Punjab News: ਬਰਨਾਲਾ ’ਚ ਟੈਂਕੀ 'ਤੇ ਚੜ੍ਹਨ ਵਾਲੀਆਂ ਔਰਤਾਂ ਦੇ ਮਾਮਲੇ ਵਿੱਚ ਮਨੁੱਖੀ ਅਧਿਕਾਰ ਕਮਿਸ਼ਨ ਨੇ ਸੂ-ਮੋਟੋ ਲਿਆ
Barnala Protest: ਵਿਰੋਧ ਵਜੋਂ ਲਗਪਗ 60 ਫੁੱਟ ਉੱਚੀ ਪਾਣੀ ਵਾਲੀ ਟੈਂਕੀ 'ਤੇ ਚੜ੍ਹੀਆਂ ਸਨ ਔਰਤਾਂ
ਪੰਜਾਬ ਰਾਜ ਅਤੇ ਚੰਡੀਗੜ੍ਹ (ਯੂ.ਟੀ.) ਮਨੁੱਖੀ ਅਧਿਕਾਰ ਕਮਿਸ਼ਨ ਨੇ 'ਦ ਟ੍ਰਿਬਿਊਨ' ਵਿੱਚ ਅੱਜ ਛਪੀ ਉਸ ਰਿਪੋਰਟ ਦਾ ਸੂ-ਟੋਮੋ (ਖੁਦ) ਨੋਟ ਲਿਆ ਹੈ, ਜਿਸ ਦਾ ਸਿਰਲੇਖ “3 women climb atop water tank, seek action in sexual abuse cases” (ਤਿੰਨ ਔਰਤਾਂ ਪਾਣੀ ਵਾਲੀ ਟੈਂਕੀ ’ਤੇ ਚੜ੍ਹੀਆਂ, ਜਿਨਸੀ ਸ਼ੋਸ਼ਣ ਦੇ ਮਾਮਲਿਆਂ ਵਿੱਚ ਕਾਰਵਾਈ ਦੀ ਮੰਗ ਕੀਤੀ) ਹੈ ਅਤੇ 27 ਅਕਤੂਬਰ ਨੂੰ ਇਸ ਮਾਮਲੇ ਦੀ ਸੁਣਵਾਈ ਤੋਂ ਇੱਕ ਹਫ਼ਤਾ ਪਹਿਲਾਂ ਬਰਨਾਲਾ ਦੇ ਐੱਸ.ਐੱਸ.ਪੀ. ਤੋਂ ਰਿਪੋਰਟ ਮੰਗੀ ਹੈ।
ਜ਼ਿਕਰਯੋਗ ਹੈ ਕਿ ਤਿੰਨ ਨੌਜਵਾਨ ਔਰਤਾਂ ਬੁੱਧਵਾਰ ਨੂੰ ਬਰਨਾਲਾ ਵਿੱਚ ਜ਼ਿਲ੍ਹਾ ਪ੍ਰਸ਼ਾਸਕੀ ਕੰਪਲੈਕਸ (ਡੀ.ਏ.ਸੀ.) ਨਾਲ ਲੱਗਦੀ ਲਗਪਗ 60 ਫੁੱਟ ਉੱਚੀ ਪਾਣੀ ਵਾਲੀ ਟੈਂਕੀ 'ਤੇ ਚੜ੍ਹ ਗਈਆਂ ਸਨ, ਜਿਨ੍ਹਾਂ ਨੇ ਵਿਆਹ ਦੇ ਬਹਾਨੇ ਤਿੰਨ ਵਿਅਕਤੀਆਂ ਵੱਲੋਂ ਜਿਨਸੀ ਸ਼ੋਸ਼ਣ ਕਰਨ ਅਤੇ ਪੁਲੀਸ ਵੱਲੋਂ ਕਾਰਵਾਈ ਨਾ ਕਰਨ ਦੋਸ਼ ਲਾਏ ਸਨ।
ਬਾਅਦ ਵਿੱਚ, ਪੁਲੀਸ ਨੇ ਉਨ੍ਹਾਂ ਦੀਆਂ ਸ਼ਿਕਾਇਤਾਂ ਦੇ ਆਧਾਰ 'ਤੇ ਤਿੰਨ ਐੱਫ.ਆਈ.ਆਰ. (FIRs) ਦਰਜ ਕਰ ਲਈਆਂ, ਜਿਸ ਤੋਂ ਬਾਅਦ ਉਹ ਔਰਤਾਂ ਲਗਪਗ ਨੌਂ ਘੰਟਿਆਂ ਬਾਅਦ ਹੇਠਾਂ ਉਤਰ ਆਈਆਂ।
ਇਸ ਦੌਰਾਨ, ਚੇਅਰਪਰਸਨ ਜਸਟਿਸ ਸੰਤ ਪ੍ਰਕਾਸ਼, ਮੈਂਬਰ ਜਸਟਿਸ ਗੁਰਬੀਰ ਸਿੰਘ ਅਤੇ ਮੈਂਬਰ ਜਤਿੰਦਰ ਸਿੰਘ ਸ਼ੰਟੀ 'ਤੇ ਆਧਾਰਿਤ ਕਮਿਸ਼ਨ ਨੇ ਅੱਜ ਇਸ ਰਿਪੋਰਟ ਦਾ ਨੋਟਿਸ ਲਿਆ। ਕਮਿਸ਼ਨ ਨੇ ਇਹ ਵੀ ਨਿਰਦੇਸ਼ ਦਿੱਤੇ ਹਨ ਕਿ ਇਸ ਦੇ ਹੁਕਮ ਦੀ ਇੱਕ ਕਾਪੀ ਅਤੇ ਸ਼ਿਕਾਇਤ ਪਾਲਣਾ ਲਈ ਬਰਨਾਲਾ ਦੇ ਐੱਸ.ਐੱਸ.ਪੀ. ਨੂੰ ਅਤੇ ਜਾਣਕਾਰੀ ਲਈ ਸਪੈਸ਼ਲ ਡੀ.ਜੀ.ਪੀ., ਮਨੁੱਖੀ ਅਧਿਕਾਰ, ਪੰਜਾਬ, ਚੰਡੀਗੜ੍ਹ ਨੂੰ ਭੇਜੀ ਜਾਵੇ। ਇਸ ਕਾਰਵਾਈ ਨੂੰ ਇੱਕ ਸ਼ਿਕਾਇਤ ਵਜੋਂ ਦਰਜ ਕਰ ਲਿਆ ਗਿਆ ਹੈ।
