ਸ਼ੈੱਲਰਾਂ ਵਿੱਚੋਂ ਝੋਨਾ ਚੋਰੀ ਕਰਨ ਵਾਲੇ ਗਰੋਹ ਦੇ 4 ਮੈਂਬਰ ਕਾਬੂ

ਬਾਦਸ਼ਾਹਪੁਰ ਚੌਕੀ ਦੀ ਪੁਲੀਸ ਨੇ ਕੇਸ ਦਰਜ ਕਰਕੇ ਚੋਰ ਗਰੋਹ ਦੇ ਚਾਰ ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਜਿਨ੍ਹਾਂ ਕੋਲੋਂ ਟੈਂਪੂ ਟਰੈਵਲ ਅਤੇ ਚੋਰੀ ਕੀਤੇ ਝੋਨੇ ਦੇ ਥੈਲੇ ਬਰਾਮਦ ਕੀਤੇ ਹਨ। ਜਾਣਕਾਰੀ ਅਨੁਸਾਰ ਬਾਦਸ਼ਾਹਪੁਰ ਦੇ ਸ਼ੈੱਲਰਾਂ ਵਿੱਚੋਂ ਰਾਤ ਸਮੇਂ ਹਥਿਆਰਬੰਦ ਚੋਰ ਝੋਨੇ ਦੀਆਂ ਬੋਰੀਆਂ ਚੋਰੀ ਕਰਦੇ ਸਨ ਜਿਸ ਕਾਰਨ ਸ਼ੈੱਲਰ ਮਾਲਕਾਂ ਵਿੱਚ ਹਾਹਾਕਾਰ ਮੱਚੀ ਹੋਈ ਸੀ। ਬਾਦਸ਼ਾਹਪੁਰ ਪੁਲੀਸ ਚੌਕੀ ਮੁਖੀ ਪ੍ਰੇਮ ਸਿੰਘ ਨੇ ਦੱਸਿਆ ਕਿ ਗੁਰਿੰਦਰ ਸਿੰਘ ਭੰਗੂ ਨੇ 6 ਨਵੰਬਰ ਨੂੰ ਇਤਲਾਹ ਦਿੱਤੀ ਸੀ ਉਨ੍ਹਾਂ ਦੀ ਭੰਗੂ ਇੰਡਸਟਰੀ ’ਚ 5-6 ਨਵੰਬਰ ਦੀ ਦਰਮਿਆਨੀ ਰਾਤ ਨੂੰ ਚੋਰਾਂ ਨੇ ਦਾਖ਼ਲ ਹੋ ਕੇ 160 ਦੇ ਕਰੀਬ ਝੋਨੇ ਦੇ ਥੈਲੇ ਚੋਰੀ ਕਰ ਲਏ ਹਨ, ਜਿਨ੍ਹਾਂ ਦੀ ਕੀਮਤ 1,65000 ਰੁਪਏ ਬਣਦੀ ਹੈ। ਪੁਲੀਸ ਨੇ ਕੇਸ ਦਰਜ ਕਰਕੇ ਚੋਰਾਂ ਦੀ ਭਾਲ ਲਈ ਸੀ ਸੀ ਟੀ ਵੀ ਕੈਮਰਿਆਂ ਦੀ ਘੋਖ ਕੀਤੀ। ਇਸ ਦੌਰਾਨ ਚੋਰਾਂ ਵੱਲੋਂ ਵਰਤਿਆ ਟੈਂਪੂ ਟਰੈਵਲ ਬਰਾਮਦ ਕੀਤਾ ਗਿਆ। ਉਪਰੰਤ ਚੋਰੀ ਕਰਨ ਵਾਲੇ ਰਿੰਕੂ ਰਾਮ ਅਤੇ ਬਲਵੀਰ ਸਿੰਘ ਵਾਸੀ ਪਾਤੜਾਂ, ਜੋਤੀ ਸਿੰਘ ਉਰਫ ਸੰਨੀ ਵਾਸੀ ਪਿੰਡ ਹਾਮਝੇੜੀ ਅਤੇ ਲਖਵਿੰਦਰ ਸਿੰਘ ਉਰਫ ਬੋਪਲ ਵਾਸੀ ਪਾਤੜਾਂ ਨੂੰ ਗ੍ਰਿਫ਼ਤਾਰ ਕਰਕੇ ਪੁੱਛ-ਪੜਤਾਲ ਕੀਤੀ ਗਈ। ਮੁਲ਼ਜ਼ਮਾਂ ਕੋਲੋਂ ਪਿੰਡ ਬਕਰਾਹਾ ਦੇ ਇੱਕ ਜੰਗਲ ਨੁਮਾ ਝਾੜੀਆਂ ਵਿੱਚ ਲੁਕਾਏ ਹੋਏ ਝੋਨੇ ਦੇ 50 ਥੈਲੇ ਬਰਾਮਦ ਕੀਤੇ ਗਏ। ਉਨ੍ਹਾਂ ਆਖਿਆ ਕਿ ਮੁਲਜ਼ਮ ਸੰਨੀ ਵਾਸੀ ਪਾਤੜਾਂ, ਰੋਬਲ ਵਾਸੀ ਪਾਤੜਾਂ, ਜੱਜੂ ਵਾਸੀ ਹਰਿਆਊ ਖੁਰਦ ਨੂੰ ਗ੍ਰਿਫਤਾਰ ਕਰਨ ਲਈ ਛਾਪੇ ਮਾਰੇ ਜਾ ਰਹੇ ਹਨ।