ਟ੍ਰਿਬਿਊਨ ਨਿਊਜ਼ ਸਰਵਿਸ
ਚੰਡੀਗੜ੍ਹ, 27 ਮਈ
ਪੰਜਾਬ ਵਿੱਚ ਹੁਣ ਫ਼ਰਦਾਂ ਦੀ ਹੋਮ ਡਲਿਵਰੀ ਹੋਵੇਗੀ। ‘ਆਪ’ ਸਰਕਾਰ ਵੱਲੋਂ ਮਾਲ ਵਿਭਾਗ ’ਚ ਸੁਧਾਰਾਂ ਦੇ ਮੱਦੇਨਜ਼ਰ ਆਨਲਾਈਨ ਸੇਵਾਵਾਂ ਦੀ ਸ਼ੁਰੂਆਤ ਕੀਤੀ ਜਾਵੇਗੀ। ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਇਨ੍ਹਾਂ ਸੁਧਾਰਾਂ ਨੂੰ ਫ਼ੌਰੀ ਲਾਗੂ ਕਰਨ ਦੀ ਹਦਾਇਤ ਕੀਤੀ ਹੈ। ਮਾਲ ਵਿਭਾਗ ਵੱਲੋਂ ਫ਼ਰਦਾਂ ਦੀ ਹੋਮ ਡਲਿਵਰੀ ਸ਼ੁਰੂ ਕੀਤੀ ਜਾ ਰਹੀ ਹੈ। ਪੰਜਾਬ ਵਿਚ ਇਸ ਵੇਲੇ 172 ਫ਼ਰਦ ਕੇਂਦਰ ਅਤੇ 516 ਸੇਵਾ ਕੇਂਦਰ ਹਨ, ਜਿਨ੍ਹਾਂ ਜ਼ਰੀਏ ਜਮ੍ਹਾਂਬੰਦੀਆਂ ਦੀਆਂ ਪ੍ਰਮਾਣਿਤ ਕਾਪੀਆਂ ਦੀ ਸਹੂਲਤ ਦਿੱਤੀ ਗਈ ਹੈ। ਪੰਜਾਬ ਦੇ ਲੋਕਾਂ ਨੂੰ ਹੋਮ ਡਲਿਵਰੀ ਦੀ ਸਹੂਲਤ ਦੇਣ ਦਾ ਮੁੱਖ ਮੰਤਵ ਭ੍ਰਿਸ਼ਟਾਚਾਰ ਨੂੰ ਠੱਲਣਾ ਹੈ।
ਪਤਾ ਲੱਗਾ ਹੈ ਕਿ ਹੋਮ ਡਲਿਵਰੀ ਲਈ ਡਾਕ ਵਿਭਾਗ ਨਾਲ ਗੱਲਬਾਤ ਨੇਪਰੇ ਚਾੜ੍ਹ ਲਈ ਗਈ ਹੈ। ਸਰਕਾਰੀ ਬੁਲਾਰੇ ਦਾ ਕਹਿਣਾ ਹੈ ਕਿ ਫ਼ਰਦਾਂ ਦੀ ਹੋਮ ਡਲਿਵਰੀ ਨਾਲ ਲੋਕਾਂ ਦੀ ਖੱਜਲ-ਖੁਆਰੀ ਨਹੀਂ ਹੋਵੇਗੀ ਅਤੇ ਲੋਕਾਂ ਨੂੰ ਕਿਧਰੇ ਕਾਊਂਟਰਾਂ ’ਤੇ ਕਤਾਰਾਂ ਵਿਚ ਵੀ ਨਹੀਂ ਲੱਗਣਾ ਪਵੇਗਾ। ਗਿਰਦਾਵਰੀ ਫ਼ੋਨ ’ਤੇ ਦੇਖਣ ਦੀ ਸਹੂਲਤ ਵੀ ਜਲਦੀ ਸ਼ੁਰੂ ਕੀਤੀ ਜਾਣੀ ਹੈ। ਐੱਸਐੱਮਐੱਸ ਅਤੇ ਈਮੇਲ ਜ਼ਰੀਏ ਵੀ ਇਹ ਸਹੂਲਤ ਦੇਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਬਦਲੇ ਵਿਚ ਹੋਮ ਡਲਿਵਰੀ ਦੀ ਫ਼ੀਸ ਜ਼ਰੂਰ ਵਸੂਲ ਕੀਤੀ ਜਾਵੇਗੀ। ਬੇਸ਼ੱਕ ਹੁਣ ਮਾਲ ਵਿਭਾਗ ਦੀ ਵੈੱਬਸਾਈਟ ’ਤੇ ਜਮ੍ਹਾਂਬੰਦੀਆਂ ਮੌਜੂਦ ਸਨ ਪ੍ਰੰਤੂ ਉਨ੍ਹਾਂ ਦੀ ਆਨਲਾਈਨ ਪ੍ਰਮਾਣਿਤ ਕਾਪੀ ਦੀ ਸਹੂਲਤ ਨਹੀਂ ਹੈ।