West Asia crisis: ਬਠਿੰਡਾ ਦੇ ਚਾਰ ਪਰਿਵਾਰਾਂ ਦੇ 12 ਮੈਂਬਰ ਦੁਬਈ ’ਚ ਫਸੇ

ਅਮਰੀਕਾ, ਇਜ਼ਰਾਈਲ ਅਤੇ ਇਰਾਨ ਦੇ ਵਿਚਕਾਰ ਚੱਲ ਰਹੇ ਸੰਘਰਸ਼ ਦੇ ਦਰਮਿਆਨ ਬਠਿੰਡਾ ਸ਼ਹਿਰ ਦੇ ਚਾਰ ਪਰਿਵਾਰਾਂ ਦੇ ਘੱਟੋ-ਘੱਟ 12 ਵਿਅਕਤੀ ਇਸ ਸਮੇਂ ਦੁਬਈ ਵਿੱਚ ਫਸੇ ਹੋਏ ਹਨ। ਫਸੇ ਹੋਏ ਲੋਕਾਂ ਵਿੱਚ ਐੱਸ ਐੱਸ ਡੀ ਗਰਲਜ਼ ਕਾਲਜ ਦੀ ਪ੍ਰਿੰਸੀਪਲ ਡਾ. ਨੀਰੂ ਗਰਗ ਅਤੇ ਉਨ੍ਹਾਂ ਦੇ ਪਤੀ ਪ੍ਰੋ. ਪਰਵੀਨ ਗਰਗ ਸ਼ਾਮਲ ਹਨ, ਜੋ ਹਾਲ ਹੀ ਵਿੱਚ ਡੀ.ਏ.ਵੀ. ਕਾਲਜ ਦੇ ਵਾਈਸ-ਪ੍ਰਿੰਸੀਪਲ ਵਜੋਂ ਸੇਵਾਮੁਕਤ ਹੋਏ ਹਨ।

ਹੋਰ ਪ੍ਰਭਾਵਿਤ ਨਿਵਾਸੀਆਂ ਵਿੱਚ ਬਠਿੰਡਾ ਦੀ ਪਾਵਰ ਹਾਊਸ ਰੋਡ ਤੋਂ ਇੱਕ ਪਰਿਵਾਰ ਦੇ ਤਿੰਨ ਮੈਂਬਰ, ਵੀਰ ਕਲੋਨੀ ਤੋਂ ਤਿੰਨ ਅਤੇ ਬੀਬੀ ਵਾਲਾ ਰੋਡ ਤੋਂ ਚਾਰ ਮੈਂਬਰ ਸ਼ਾਮਲ ਹਨ। ਸਿੱਖਿਆ ਸ਼ਾਸਤਰੀ ਜੋੜੇ ਨੇ ਸ਼ਨਿਚਰਵਾਰ ਨੂੰ ਸ਼ਾਰਜਾਹ ਹਵਾਈ ਅੱਡੇ ਤੋਂ ਵਾਪਸੀ ਦੀ ਫਲਾਈਟ ਲੈਣੀ ਸੀ ਪਰ ਆਖਰੀ ਮਿੰਟ 'ਤੇ ਉਹ ਉੱਥੇ ਹੀ ਫਸ ਗਏ। ਇਸ ਪੱਤਰਕਾਰ ਨਾਲ ਵਟਸਐਪ 'ਤੇ ਹੋਈ ਗੱਲਬਾਤ ਵਿੱਚ ਨੀਰੂ ਗਰਗ ਨੇ ਕਿਹਾ, "ਇੱਥੇ ਇੰਟਰਨੈਟ ਕਨੈਕਟੀਵਿਟੀ ਬਹੁਤ ਮਾੜੀ ਹੈ, ਅਤੇ ਸਾਨੂੰ ਅਜੇ ਤੱਕ ਆਪਣੀ ਨਿਕਾਸੀ ਦੀ ਸਥਿਤੀ ਬਾਰੇ ਜਾਣਕਾਰੀ ਨਹੀਂ ਹੈ।" 

ਉਹ ਆਪਣੇ ਪਤੀ ਦੇ ਨਾਲ 23 ਤੋਂ 28 ਫਰਵਰੀ ਤੱਕ ਘੁੰਮਣ-ਫਿਰਨ ਲਈ ਦੁਬਈ ਗਏ ਹੋਏ ਸਨ। ਉਡਾਣਾਂ ਮੁਅੱਤਲ ਹੋਣ ਤੋਂ ਬਾਅਦ, ਜੋੜਾ ਪਹਿਲਾਂ ਇੱਕ ਹੋਟਲ ਵਿੱਚ ਰੁਕਿਆ ਅਤੇ ਬਾਅਦ ਵਿੱਚ ਮਦਦ ਦੀ ਮੰਗ ਕਰਦਿਆਂ ਇੱਕ ਵੀਡੀਓ ਅਪਲੋਡ ਕੀਤੀ। ਇਸ ਤੋਂ ਬਾਅਦ, ਉਹ ਉੱਥੇ ਰਹਿ ਰਹੇ ਬਠਿੰਡਾ ਦੇ ਇੱਕ ਨਿਵਾਸੀ ਦੇ ਰਿਸ਼ਤੇਦਾਰ ਦੇ ਘਰ ਚਲੇ ਗਏ। 

ਸਥਾਨਕ ਕਾਲਜ ਅਧਿਕਾਰੀਆਂ ਨੇ ਵੀ ਮੰਗਲਵਾਰ ਨੂੰ ਜੋੜੇ ਨਾਲ ਸੰਪਰਕ ਸਥਾਪਤ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਉਨ੍ਹਾਂ ਦੀਆਂ ਕੋਸ਼ਿਸ਼ਾਂ ਵਿਅਰਥ ਰਹੀਆਂ। ਜ਼ਿਲ੍ਹਾ ਕਾਂਗਰਸ ਕਮੇਟੀ ਬਠਿੰਡਾ ਦੇ ਪ੍ਰਧਾਨ ਰਾਜਨ ਗਰਗ ਨੇ ਦੱਸਿਆ ਕਿ ਪੀ.ਸੀ.ਸੀ. ਮੁਖੀ ਅਤੇ ਲੁਧਿਆਣਾ ਦੇ ਸੰਸਦ ਮੈਂਬਰ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੇ ਉਨ੍ਹਾਂ ਦੀ ਸੁਰੱਖਿਅਤ ਵਾਪਸੀ ਲਈ ਕੇਂਦਰੀ ਵਿਦੇਸ਼ ਮੰਤਰੀ ਡਾ. ਐਸ ਜੈਸ਼ੰਕਰ ਨੂੰ ਪੱਤਰ ਲਿਖਿਆ ਹੈ।