Zila Parishad ਬਰਨਾਲਾ ਦੀ ਚੇਅਰਮੈਨੀ ਦਾ ਨੋਟੀਫਿਕੇਸ਼ਨ ਜਾਰੀ: ਸੱਤਾਧਿਰ ’ਚ ਖਿੱਚੋਤਾਣ ਸ਼ੁਰੂ
ਚੇਅਰਮੈਨ ਦੀ ਚੋਣ ਲਈ ਜ਼ਿਲ੍ਹਾ ਪਰਿਸ਼ਦ ਮੈਂਬਰਾਂ ਦੀ ਰੱਖੀ ਮੀਟਿੰਗ ਵੀ ਪ੍ਰਸ਼ਾਸਨ ਨੇ ਕੀਤੀ ਰੱਦ
ਸੂਬਾ ਸਰਕਾਰ ਵੱਲੋਂ ਜ਼ਿਲ੍ਹਾ ਪਰਿਸ਼ਦ ਚੇਅਰਮੈਨੀ ਦੇ ਰਾਖਵੇਂਕਰਨ ਦਾ ਨੋਟੀਫਿਕੇਸ਼ਨ ਹੁੰਦਿਆਂ ਹੀ ਬਰਨਾਲਾ ਜ਼ਿਲ੍ਹੇ ਦੀ ਚੇਅਰਮੈਨੀ ਲਈ ਸਰਗਮੀਆਂ ਵਧ ਗਈਆਂ ਹਨ। ਸਰਕਾਰ ਵਲੋਂ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ ਬਰਨਾਲਾ ਦੀ ਚੇਅਰਮੈਨੀ ਔਰਤ (ਜਨਰਲ) ਅਤੇ ਉਪ ਚੇਅਰਮੈਨੀ ਐਸਸੀ(ਮਰਦ) ਲਈ ਰਾਖਵੀਂ ਰੱਖੀ ਗਈ ਹੈ। ਜ਼ਿਲ੍ਹੇ ਦੇ ਤਿੰਨੇ ਵਿਧਾਨ ਸਭਾ ਹਲਕਿਆਂ ਅੰਦਰ ਸੱਤਾਧਿਰ ਵਲੋਂ ਚੇਅਰਮੈਨ ਲਈ ਦਾਅਵੇਦਾਰੀ ਤੇਜ਼ ਕੀਤੀ ਗਈ ਹੈ। ਜ਼ਿਲ੍ਹੇ ’ਚੋਂ ਤਿੰਨ ਸੱਤਾਧਿਰ ਆਮ ਆਦਮੀ ਪਾਰਟੀ ਦੇ ਔਰਤ (ਜਨਰਲ) ਉਮੀਦਵਾਰ ਜੇਤੂ ਰਹੇ ਹਨ ਜਿਹਨਾਂ ਵਿੱਚੋਂ ਮਹਿਲ ਕਲਾਂ ਹਲਕੇ ਵਿੱਚੋਂ ਮਹਿਲ ਕਲਾਂ ਤੇ ਠੁੱਲੀਵਾਲ ਜ਼ੋਨ ਤੇ ਬਰਨਾਲਾ ਹਲਕੇ ਤੋਂ ਬਡਬਰ ਜ਼ੋਨ ਸ਼ਾਮਲ ਹਨ। ਜਿਸ ਕਰਕੇ ਮਹਿਲ ਕਲਾਂ ਹਲਕੇ ਵਿੱਚ ਚੇਅਰਮੈਨੀ ਜਾਣੀ ਲਗਭਗ ਤੈਅ ਹੈ। ਸੂਤਰਾਂ ਅਨੁਸਾਰ ਹਲਕਾ ਵਿਧਾਇਕ ਇਨ੍ਹਾਂ ਦੋਵਾਂ ਵਿੱਚੋਂ ਇੱਕ ਨਾਲ ਸਹਿਮਤ ਅਤੇ ਇੱਕ ਨਾਲ ਅਸਹਿਮਤ ਮੰਨੇ ਜਾ ਰਹੇ ਹਨ।
ਉੱਥੇ ਨੋਟੀਫ਼ਿਕੇਸ਼ਨ ਜਾਰੀ ਹੋਣ ਉਪਰੰਤ ਬਰਨਾਲਾ ਪ੍ਰਸ਼ਾਸਨ ਵਲੋਂ ਚੇਅਰਮੈਨ ’ਤੇ ਉਪ ਚੇਅਰਮੈਨ ਲਈ ਸਮੁੱਚੇ ਜ਼ਿਲ੍ਹਾ ਪਰਿਸ਼ਦ ਮੈਂਬਰਾਂ ਦੀ ਵੀਰਵਾਰ ਸ਼ਾਮ 4 ਵਜੇ ਮੀਟਿੰਗ ਵੀ ਰੱਖੀ ਗਈ ਸੀ। ਪਰ ਕੁੱਝ ਸਮੇਂ ਬਾਅਦ ਹੀ ਇਸ ਮੀਟਿੰਗ ਨੂੰ ਰੱਦ ਕਰ ਦਿੱਤਾ ਗਿਆ। ਅਧਿਕਾਰੀ ਮੀਟਿੰਗ ਦੇ ਰੱਦ ਹੋਣ ਨੂੰ ਪ੍ਰਸ਼ਾਸਨਿਕ ਦੇ ਰੁਟੀਨ ਦਾ ਹਿੱਸਾ ਦੱਸ ਰਹੇ ਹਨ ਪਰ ਇਸ ਪਿੱਛੇ ਮਹਿਲ ਕਲਾਂ ਤੋਂ ਐਮ.ਐਲ.ਏ(MLA) ਦੀ ਅਸਹਿਮਤੀ ਮੰਨੀ ਜਾ ਰਹੀ ਹੈ।
ਜ਼ਿਕਰਯੋਗ ਹੈ ਕਿ ਬਰਨਾਲਾ ਜ਼ਿਲ੍ਹੇ ਵਿੱਚ 10 ਜ਼ਿਲ੍ਹਾ ਪਰਿਸ਼ਦ ਮੈਂਬਰ ਹਨ। ਜਿਨਾਂ ਵਿੱਚੋਂ ਆਮ ਆਦਮੀ ਪਾਰਟੀ ਨੇ ਚਾਰ ਵਿਧਾਨ ਸਭਾ ਹਲਕਾ ਮਹਿਲ ਕਲਾਂ, ਦੋ ਬਰਨਾਲਾ ਅਤੇ ਦੋ ਭਦੌੜ ਹਲਕੇ ਵਿੱਚੋਂ ਜਿੱਤੇ ਹਨ। ਜਦੋਂਕਿ ਸ਼੍ਰੋਮਣੀ ਅਕਾਲੀ ਦਲ ਨੇ ਭਦੌੜ ਹਲਕੇ ਦੇ ਦੋ ਜ਼ਿਲ੍ਹਾ ਪਰਿਸ਼ਦ ਮੈਂਬਰਾਂ ਉੱਪਰ ਜਿੱਤ ਹਾਸਿਲ ਕੀਤੀ ਸੀ।
