ਸਿਮਰਤਪਾਲ ਸਿੰਘ ਬੇਦੀ
ਜੰਡਿਆਲਾ ਗੁਰੂ, 20 ਫਰਵਰੀ
‘ਦੋ ਧੜ ਤੇ ਇਕ ਸਰੀਰ’ ਦੀ ਵੱਖਰੀ ਪਛਾਣ ਵਾਲੇ ਸੋਹਨ ਸਿੰਘ ਤੇ ਮੋਹਨ ਸਿੰਘ, ਜਿਨ੍ਹਾਂ ਨੂੰ ਪਿਆਰ ਨਾਲ ਸੋਹਣਾ-ਮੋਹਣਾ ਵੀ ਕਿਹਾ ਜਾਂਦਾ ਹੈ, ਨੇ ਅੱਜ ਇਥੇ ਮਾਨਾਂਵਾਲਾ ਕਲਾਂ ਦੇ ਚੋਣ ਬੂਥ ’ਤੇ ਜਾ ਕੇ ਪਹਿਲੀ ਵਾਰ ਆਪਣੇ ਵੋਟ ਦੇ ਹੱਕ ਦਾ ਇਸਤੇਮਾਲ ਕੀਤਾ। ਮਾਨਾਂਵਾਲਾ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਵਿਚਲਾ ਇਹ ਚੋਣ ਬੂਥ ਅਸੈਂਬਲੀ ਹਲਕਾ ਅਟਾਰੀ ਅਧੀਨ ਆਉਂਦਾ ਹੈ। ਸੋਹਣਾ-ਮੋਹਣਾ ਨੂੰ ਪਿੰਗਲਵਾੜਾ ਕੰਪਲੈਕਸ ਤੋਂ ਪੋਲਿੰਗ ਬੂਥ ਤੱਕ ਵਿਸ਼ੇਸ਼ ਗੱਡੀ ਰਾਹੀਂ ਲਿਆਂਦਾ ਗਿਆ। ਇਸ ਪੂਰੇ ਅਮਲ ਦੀ ਵਿਸ਼ੇਸ਼ ਗੱਲ ਇਹ ਰਹੀ ਕਿ ਸੋਹਣਾ-ਮੋਹਣਾ ਨੇ ਇਕ ਦੂਸਰੇ ਕੋਲੋਂ ਓਹਲਾ ਰੱਖ ਕੇ ਵੋਟ ਪਾਈ। ਪੰਜਾਬ ਦੇ ਮੁੱਖ ਚੋਣ ਅਧਿਕਾਰੀ ਐੱਸ.ਕਰੁਣਾ ਰਾਜੂ ਨੇ ਹਾਲ ਹੀ ਵਿੱਚ ਸੋਹਣਾ ਤੇ ਮੋਹਣਾ ਨੂੰ ਚੋਣ ਫੋਟੋ ਵਾਲੇ ਵੱਖੋ-ਵੱਖਰੇ ਸ਼ਨਾਖਤੀ ਕਾਰਡ ਦਿੱਤੇ ਸਨ। ਦੋਵੇਂ ਪਿਛਲੇ ਸਾਲ ਹੀ 18 ਸਾਲ ਦੇ ਹੋਏ ਹਨ। ਚੋਣ ਅਧਿਕਾਰੀਆਂ ਨੇ ਕਿਹਾ ਕਿ ਦੋ ਧੜ ਤੇ ਇਕ ਸਰੀਰ ਵਾਲੇ ਸੋਹਣਾ-ਮੋਹਣਾ ਨੂੰ ਦੋ ਅੱਡੋ-ਅੱਡਰੇ ਵੋਟਰ ਮੰਨਦਿਆਂ ਉਨ੍ਹਾਂ ਲਈ ਵਿਸ਼ੇਸ਼ ਪ੍ਰਬੰਧ ਕੀਤਾ ਗਿਆ ਸੀ ਤਾਂ ਕਿ ਉਹ ਆਪਣੀ ਵੋਟ ਪਾਉਣ ਦੇ ਅਮਲ ਨੂੰ ਗੁਪਤ ਰੱਖ ਸਕਣ। ਉਨ੍ਹਾਂ ਕਿਹਾ ਕਿ ਸੋਹਣਾ-ਮੋਹਣਾ ਨੂੰ ਵੋਟ ਪਾਉਣ ਮੌਕੇ ਕਾਲੇ ਚਸ਼ਮੇ ਦਿੱਤੇ ਗਏ। ਸੋਹਣਾ ਤੇ ਮੋਹਣਾ ਮਾਨਾਂਵਾਲਾ ਸਥਿਤ ਪਿੰਗਲਵਾੜਾ ਵਿੱਚ ਰਹਿੰਦੇ ਹਨ। ਉਨ੍ਹਾਂ ਦਾ ਜਨਮ ਜੂਨ 2003 ਵਿੱਚ ਨਵੀਂ ਦਿੱਲੀ ’ਚ ਹੋਇਆ ਸੀ ਤੇ ਮਾਪੇ ਉਨ੍ਹਾਂ ਨੂੰ ਛੱਡ ਗਏ ਸਨ। ਮਗਰੋਂ ਅੰਮ੍ਰਿਤਸਰ ਸਥਿਤ ਪਿੰਗਲਵਾੜਾ ਨੇ ਉਨ੍ਹਾਂ ਨੂੰ ਅਪਣਾ ਲਿਆ। ਡਿਪਟੀ ਕਮਿਸ਼ਨਰ ਗੁਰਪ੍ਰੀਤ ਸਿੰਘ ਖੇੜਾ ਨੇ ਉਨ੍ਹਾਂ ਨੂੰ ਪਹਿਲੀ ਵਾਰ ਵੋਟ ਪਾਉਣ ਲਈ ਸਰਟੀਫਿਕੇਟ ਦੇ ਕੇ ਸਨਮਾਨਿਤ ਕੀਤਾ। ਉਨ੍ਹਾਂ ਕਿਹਾ ਕਿ ਉਹ ਪੀਐੱਸਪੀਸੀਐੱਲ ਦੇ ਆਇਕਨ ਹਨ। ਇਸ ਮੌਕੇ ਐੱਸਡੀਐੱਮ ਰਾਜੇਸ਼ ਕੁਮਾਰ ਸ਼ਰਮਾ, ਡੀਐਸਪੀ ਅਟਾਰੀ ਬਲਦੇਵ ਸਿੰਘ, ਐੱਸਐਚਓ ਚਾਟੀਵਿੰਡ ਹਰਪ੍ਰੀਤ ਸਿੰਘ, ਐੈੱਸਐੈੱਮਓ ਡਾ. ਸੁਮਿਤ ਸਿੰਘ ਤੇ ਸਰਪੰਚ ਮਾਨਾਂਵਾਲਾ ਸੁਖਰਾਜ ਸਿੰਘ ਰੰਧਾਵਾ ਵੀ ਮੌਜੂਦ ਸਨ। ਉਧਰ ਸੋਹਣਾ-ਮੋਹਣਾ ਨੇ ਕਿਹਾ ਕਿ ਉਹ ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਿਟਡ (ਪੀਐੱਸਪੀਸੀਐੱਲ) ਵਿੱਚ ਕੰਮ ਕਰਦੇ ਹਨ, ਪਰ ਉਨ੍ਹਾਂ ਨੂੰ ਇਕ ਤਨਖਾਹ ਮਿਲਦੀ ਹੈ। ਦੋਵਾਂ ਨੇ ਕਿਹਾ ਕਿ ਉਹ ਆਪਣੇ ਵੋਟ ਦੇ ਹੱਕ ਦਾ ਇਸਤੇਮਾਲ ਕਰਨ ਮਗਰੋਂ ਬਹੁਤ ਖ਼ੁਸ਼ ਹਨ। ਸੋਹਣਾ-ਮੋਹਣਾ ਨੇ ਆਈਆਈਟੀ ਤੋਂ ਇਲੈਕਟ੍ਰੀਸ਼ੀਅਨ ਟਰੇਡ ’ਚ ਡਿਪਲੋਮਾ ਕੀਤਾ ਸੀ ਤੇ ਉਨ੍ਹਾਂ ਨੂੰ ਪਿਛਲੇ ਸਾਲ ਹੀ ਪੀਐੱਸਪੀਸੀਐੱਲ ’ਚ ਨੌਕਰੀ ਮਿਲੀ ਸੀ। ਸੋਹਣਾ-ਮੋਹਣਾ ਦੇ ਦੋ ਦਿਲ, ਦੋ ਵੱਖੋ ਵੱਖਰੀਆਂ ਬਾਹਾਂ, ਕਿਡਨੀਆਂ ਤੇ ਰੀੜ੍ਹ ਦੀਆਂ ਹੱਡੀਆਂ, ਪਰ ਇਕ ਜਿਗਰ, ਪਿੱਤਾ, ਤਿੱਲੀ ਤੇ ਦੋ ਲੱਤਾਂ ਹਨ। ਜਨਮ ਮਗਰੋਂ ਦੋਵਾਂ ਨੂੰ ਇਕ ਦੂਜੇ ਤੋਂ ਵੱਖ ਕਰਨ ਲਈ ਅਪਰੇਸ਼ਨ ਦੀ ਯੋਜਨਾ ਬਣਾਈ ਗਈ ਸੀ, ਪਰ ਮਾਹਿਰਾਂ ਦੀ ਟੀਮ ਦਾ ਮੰਨਣਾ ਸੀ ਕਿ ਸਰਜਰੀ ਇੰਨੀ ਨਾਜ਼ੁਕ ਹੈ ਕਿ ਇਕ ਦੀ ਜਾਨ ਜਾ ਸਕਦੀ ਹੈ।
