ਕੈਂਟਰ ਤੇ ਕਾਰ ਵਿਚਾਲੇ ਟੱਕਰ ਕਾਰਨ ਤਿੰਨ ਮੌਤਾਂ
ਮੁਹਾਲੀ-ਕੁਰਾਲੀ ਐਕਸਪ੍ਰੈੱਸਵੇਅ ’ਤੇ ਹਾਦਸਾ, ਹਿਮਾਚਲ ਦੇ ਵਾਸੀ ਸਨ ਮ੍ਰਿਤਕ
ਮੁਹਾਲੀ-ਕੁਰਾਲੀ ਭਾਰਤਮਾਲਾ ਐਕਸਪ੍ਰੈੱਸਵੇਅ ’ਤੇ ਪਿੰਡ ਬਜਹੇੜੀ ਟੌਲ ਪਲਾਜ਼ਾ ਨੇੜੇ ਅੱਜ ਦੁਪਹਿਰ ਕਰੇਟਾ ਕਾਰ ਅਤੇ ਕੈਂਟਰ ਵਿਚਾਲੇ ਟੱਕਰ ਕਾਰਨ ਪਤੀ-ਪਤਨੀ ਸਮੇਤ ਤਿੰਨ ਜਣਿਆਂ ਦੀ ਮੌਤ ਹੋ ਗਈ। ਮ੍ਰਿਤਕ ਹਰਿਆਣਾ ਦੇ ਜੀਂਦ ਸ਼ਹਿਰ ਵਿੱਚ ਵਿਆਹ ਸਮਾਗਮ ’ਚ ਸ਼ਾਮਲ ਹੋਣ ਤੋਂ ਬਾਅਦ ਵਾਪਸ ਆਪਣੇ ਘਰ ਜਾ ਰਹੇ ਸਨ।
ਮ੍ਰਿਤਕਾਂ ਦੀ ਪਛਾਣ ਪ੍ਰਤਿਊਸ਼ ਜੈਨ (28) ਪੁੱਤਰ ਸ਼ੰਮੀ ਜੈਨ, ਉਸ ਦੀ ਪਤਨੀ ਹਰਸ਼ਿਤਾ (26) ਵਾਸੀ ਪਿੰਡ ਮਹਿਕਪੁਰ, ਜ਼ਿਲ੍ਹਾ ਊਨਾ, ਜਦ ਕਿ ਤੀਜੇ ਦੀ ਪਛਾਣ ਐਡਵੋਕੇਟ ਸੁਰੇਸ਼ (65) ਪੁੱਤਰ ਵਰਮਾ ਨੰਦ ਵਾਸੀ ਪਿੰਡ ਡੇਹਲਾ, ਜ਼ਿਲ੍ਹਾ ਊਨਾ (ਹਿਮਾਚਲ ਪ੍ਰਦੇਸ਼) ਵਜੋਂ ਹੋਈ ਹੈ।
ਪ੍ਰਤਿਊਸ਼ ਜੈਨ ਦੇ ਭਰਾ ਆਦਿੱਤਿਆ ਜੈਨ ਵੱਲੋਂ ਥਾਣਾ ਖਰੜ ਦੀ ਪੁਲੀਸ ਨੂੰ ਦਿੱਤੇ ਬਿਆਨਾਂ ਅਨੁਸਾਰ ਕੈਂਟਰ ਚਾਲਕ ਨੇ ਟੌਲ ਪਲਾਜ਼ਾ ਨੇੜੇ ਇੱਕ ਦਮ ਬ੍ਰੇਕ ਲਗਾ ਦਿੱਤੀ, ਜਿਸ ਕਾਰਨ ਕਾਰ, ਕੈਂਟਰ ਦੇ ਪਿੱਛੇ ਜਾ ਵੱਜੀ। ਇਸ ਦੌਰਾਨ ਤਿੰਨੋ ਜਣੇ ਕਾਰ ਅੰਦਰ ਫਸ ਗਏ।
ਪੁਲੀਸ ਅਤੇ ਟੌਲ ਪਲਾਜ਼ੇ ਦੀ ਐਂਬੂਲੈਂਸ ਅਤੇ ਰਾਹਗੀਰਾਂ ਨੇ ਕਾਰ ਵਿਚ ਫਸੇ ਤਿੰਨੋਂ ਵਿਅਕਤੀਆਂ ਨੂੰ ਬਾਹਰ ਕੱਢ ਕੇ ਤੁਰੰਤ ਸਿਵਲ ਹਸਪਤਾਲ ਖਰੜ ਪਹੁੰਚਾਇਆ, ਜਿੱਥੇ ਡਾਕਟਰਾਂ ਨੇ ਤਿੰਨਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਕੈਂਟਰ ਚਾਲਕ ਮੌਕੇ ਤੋਂ ਫ਼ਰਾਰ ਹੋ ਗਿਆ। ਪਿੰਡ ਬਜਹੇੜੀ ਦੇ ਚਸ਼ਮਦੀਦ ਅਨੁਸਾਰ ਕੈਂਟਰ ਚਾਲਕ ਦੇ ਦੱਸਣ ਮੁਤਾਬਕ ਉਸ ਦੀ ਗੱਡੀ ਅੱਗੇ ਸੱਪ ਆ ਗਿਆ ਸੀ ਜਿਸ ਨੂੰ ਦੇਖ ਕੇ ਉਸ ਨੇ ਬ੍ਰੇਕ ਲਗਾ ਦਿੱਤੀ। ਜਾਣਕਾਰੀ ਅਨੁਸਾਰ ਇਸ ਜੋੜੇ ਦਾ ਵਿਆਹ ਇਸੇ ਸਾਲ ਮਾਰਚ ਵਿੱਚ ਹੋਇਆ ਸੀ।
