ਸੰਦੀਪ ਸਿੰਘ ਦਾ ‘ਝੂਠ ਫੜਨ ਵਾਲਾ ਟੈਸਟ’ ਕਰਵਾਉਣ ਦੀ ਮੰਗ

ਭਰਤੇਸ਼ ਸਿੰਘ ਠਾਕੁਰ

ਚੰਡੀਗੜ੍ਹ, 25 ਮਾਰਚ

ਚੰਡੀਗੜ੍ਹ ਪੁਲੀਸ ਦੀ ਵਿਸ਼ੇਸ਼ ਜਾਂਚ ਟੀਮ (ਸਿਟ) ਨੇ ਮਹਿਲਾ ਕੋਚ ਦੇ ਜਿਨਸੀ ਸੋਸ਼ਣ ਕੇਸ ਵਿੱਚ ਹਰਿਆਣਾ ਦੇ ਸਾਬਕਾ ਖੇਡ ਮੰਤਰੀ ਸੰਦੀਪ ਸਿੰਘ ਦਾ ‘ਝੂਠ ਫੜਨ ਵਾਲਾ ਟੈਸਟ’ ਕਰਵਾਉਣ ਦੀ ਮੰਗ ਕੀਤੀ ਹੈ। ਸੰਦੀਪ ਸਿੰਘ ਕੋਲ ਇਸ ਸਮੇਂ ਪ੍ਰਿਟਿੰਗ ਤੇ ਸਟੇਸ਼ਨਰੀ ਿਵਭਾਗ ਦੀ ਜ਼ਿੰਮੇਵਾਰੀ ਹੈ। ਵਿਸ਼ੇਸ਼ ਜਾਂਚ ਟੀਮ ਨੇ ਚੰਡੀਗੜ੍ਹ ਕੋਰਟ ਵਿੱਚ ਦਾਇਰ ਅਰਜ਼ੀ ਵਿੱਚ ਦਾਅਵਾ ਕੀਤਾ ਹੈ ਕਿ ਸੰਦੀਪ ਸਿੰਘ ਦੇ ਬਿਆਨਾਂ ਵਿੱਚ ਕਥਿਤ ਕਈ ਉਕਾਈਆਂ ਹਨ। ਸਿਟ ਨੇ ਦਾਅਵਾ ਕੀਤਾ ਕਿ ਮੰਤਰੀ ਨੇ ਚੰਡੀਗੜ੍ਹ ਦੇ ਸੈਕਟਰ 7 ਸਥਿਤ ਆਪਣੀ ਰਿਹਾਇਸ਼ ’ਤੇ ਪੀੜਤ ਮਹਿਲਾ ਦੀ ਠਹਿਰ ਨੂੰ ਲੈ ਕੇ ਜੋ ਬਿਆਨ ਦਿੱਤਾ ਸੀ, ਉਹ ਤੱਥਾਂ ਨਾਲ ਮੇਲ ਨਹੀਂ ਖਾਂਦਾ। ਸੰਦੀਪ ਸਿੰਘ ਨੇ ਪੁੱਛ-ਪੜਤਾਲ ਦੌਰਾਨ ਮੰਨਿਆ ਸੀ ਕਿ ਸ਼ਿਕਾਇਤਕਰਤਾ ਉਸ ਦੀ ਰਿਹਾਇਸ਼ ’ਤੇ ਆਈ ਸੀ, ਪਰ ਉਸ ਦੀ ਠਹਿਰ ਦੇ ਅਰਸੇ ਬਾਰੇ ਮੰਤਰੀ ਦੇ ਦਾਅਵੇ ਸ਼ਿਕਾਇਤਕਰਤਾ ਦੇ ਯਾਤਰਾ ਰਿਕਾਰਡ ਦੇ ਉਲਟ ਹਨ।