲਾਸ ਵਿੱਚ 20 ਫ਼ੀਸਦ ਕੋਰਮ ਪੂਰਾ ਨਾ ਹੋਣ ਦੇ ਬਾਵਜੂਦ ਪੰਚਾਇਤ ਸਕੱਤਰ ਨੇ ਇਜਲਾਸ ਮੁਲਤਵੀ ਨਹੀਂ ਕੀਤਾ ਸਗੋਂ ਕਥਿਤ ਤੌਰ ’ਤੇ ਜਾਅਲੀ ਤਰੀਕੇ ਨਾਲ ਇਜਲਾਸ ਦੀ ਕਾਰਵਾਈ ਪੂਰੀ ਕੀਤੀ ਗਈ।
ਪਿੰਡ ਵਾਸੀ ਕੁਲਵਿੰਦਰ ਕੌਰ ਨੇ 80 ਪਿੰਡ ਵਾਸੀਆਂ ਵੱਲੋਂ ਤਸਦੀਕ ਕੀਤੇ ਸ਼ਿਕਾਇਤ ਪੱਤਰ ਅਤੇ ਕਥਿਤ ਵੀਰਵਾਰ ਦੇ ਗ੍ਰਾਮ ਸਭਾ ਦੀ ਵੀਡੀਓ ਦਿਖਾਉਂਦਿਆਂ ਦੱਸਿਆ ਕਿ ਪੰਚਾਇਤ ਵਿਭਾਗ ਵੱਲੋਂ ਗ੍ਰਾਮ ਸਭਾ ਵਾਲੇ ਦਿਨ ਹੀ ਸਪੀਕਰ ’ਚ ਐਲਾਨ ਕਰਵਾਇਆ ਗਿਆ ਤੇ ਪਹਿਲਾਂ ਇਸ ਦੀ ਕੋਈ ਮੁਨਾਦੀ ਨਾ ਕਰਵਾਈ ਗਈ। ਇਸ ਕਰਕੇ ਲੋਕ ਆਪੋ-ਆਪਣੇ ਕੰਮਾਂ-ਕਾਰਾਂ ’ਤੇ ਚਲੇ ਗਏ ਸਨ ਤੇ ਗ੍ਰਾਮ ਸਭਾ ’ਚ ਹਾਜ਼ਰ ਨਾ ਹੋ ਸਕੇ। ਜ਼ਿਕਰਯੋਗ ਹੈ ਕਿ ਦਸ ਦਿਨ ਪਹਿਲਾਂ ਨਾਭਾ ਦੇ ਵੀਹ ਪਿੰਡਾਂ ਵੱਲੋਂ ਗ੍ਰਾਮ ਸਭਾ ਇਜਲਾਸ ਸਬੰਧੀ ਜਾਣਕਾਰੀ ਨਾ ਮਿਲਣ ’ਤੇ ਧਰਨਾ ਵੀ ਲਗਾਇਆ ਗਿਆ ਸੀ।
ਪਿੰਡ ਵਾਸੀ ਚਰਨਜੀਤ ਕੌਰ ਨੇ ਦੱਸਿਆ ਕਿ ਮੁਲਾਜ਼ਮਾਂ ਵੱਲੋਂ ਕਾਰਵਾਈ ਰਜਿਸਟਰ ’ਚ ਜੋ ਵੀ ਮਤੇ ਪਾਏ ਗਏ, ਉਹ ਵੀ ਲੋਕਾਂ ਨਾਲ ਸਾਂਝੇ ਨਹੀਂ ਕੀਤੇ ਗਏ ਤੇ ਕੋਰਮ ਸਬੰਧੀ ਇਤਰਾਜ਼ ਜਤਾਉਣ ਦੇ ਬਾਵਜੂਦ ਉਨ੍ਹਾਂ ਨੇ ਗ੍ਰਾਮ ਸਭਾ ਇਕ ਰਸਮ ਦੀ ਤਰ੍ਹਾਂ ਨੇਪਰੇ ਚਾੜ੍ਹ ਦਿੱਤੀ। ਇਸ ਮੌਕੇ ਨਾਭਾ ਬੀਡੀਪੀਓ ਵਰਿੰਦਰ ਕੁਮਾਰ ਨਾਲ ਸੰਪਰਕ ਤਾਂ ਨਹੀਂ ਹੋ ਸਕਿਆ ਪਰ ਸ਼ਿਕਾਇਤ ਲੈ ਕੇ ਆਏ ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਬੀਡੀਪੀਓ ਨੇ ਸਰਪੰਚ ਨੂੰ ਰਿਕਾਰਡ ਸਮੇਤ ਸੋਮਵਾਰ ਨੂੰ ਪੇਸ਼ ਹੋਣ ਨੂੰ ਕਿਹਾ ਹੈ ਤੇ ਉਨ੍ਹਾਂ ਨੂੰ ਇਨਸਾਫ ਦਾ ਭਰੋਸਾ ਦਿੱਤਾ ਹੈ।