ਮਹਿੰਦਰ ਸਿੰਘ ਰੱਤੀਆਂ
ਮੋਗਾ, 23 ਫਰਵਰੀ
ਇਥੇ ਥਾਣਾ ਸਦਰ ਪੁਲੀਸ ਨੇ ਲੰਘੀ ਦੇਰ ਸ਼ਾਮ ਪਿੰਡ ਦੌਲਤਪੁਰਾ ਉੱਚਾ ਵਿਖੇ ਛਾਪੇ ਦੌਰਾਨ ਯੂਥ ਕਾਂਗਰਸ ਆਗੂ ਦੇ ਘਰ ਵਿੱਚੋਂ 23 ਬੋਰੀਆਂ ਭੁੱਕੀ ਬਰਾਮਦ ਕੀਤੀ। ਸਦਰ ਪੁਲੀਸ ਨੇ ਮੁਲਜ਼ਮ ਯੂਥ ਕਾਂਗਰਸ ਆਗੂ ਅਤੇ ਉਸ ਦੇ ਪਿਉ ਖ਼ਿਲਾਫ਼ ਐੱਨਡੀਪੀਐੱਸ ਐਕਟ ਅਧੀਨ ਕੇਸ ਦਰਜ ਕਰਕੇ ਦੋਵਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਜਾਂਚ ਅਧਿਕਾਰੀ ਏਐੱਆਈ ਬਲਵਿੰਦਰ ਸਿੰਘ ਮੁਤਾਬਕ ਏਐੱਸਆਈ ਤਰਸੇਮ ਸਿੰਘ ਪੁਲੀਸ ਪਾਰਟੀ ਸਮੇਤ ਗਸ਼ਤ ਕਰ ਰਿਹਾ ਸੀ। ਇਸ ਦੌਰਾਨ ਇਤਲਾਹ ਮਿਲੀ ਕਿ ਮੁਲਜਮਾਂ ਦੇ ਘਰ ਅੰਦਰ ਭੁੱਕੀ ਦੀ ਖੇਪ ਹੈ ਅਤੇ ਉਹ ਗੱਡੀ ਵਿੱਚ ਲਿਆ ਕੇ ਭੁੱਕੀ ਸਪਲਾਈ ਕਰਦੇ ਹਨ। ਇਸ ਦੌਰਾਨ ਛਾਪੇ ਦੌਰਾਨ ਭੁੱਕੀ ਬਰਾਮਦ ਹੋਈ। ਉਨ੍ਹਾਂ ਦੱਸਿਆ ਕਿ ਦੋਵਾਂ ਮੁਲਜ਼ਮਾਂ ਗੁਰਪ੍ਰੀਤ ਸਿੰਘ ਤੇ ਉਸ ਦੇ ਪਿਤਾ ਸੁਖਦੇਵ ਸਿੰਘ ਪਿੰਡ ਦੌਲਤਪੁਰਾ ਉੱਚਾ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਮੁਲਜ਼ਮਾਂ ਦੇ ਘਰ ਵਿੱਚੋਂ 23 ਗੱਟੇ (ਕੁੱਲ 4.60 ਕੁਇੰਟਲ) ਭੁੱਕੀ ਬਰਾਮਦ ਕੀਤੀ ਗਈ ਹੈ। ਮੁਲਜ਼ਮ ਗੁਰਪ੍ਰੀਤ ਸਿੰਘ ਹਾਕਮ ਧਿਰ ਦੇ ਕਈ ਆਗੂਆਂ ਦਾ ਕਰੀਬੀ ਹੋਣ ਕਾਰਨ ਉਸ ਦੀ ਪੁਲੀਸ ਵਿੱਚ ਤੂਤੀ ਬੋਲਦੀ ਸੀ।