PSEB 12th Result: ਅੰਗਰੇਜ਼ੀ ਅਤੇ ਪੰਜਾਬੀ ਵਿੱਚ ਹਜ਼ਾਰਾਂ ਵਿਦਿਆਰਥੀ ਹੋਏ ਫੇਲ੍ਹ, ਜਾਣੋਂ ਬਾਕੀ ਵਿਸ਼ਿਆਂ ਦਾ ਹਾਲ

ਪੰਜਾਬ ਸਕੂਲ ਸਿੱਖਿਆ ਬੋਰਡ (PSEB) ਵੱਲੋਂ ਬੁੱਧਵਾਰ ਨੂੰ ਐਲਾਨੇ ਗਏ ਬਾਰ੍ਹਵੀਂ ਜਮਾਤ ਦੇ ਨਤੀਜਿਆਂ ਨੇ ਭਾਸ਼ਾ ਸਿੱਖਣ ਦੇ ਪੱਧਰ ਵਿੱਚ ਇੱਕ ਚਿੰਤਾਜਨਕ ਰੁਝਾਨ ਸਾਹਮਣੇ ਲਿਆਂਦਾ ਹੈ। ਭਾਵੇਂ ਕੁੱਲ ਪਾਸ ਪ੍ਰਤੀਸ਼ਤਤਾ 91.46 ਫੀਸਦੀ ਰਹੀ, ਪਰ ਹਜ਼ਾਰਾਂ ਵਿਦਿਆਰਥੀ ਅੰਗਰੇਜ਼ੀ ਅਤੇ ਪੰਜਾਬੀ ਵਿੱਚ ਫੇਲ੍ਹ ਹੋ ਗਏ ਹਨ। ਵਿਦਿਆਰਥੀਆਂ ਦੀ ਆਪਣੇ ਮੁੱਖ ਵਿਸ਼ਿਆਂ 'ਤੇ ਪਕੜ ਕਮਜ਼ੋਰ ਹੁੰਦੀ ਦੇਖ ਕੇ ਸਿੱਖਿਆ ਮਾਹਿਰਾਂ ਨੇ ਇਸ 'ਤੇ ਡੂੰਘੀ ਚਿੰਤਾ ਪ੍ਰਗਟਾਈ ਹੈ।

ਬੋਰਡ ਦੇ ਅੰਕੜਿਆਂ ਅਨੁਸਾਰ, ਇਸ ਸਾਲ ਅੰਗਰੇਜ਼ੀ ਵਿੱਚ 12,459 ਵਿਦਿਆਰਥੀ ਫੇਲ੍ਹ ਹੋਏ ਹਨ ਜੋ ਕਿ ਸਾਰੇ ਮੁੱਖ ਵਿਸ਼ਿਆਂ ਵਿੱਚੋਂ ਸਭ ਤੋਂ ਵੱਧ ਹੈ। ਕੁੱਲ 2,65,417 ਵਿਦਿਆਰਥੀ ਪ੍ਰੀਖਿਆ ਵਿੱਚ ਬੈਠੇ ਸਨ, ਜਿਨ੍ਹਾਂ ਵਿੱਚੋਂ 2,52,958 ਪਾਸ ਹੋਏ, ਜਿਸ ਨਾਲ ਇਸ ਵਿਸ਼ੇ ਦੀ ਪਾਸ ਪ੍ਰਤੀਸ਼ਤਤਾ 95.30 ਫੀਸਦੀ ਰਹੀ। ਪਿਛਲੇ ਸਾਲ ਅੰਗਰੇਜ਼ੀ ਵਿੱਚ 10,274 ਵਿਦਿਆਰਥੀ ਫੇਲ੍ਹ ਹੋਏ ਸਨ।

ਜਿਸ ਗੱਲ ਨੇ ਸਭ ਨੂੰ ਹੈਰਾਨ ਕੀਤਾ, ਉਹ ਸੀ ਸੂਬੇ ਦੀ ਮਾਂ ਬੋਲੀ ਪੰਜਾਬੀ ਵਿੱਚ ਫੇਲ੍ਹ ਹੋਣ ਵਾਲੇ ਵਿਦਿਆਰਥੀਆਂ ਦੀ ਗਿਣਤੀ। 'ਪੰਜਾਬੀ ਜਨਰਲ' ਵਿੱਚ 3,791 ਵਿਦਿਆਰਥੀ ਫੇਲ੍ਹ ਹੋਏ, ਜਦੋਂ ਕਿ 'ਪੰਜਾਬੀ ਇਲੈਕਟਿਵ' ਦੀ ਪ੍ਰੀਖਿਆ ਵਿੱਚ 1,361 ਵਿਦਿਆਰਥੀ ਪਾਸ ਨਹੀਂ ਹੋ ਸਕੇ। ਪੰਜਾਬੀ ਜਨਰਲ ਵਿੱਚ 2,65,040 ਵਿਦਿਆਰਥੀ ਪ੍ਰੀਖਿਆ ਵਿੱਚ ਬੈਠੇ ਸਨ ਅਤੇ 2,61,249 ਪਾਸ ਹੋਏ।

ਇਤਿਹਾਸ (History) ਵੀ ਵਿਦਿਆਰਥੀਆਂ ਲਈ ਇੱਕ ਔਖਾ ਵਿਸ਼ਾ ਸਾਬਤ ਹੋਇਆ। ਇਸ ਵਿਸ਼ੇ ਦੀ ਪ੍ਰੀਖਿਆ ਦੇਣ ਵਾਲੇ 1,15,086 ਵਿਦਿਆਰਥੀਆਂ ਵਿੱਚੋਂ 7,260 ਫੇਲ੍ਹ ਹੋ ਗਏ, ਜਦੋਂ ਕਿ 1,07,826 ਵਿਦਿਆਰਥੀ ਪਾਸ ਹੋਣ ਵਿੱਚ ਸਫਲ ਰਹੇ।

ਇਸ ਦੇ ਉਲਟ, ਰਵਾਇਤੀ ਤੌਰ 'ਤੇ ਮੁਸ਼ਕਲ ਮੰਨੇ ਜਾਣ ਵਾਲੇ ਵਿਸ਼ਿਆਂ ਵਿੱਚ ਇਸ ਸਾਲ ਬਿਹਤਰ ਕਾਰਗੁਜ਼ਾਰੀ ਦੇਖਣ ਨੂੰ ਮਿਲੀ। ਗਣਿਤ (Maths) ਵਿੱਚ ਪਿਛਲੇ ਸਾਲ ਦੇ 1,116 ਦੇ ਮੁਕਾਬਲੇ ਇਸ ਵਾਰ ਸਿਰਫ਼ 753 ਵਿਦਿਆਰਥੀ ਫੇਲ੍ਹ ਹੋਏ। ਗਣਿਤ ਵਿੱਚ ਬੈਠੇ 40,260 ਵਿਦਿਆਰਥੀਆਂ ਵਿੱਚੋਂ 39,507 ਪਾਸ ਹੋਏ।

ਰਾਜਨੀਤੀ ਸ਼ਾਸਤਰ (Political Science) ਵਿੱਚ ਵੀ ਸੁਧਾਰ ਦੇਖਿਆ ਗਿਆ, ਜਿੱਥੇ ਪਿਛਲੇ ਸਾਲ ਦੇ 1,361 ਦੇ ਮੁਕਾਬਲੇ ਇਸ ਵਾਰ 738 ਵਿਦਿਆਰਥੀ ਫੇਲ੍ਹ ਹੋਏ।ਉੱਥੇ ਹੀ ਅਰਥ ਸ਼ਾਸਤਰ (Economics) ਦਾ ਪ੍ਰਦਰਸ਼ਨ ਸਭ ਤੋਂ ਵਧੀਆ ਰਿਹਾ, ਜਿਸ ਵਿੱਚ ਪ੍ਰੀਖਿਆ ਦੇਣ ਵਾਲੇ ਵਿਦਿਆਰਥੀਆਂ ਵਿੱਚੋਂ ਸਿਰਫ਼ 424 ਹੀ ਫੇਲ੍ਹ ਹੋਏ।

ਡੈਮੋਕ੍ਰੇਟਿਕ ਟੀਚਰਜ਼ ਫਰੰਟ ਦੇ ਪ੍ਰਧਾਨ ਵਿਕਰਮ ਦੇਵ ਸਿੰਘ ਨੇ ਦੱਸਿਆ ਕਿ ਅੰਗਰੇਜ਼ੀ ਵਿਸ਼ਾ ਵਿਦਿਆਰਥੀਆਂ ਲਈ ਕਈ ਸਾਲਾਂ ਤੋਂ ਇੱਕ ਵੱਡੀ ਮੁਸ਼ਕਲ ਬਣਿਆ ਹੋਇਆ ਹੈ। ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਬੱਚਿਆਂ ਦੇ ਮਨਾਂ ਵਿੱਚੋਂ ਇਸ ਵਿਸ਼ੇ ਦਾ ਡਰ ਕੱਢਣਾ ਬਹੁਤ ਜ਼ਰੂਰੀ ਹੈ।

ਉਨ੍ਹਾਂ ਕਿਹਾ ਕਿ ਪੰਜਾਬੀ ਵਿੱਚ ਹਜ਼ਾਰਾਂ ਵਿਦਿਆਰਥੀਆਂ ਦਾ ਫੇਲ੍ਹ ਹੋਣਾ ਵੀ ਬਰਾਬਰ ਚਿੰਤਾਜਨਕ ਹੈ। ਉਨ੍ਹਾਂ ਨੇ ਮੰਗ ਕੀਤੀ ਕਿ ਪੜ੍ਹਾਈ ਦਾ ਪੱਧਰ ਸੁਧਾਰਨ ਲਈ ਸਰਕਾਰੀ ਅਤੇ ਸਹਾਇਤਾ ਪ੍ਰਾਪਤ ਸਕੂਲਾਂ ਵਿੱਚ ਅਧਿਆਪਕਾਂ ਦੀਆਂ ਖਾਲੀ ਪਈਆਂ ਅਸਾਮੀਆਂ ਨੂੰ ਜਲਦੀ ਤੋਂ ਜਲਦੀ ਭਰਿਆ ਜਾਵੇ।

ਇਸ ਦੌਰਾਨ, ਉਰਦੂ ਵਿਸ਼ੇ ਦਾ ਨਤੀਜਾ ਲਗਾਤਾਰ ਦੂਜੇ ਸਾਲ ਸ਼ਾਨਦਾਰ (100%) ਰਿਹਾ, ਜਿੱਥੇ ਪ੍ਰੀਖਿਆ ਵਿੱਚ ਬੈਠੇ ਸਾਰੇ 148 ਵਿਦਿਆਰਥੀ ਪਾਸ ਹੋਏ। ਜਦਕਿ ਸੰਸਕ੍ਰਿਤ ਵਿੱਚ ਸਿਰਫ਼ ਛੇ ਵਿਦਿਆਰਥੀ ਫੇਲ੍ਹ ਹੋਏ।