Prince Gill Harman ਦਾ ਪਲੇਠਾ ਨਾਵਲ ‘ਦੋ ਤਕਦੀਰਾਂ’ ਲੋਕ ਅਰਪਣ

ਪ੍ਰਸਿੱਧ ਸਾਹਿਤਕਾਰ ਨਿਰਮਲ ਦਿਓਲ ਅਤੇ ਮੰਨੇ-ਪ੍ਰਮੰਨੇ ਗੀਤਕਾਰ ਰੱਤੂ ਰੰਧਾਵਾ ਨੇ ਵਿਸ਼ੇਸ਼ ਤੌਰ ’ਤੇ ਸ਼ਿਰਕਤ ਕੀਤੀ

Harjit singh lasara

ਬ੍ਰਿਸਬਨ, 05:59 AM May 31, 2026 IST

ਬ੍ਰਿਸਬਨ ਵਿੱਚ ਹੋਈ ਸਾਹਿਤਕ ਇਕੱਤਰਤਾ ਦੀ ਝਲਕ।

ਆਸਟਰੇਲੀਆ ਦੀ ਸਰਗਰਮ ਸਾਹਿਤਕ ਸੰਸਥਾ ਆਸਟਰੇਲੀਅਨ ਪੰਜਾਬੀ ਲੇਖਕ ਸਭਾ ਬ੍ਰਿਸਬਨ ਵੱਲੋਂ ਮੈਲਬਰਨ ਦੇ ਵਸਨੀਕ ਨੌਜਵਾਨ ਲੇਖਕ ਪ੍ਰਿੰਸ ਗਿੱਲ ਹਰਮਨ ਦਾ ਪਲੇਠਾ ਨਾਵਲ ‘ਦੋ ਤਕਦੀਰਾਂ’ ਲੋਕ ਅਰਪਣ ਕੀਤਾ ਗਿਆ। ਸਮਾਗਮ ਵਿੱਚ ਪ੍ਰਸਿੱਧ ਸਾਹਿਤਕਾਰ ਨਿਰਮਲ ਦਿਓਲ ਅਤੇ ਮੰਨੇ-ਪ੍ਰਮੰਨੇ ਗੀਤਕਾਰ ਰੱਤੂ ਰੰਧਾਵਾ ਨੇ ਵਿਸ਼ੇਸ਼ ਤੌਰ ’ਤੇ ਸ਼ਿਰਕਤ ਕੀਤੀ। ਸਮਾਗਮ ਦੀ ਸ਼ੁਰੂਆਤ ਮੌਕੇ ਹਰਮਨਦੀਪ ਗਿੱਲ ਅਨੁਸਾਰ ਨਾਵਲ ‘ਦੋ ਤਕਦੀਰਾਂ’ ਪਰਵਾਸੀ ਪੰਜਾਬੀ ਸਾਹਿਤ ਵਿੱਚ ਵਾਰਤਕ ਲੇਖਣ ਵੱਲ ਸ਼ਲਾਘਾਯੋਗ ਯਤਨ ਹੈ।ਸਾਹਿਤਕ ਮਹਿਫ਼ਲ ਦੌਰਾਨ ਵੱਖ-ਵੱਖ ਕਵੀਆਂ ਅਤੇ ਲੇਖਕਾਂ ਨੇ ਆਪਣੀਆਂ ਰਚਨਾਵਾਂ ਪੇਸ਼ ਕੀਤੀਆਂ। ਵਰਿੰਦਰ ਅਲੀਸ਼ੇਰ ਨੇ ਤਾਸਮਨ ਮੈਗਜ਼ੀਨ ਵਿੱਚ ਪ੍ਰਕਾਸ਼ਿਤ ਗੁਰਸੇਵਕ ਲੰਬੀ ਦੀ ਪ੍ਰਭਾਵਸ਼ਾਲੀ ਕਵਿਤਾ ਪੜ੍ਹੀ। ਇਸ ਮੌਕੇ ਰੱਤੂ ਰੰਧਾਵਾ ਨੇ ਨਾਵਲਕਾਰ ਨੂੰ ਵਧਾਈ ਦਿੰਦਿਆਂ ਆਪਣੀ ਪ੍ਰਸਿੱਧ ਰਚਨਾ ‘ਦੁਨੀਆ ਬਹੁਤ ਸਿਆਣੀ ਹੋ ਗਈ, ਗੁੰਝਲਦਾਰ ਕਹਾਣੀ ਹੋ ਗਈ’ ਰਾਹੀਂ ਰੰਗ ਬੰਨ੍ਹਿਆ। ਨੌਜਵਾਨ ਕਵੀ ਨਰਿੰਦਰ ਨੇ ਆਪਣੀ ਕਵਿਤਾ ਅਤੇ ਸਾਹਿਤਕ ਸਫ਼ਰ ਬਾਰੇ ਵਿਚਾਰ ਸਾਂਝੇ ਕੀਤੇ। ਉਨ੍ਹਾਂ ਦੀ ਮਿੰਨੀ ਕਹਾਣੀ ‘ਖੋਟ’ ਨੂੰ ਸਰੋਤਿਆਂ ਵੱਲੋਂ ਖ਼ੂਬ ਸਰਾਹਿਆ ਗਿਆ। ਦਿਲਜੀਤ ਸਿੰਘ ਨੇ ਗੁਰਦਾਸ ਆਲਮ ਦੀ ਪ੍ਰਸਿੱਧ ਰਚਨਾ ‘ਮਾਹੀ ਮੇਰਾ ਕਾਲੇ ਰੰਗ ਦਾ, ਘਰੇ ਵੜਦਾ ਤਾਂ ਚੰਨ ਚੜ੍ਹ ਜਾਂਦਾ’ ਪੇਸ਼ ਕਰ ਕੇ ਦਰਸ਼ਕਾਂ ਦਾ ਮਨ ਮੋਹਿਆ। ਪ੍ਰਸਿੱਧ ਗ਼ਜ਼ਲਗੋ ਜਸਵੰਤ ਵਾਗਲਾ ਨੇ ਆਪਣੀਆਂ ਭਾਵਪੂਰਨ ਤਿੰਨ ਗ਼ਜ਼ਲਾਂ ਰਾਹੀਂ ਸਰੋਤਿਆਂ ਨੂੰ ਕੀਲ ਲਿਆ।

ਸਮਾਗਮ ਦੇ ਅੰਤ ਵਿੱਚ ਸਮੂਹ ਸਾਹਿਤਕਾਰਾਂ ਅਤੇ ਹਾਜ਼ਰ ਸਰੋਤਿਆਂ ਦੀ ਮੌਜੂਦਗੀ ਵਿੱਚ ਨਾਵਲ ‘ਦੋ ਤਕਦੀਰਾਂ’ ਦਾ ਰਸਮੀ ਲੋਕ ਅਰਪਣ ਅਤੇ ਸਾਹਿਤਕ ਮੈਗਜ਼ੀਨ ‘ਤਾਸਮਨ’ ਦਾ 20ਵਾਂ ਅੰਕ ਜਨਤਕ ਕੀਤਾ ਗਿਆ। ਸਮਾਗਮ ਵਿੱਚ ਮੇਹਰ ਚੰਦ ਵਾਗਲਾ, ਮਾਤਾ ਸੁਰਜੀਤ ਕੌਰ, ਗਿਆਨ ਚੰਦ ਅਤੇ ਹੋਰ ਸਾਹਿਤ ਪ੍ਰੇਮੀਆਂ ਨੇ ਸ਼ਮੂਲੀਅਤ ਕੀਤੀ। ਮੰਚ ਸੰਚਾਲਨ ਦਿਨੇਸ਼ ਸ਼ੇਖੂਪੁਰੀਆ ਨੇ ਆਪਣੇ ਕਾਵਿਕ ਅਤੇ ਪ੍ਰਭਾਵਸ਼ਾਲੀ ਅੰਦਾਜ਼ ’ਚ ਕੀਤਾ। ਇਹ ਸਾਹਿਤਕ ਸਮਾਗਮ ਪਰਵਾਸੀ ਪੰਜਾਬੀ ਸਾਹਿਤ ਨੂੰ ਪ੍ਰਫੁੱਲਤ ਕਰਨ ਅਤੇ ਨੌਜਵਾਨ ਲੇਖਕਾਂ ਨੂੰ ਹੱਲਾਸ਼ੇਰੀ ਦੇਣ ਦਾ ਸਫਲ ਉਪਰਾਲਾ ਸਾਬਤ ਹੋਇਆ।

Tags :