ਪੰਜਾਬੀ ਮੂਲ ਦੇ ਨਵਰਾਜ ਸਿੰਘ ਰਾਏ ਬਣੇ ਕੇਰਨ ਕਾਊਂਟੀ ਦੇ ਪਹਿਲੇ ‘ਸਿੱਖ ਜੱਜ’

ਕੈਲੀਫੋਰਨੀਆ ਦੀ ਕੇਰਨ ਕਾਊਂਟੀ (Kern County) ਦੀ ਨਿਆਂਇਕ ਹਿਸਟਰੀ ਵਿੱਚ ਇੱਕ ਨਵਾਂ ਸੁਨਹਿਰੀ ਅਧਿਆਏ ਜੁੜ ਗਿਆ ਹੈ। ਇੱਥੋਂ ਦੇ ਸੁਪੀਰੀਅਰ ਕੋਰਟ ਵਿੱਚ ਨਵਰਾਜ ਸਿੰਘ ਰਾਏ ਨੇ ‘ਪ੍ਰੋ ਟੈਮ ਜੱਜ’ (Pro Tem Judge) ਵਜੋਂ ਸਹੁੰ ਚੁੱਕੀ ਹੈ, ਜਿਸ ਨਾਲ ਉਹ ਇਸ ਅਹੁਦੇ ’ਤੇ ਪਹੁੰਚਣ ਵਾਲੇ ਕਾਊਂਟੀ ਦੇ ਪਹਿਲੇ ਸਿੱਖ ਅਤੇ ਪੰਜਾਬੀ ਬਣ ਗਏ ਹਨ।

ਸਥਾਨਕ ਲੋਕਾਂ ਵਿੱਚ ‘ਬਾਕੋ ਕਿੱਡ’ (The Bako Kid) ਦੇ ਨਾਮ ਨਾਲ ਮਸ਼ਹੂਰ ਨਵਰਾਜ ਸਿੰਘ ਰਾਏ ਭਾਰਤ ਤੋਂ ਗਏ ਪਰਵਾਸੀ ਮਾਪਿਆਂ ਦੇ ਸਪੁੱਤਰ ਹਨ। ਉਨ੍ਹਾਂ ਨੇ ਕੈਲੀਫੋਰਨੀਆ ਯੂਨੀਵਰਸਿਟੀ, ਡੇਵਿਸ ਤੋਂ ਆਪਣੀ ਪੜ੍ਹਾਈ ਪੂਰੀ ਕੀਤੀ ਅਤੇ ਹੁਣ ਉਹ ਅਦਾਲਤ ਵਿੱਚ ਨਿਰਪੱਖਤਾ, ਸਤਿਕਾਰ ਅਤੇ ਕਾਨੂੰਨ ਦੇ ਸ਼ਾਸਨ ਵਰਗੇ ਸਿਧਾਂਤਾਂ ਨੂੰ ਲਾਗੂ ਕਰਨਗੇ।

ਇਸ ਇਤਿਹਾਸਕ ਪਲ ਦੀਆਂ ਤਸਵੀਰਾਂ ਅਤੇ ਵੀਡੀਓਜ਼ ਸੋਸ਼ਲ ਮੀਡੀਆ ’ਤੇ ਕਾਫੀ ਵਾਇਰਲ ਹੋ ਰਹੀਆਂ ਹਨ, ਜਿਨ੍ਹਾਂ ਵਿੱਚ ਨਵਰਾਜ ਸਥਾਨਕ ਪੁਲੀਸ ਅਧਿਕਾਰੀਆਂ ਦੀ ਮੌਜੂਦਗੀ ਵਿੱਚ ਮਾਣ ਨਾਲ ਸਹੁੰ ਚੁੱਕਦੇ ਨਜ਼ਰ ਆ ਰਹੇ ਹਨ।

ਕੇਰਨ ਕਾਊਂਟੀ ਹਿੰਦੂ ਕਲਚਰਲ ਸੈਂਟਰ ਅਤੇ ਪੰਜਾਬੀ ਮੀਡੀਆ ਨੇ ਇਸ ਨਿਯੁਕਤੀ ਨੂੰ ਇੱਕ ‘ਵੱਡੀ ਅਤੇ ਇਤਿਹਾਸਕ ਮੀਲ ਪੱਥਰ’ ਵਜੋਂ ਸਲਾਹਿਆ ਹੈ। ਕੇਰਨ ਕਾਊਂਟੀ ਵਿੱਚ ਸਿੱਖ ਭਾਈਚਾਰਾ ਲੰਬੇ ਸਮੇਂ ਤੋਂ ਖੇਤੀਬਾੜੀ, ਵਪਾਰ ਅਤੇ ਸਮਾਜਿਕ ਕੰਮਾਂ ਵਿੱਚ ਵੱਡਾ ਯੋਗਦਾਨ ਪਾ ਰਿਹਾ ਹੈ ਅਤੇ ਹੁਣ ਨਿਆਂਪਾਲਿਕਾ ਵਿੱਚ ਇਸ ਪਹਿਲੀ ਭੂਮਿਕਾ ਨੇ ਭਾਈਚਾਰੇ ਦਾ ਸਿਰ ਹੋਰ ਉੱਚਾ ਕਰ ਦਿੱਤਾ ਹੈ। ਨਵਰਾਜ ਦੀ ਇਹ ਪ੍ਰਾਪਤੀ ਕੈਲੀਫੋਰਨੀਆ ਵਿੱਚ ਸਿੱਖਾਂ ਦੇ ਵਧਦੇ ਪ੍ਰਭਾਵ ਨੂੰ ਦਰਸਾਉਂਦੀ ਹੈ, ਜੋ ਨਿਆਂ ਦੇ ਨਾਲ-ਨਾਲ ਸੱਭਿਆਚਾਰਕ ਸਾਂਝ ਨੂੰ ਵੀ ਮਜ਼ਬੂਤ ਕਰੇਗੀ।