Ludhiana ’ਚ ਅਵਾਰਾ ਕੁੱਤਿਆਂ ਦੀ ਦਹਿਸ਼ਤ; ਨਿਗਮ ਦੀ ਇਕੱਲੀ ਵੈਨ ਸੈਂਕੜੇ ਸ਼ਿਕਾਇਤਾਂ ਅੱਗੇ ਬੇਵੱਸ

ਅਵਾਰਾ ਕੁੱਤਿਆਂ ਦੇ ਵਧਦੇ ਕਹਿਰ ਕਾਰਨ ਸ਼ਹਿਰ ਨਿਵਾਸੀ ਡਰ ਦੇ ਸਾਏ ਹੇਠ ਜੀਅ ਰਹੇ ਹਨ, ਜਿਨ੍ਹਾਂ ਵੱਲੋਂ ਨਗਰ ਨਿਗਮ ਨੂੰ ਰੋਜ਼ਾਨਾ ਸ਼ਿਕਾਇਤਾਂ ਪ੍ਰਾਪਤ ਹੋ ਰਹੀਆਂ ਹਨ। ਅਵਾਰਾ ਕੁੱਤਿਆਂ ਨਾਲ ਸਬੰਧਤ ਘਟਨਾਵਾਂ ਦੀ ਵਧਦੀ ਗਿਣਤੀ ਦੇ ਬਾਵਜੂਦ ਨਗਰ ਨਿਗਮ ਕੋਲ ਉਨ੍ਹਾਂ ਨੂੰ ਫੜਨ ਲਈ ਸਿਰਫ ਇੱਕ ਗੱਡੀ ਅਤੇ ਮੁੱਠੀ ਭਰ ਸਟਾਫ ਹੈ, ਜਿਸ ਕਾਰਨ ਨਿਵਾਸੀ ਚਿੰਤਤ ਹਨ। ਸ਼ਹਿਰ ਦੇ ਨਿਵਾਸੀਆਂ ਦਾ ਕਹਿਣਾ ਹੈ ਕਿ ਪਿਛਲੇ ਮਹੀਨਿਆਂ ਵਿੱਚ ਸਥਿਤੀ ਹੋਰ ਵਿਗੜ ਗਈ ਹੈ। ਇਕੱਲੇ ਜਨਵਰੀ ਮਹੀਨੇ ਵਿੱਚ ਹੀ 1,402 ਵਿਅਕਤੀ ਐਂਟੀ-ਰੇਬੀਜ਼ ਟੀਕਾਕਰਨ ਲਈ ਸਿਵਲ ਹਸਪਤਾਲ ਪਹੁੰਚੇ।

ਨਿਗਮ ਨੇ ਮੰਨਿਆ ਹੈ ਕਿ ਉਨ੍ਹਾਂ ਕੋਲ ਕੁੱਤੇ ਫੜਨ ਵਾਲੀ ਸਿਰਫ ਇੱਕ ਵੈਨ ਹੈ, ਜੋ ਇੰਨੇ ਵੱਡੇ ਸ਼ਹਿਰ ਲਈ ਨਾਕਾਫ਼ੀ ਹੈ। ਨਗਰ ਨਿਗਮ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਸਵੀਕਾਰ ਕੀਤਾ ਕਿ ਉਨ੍ਹਾਂ ਕੋਲ ਕੁੱਤੇ ਫੜਨ ਵਾਲੀ ਸਿਰਫ ਇੱਕ ਵੈਨ ਹੈ ਅਤੇ ਇਹ ਸ਼ਹਿਰ ਲਈ ਨਾਕਾਫ਼ੀ ਸਾਬਤ ਹੁੰਦੀ ਹੈ। ਅਧਿਕਾਰੀਆਂ ਦਾ ਦਾਅਵਾ ਹੈ ਕਿ ਉਹ ਸਹੂਲਤਾਂ ਦੇ ਵਿਸਤਾਰ 'ਤੇ ਕੰਮ ਕਰ ਰਹੇ ਹਨ ਪਰ ਨਿਵਾਸੀ ਅਜੇ ਵੀ ਅਸੰਤੁਸ਼ਟ ਹਨ।

ਮਾਡਲ ਗ੍ਰਾਮ ਦੇ ਇੱਕ ਨਿਵਾਸੀ ਨੇ ਦੱਸਿਆ, ‘‘ਮੈਂ ਇੱਕ ਵਾਰ ਨਗਰ ਨਿਗਮ ਕੋਲ ਸਾਡੀ ਗਲੀ ਵਿੱਚੋਂ ਇੱਕ ਕੁੱਤੇ ਨੂੰ ਚੁੱਕਣ ਲਈ ਸ਼ਿਕਾਇਤ ਦਰਜ ਕਰਵਾਈ ਸੀ ਜੋ ਸ਼ਾਇਦ ਹਲਕਿਆ ਹੋਇਆ ਸੀ। ਵੈਨ ਸਿਰਫ ਸ਼ਾਮ ਨੂੰ ਆਈ ਅਤੇ ਅਧਿਕਾਰੀ ਵਾਰ-ਵਾਰ ਇਹੀ ਕਹਿੰਦਾ ਰਿਹਾ ਕਿ ਇਹ ਕਿਸੇ ਹੋਰ ਇਲਾਕੇ ਵਿੱਚ ਗਈ ਹੋਈ ਸੀ। ਜਦੋਂ ਤੱਕ ਵੈਨ ਪਹੁੰਚੀ, ਉਦੋਂ ਤੱਕ ਉਹ ਇਲਾਕੇ ਦੇ 10 ਵਿਅਕਤੀਆਂ ਨੂੰ ਵੱਢ ਚੁੱਕਾ ਸੀ।’’

ਸੁਭਾਸ਼ ਨਗਰ ਦੀ ਰਹਿਣ ਵਾਲੀ ਸੁਨੀਤਾ ਨੇ ਕਿਹਾ, "ਅਸੀਂ ਆਪਣੇ ਬੱਚਿਆਂ ਨੂੰ ਬਾਹਰ ਖੇਡਣ ਦੇਣ ਤੋਂ ਡਰਦੇ ਹਾਂ। ਹਰ ਗਲੀ ਵਿੱਚ ਅਵਾਰਾ ਕੁੱਤਿਆਂ ਦੇ ਝੁੰਡ ਹਨ ਅਤੇ ਉਹ ਦਿਨ ਵੇਲੇ ਵੀ ਲੋਕਾਂ ਦਾ ਪਿੱਛਾ ਕਰਦੇ ਹਨ। ਕਿਸੇ ਹੱਲ ਲਈ ਨਗਰ ਨਿਗਮ ਨੂੰ ਕੀਤੀਆਂ ਗਈਆਂ ਕਾਲਾਂ ਅਕਸਰ ਨਿਰਾਸ਼ਾ ਪੱਲੇ ਪਾਉਂਦੀਆਂ ਹੁੰਦੀਆਂ ਹਨ।"

ਸ਼ਿਮਲਾਪੁਰੀ ਵਿੱਚ ਕਰਿਆਨੇ ਦੀ ਦੁਕਾਨ ਚਲਾਉਣ ਵਾਲੇ ਰਾਜੇਸ਼ ਕੁਮਾਰ ਨੇ ਟਿੱਪਣੀ ਕੀਤੀ, "ਗਾਹਕ ਸ਼ਾਮ ਨੂੰ ਆਉਣ ਤੋਂ ਝਿਜਕਦੇ ਹਨ ਕਿਉਂਕਿ ਕੁੱਤੇ ਬਾਜ਼ਾਰ ਦੇ ਨੇੜੇ ਇਕੱਠੇ ਹੋ ਜਾਂਦੇ ਹਨ। ਅਸੀਂ ਕਈ ਵਾਰ ਸ਼ਿਕਾਇਤ ਕੀਤੀ ਹੈ ਪਰ ਕੁਝ ਨਹੀਂ ਬਦਲਦਾ। ਇੱਕ ਵਾਰ ਨਿਗਮ ਨੇ ਕੁੱਤੇ ਚੁੱਕੇ ਸਨ ਪਰ ਨਸਬੰਦੀ ਤੋਂ ਬਾਅਦ ਉਨ੍ਹਾਂ ਨੂੰ ਦੁਬਾਰਾ ਉੱਥੇ ਹੀ ਛੱਡ ਦਿੱਤਾ।"

ਸਮਾਜਿਕ ਕਾਰਕੁੰਨਾਂ ਦਾ ਤਰਕ ਹੈ ਕਿ ਇਹ ਮੁੱਦਾ ਮਾੜੀ ਯੋਜਨਾਬੰਦੀ ਅਤੇ ਜਵਾਬਦੇਹੀ ਦੀ ਘਾਟ ਨੂੰ ਦਰਸਾਉਂਦਾ ਹੈ। ਕਾਰਕੁੰਨ ਅਨਿਲ ਮਹਿਤਾ ਨੇ ਕਿਹਾ, "ਇਹ ਮਸਲਾ ਸਿਰਫ ਕੁੱਤਿਆਂ ਬਾਰੇ ਨਹੀਂ ਬਲਕਿ ਪ੍ਰਸ਼ਾਸਨ ਬਾਰੇ ਵੀ ਹੈ। ਨਿਗਮ ਨੂੰ ਬੁਨਿਆਦੀ ਢਾਂਚੇ, ਨਸਬੰਦੀ ਪ੍ਰੋਗਰਾਮਾਂ ਅਤੇ ਜਾਗਰੂਕਤਾ ਮੁਹਿੰਮਾਂ ਵਿੱਚ ਨਿਵੇਸ਼ ਕਰਨਾ ਚਾਹੀਦਾ ਹੈ।"