fake suicide drama: ਖ਼ੁਦਕੁਸ਼ੀ ਦਾ ਡਰਾਮਾ ਰਚਣ ਵਾਲਾ ਪੈਟਰੋਲ ਪੰਪ ਕਰਮਚਾਰੀ ਗ੍ਰਿਫ਼ਤਾਰ

ਗਬਨ ਮਗਰੋਂ ਜੈਪੁਰ ਦੇ ਹੋਟਲਾਂ ’ਚ ਲੁਕਦਾ ਰਿਹਾ; 4.30 ਲੱਖ ਰੁਪਏ ਬਰਾਮਦ

IKBAL SINGH SHANT

ਡੱਬਵਾਲੀ, 02:33 AM Aug 07, 2026 IST

ਡੀ ਐੱਸ ਪੀ ਯੋਗੇਸ਼ ਕਟਾਰੀਆ ਮਾਮਲੇ ਬਾਰੇ ਜਾਣਕਾਰੀ ਦਿੰਦੇ ਹੋਏ।

ਸਥਾਨਕ ਪੁਲੀਸ ਨੇ 8.64 ਲੱਖ ਰੁਪਏ ਦੇ ਗਬਨ ਮਗਰੋਂ ਖ਼ੁਦਕੁਸ਼ੀ ਦਾ ਡਰਾਮਾ ਰਚ ਕੇ ਫਰਾਰ ਹੋਏ ਪੈਟਰੋਲ ਪੰਪ ਕਰਮਚਾਰੀ ਨੂੰ ਜੈਪੁਰ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਸੀ ਆਈ ਏ ਡੱਬਵਾਲੀ ਨੇ ਉਸ ਕੋਲੋਂ 4.30 ਲੱਖ ਰੁਪਏ ਦੀ ਨਕਦੀ ਵੀ ਬਰਾਮਦ ਕੀਤੀ ਹੈ।ਮੁਲਜ਼ਮ ਦਯਾਰਾਮ ਡੱਬਵਾਲੀ ਪਿੰਡ ਦੇ ਪੈਟਰੋਲ ਪੰਪ ’ਤੇ ਕਰਮਚਾਰੀ ਸੀ। ਉਸ ’ਤੇ 8,64,917 ਰੁਪਏ ਦੇ ਗਬਨ ਦਾ ਦੋਸ਼ ਹੈ। ਪੁਲੀਸ ਮੁਤਾਬਕ ਹਿਸਾਬ ਸਾਹਮਣੇ ਆਉਣ ਦੇ ਡਰੋਂ ਉਸ ਨੇ ਫਰਾਰ ਹੋਣ ਲਈ ਸਾਜ਼ਿਸ਼ ਰਚੀ। 7 ਜੁਲਾਈ ਨੂੰ ਉਹ ਆਪਣੀ ਬੱਚੀ ਨੂੰ ਨਾਲ ਲੈ ਕੇ ਅਬੁੱਬਸ਼ਹਿਰ ਨੇੜੇ ਰਾਜ ਕਨਾਲ ਨਹਿਰ ਕੋਲ ਪੁੱਜਿਆ। ਉਥੇ ਉਸ ਨੇ ਬੱਚੀ ਸਮੇਤ ਖ਼ੁਦਕੁਸ਼ੀ ਦਾ ਭੁਲੇਖਾ ਪਾਉਣ ਲਈ ਆਪਣਾ ਮੋਟਰਸਾਈਕਲ, ਜੁੱਤੇ, ਬੱਚੀ ਦਾ ਸਕੂਲ ਬੈਗ ਅਤੇ ਸੈਂਡਲ ਛੱਡ ਦਿੱਤੇ। ਇਸ ਤੋਂ ਬਾਅਦ ਉਹ ਬੱਚੀ ਸਮੇਤ ਜੈਪੁਰ ਚਲਾ ਗਿਆ ਅਤੇ ਵੱਖ-ਵੱਖ ਹੋਟਲਾਂ ਵਿਚ ਰੁਕਦਾ ਰਿਹਾ।

ਡੀ ਐੱਸ ਪੀ (ਹੈੱਡਕੁਆਰਟਰ) ਯੋਗੇਸ਼ ਕਟਾਰੀਆ ਨੇ ਦੱਸਿਆ ਕਿ ਸੀ ਆਈ ਏ ਡੱਬਵਾਲੀ ਨੇ ਤਕਨੀਕੀ ਜਾਂਚ ਅਤੇ ਸੀ ਸੀ ਟੀ ਵੀ ਫੁਟੇਜ ਦੇ ਆਧਾਰ ’ਤੇ ਮਾਮਲੇ ਦਾ ਖੁਲਾਸਾ ਕੀਤਾ। 9 ਜੁਲਾਈ ਨੂੰ ਮੁਲਜ਼ਮ ਦੇ ਭਰਾ ਨੇ ਉਸ ਦੇ ਲਾਪਤਾ ਹੋਣ ਜਾਂ ਖੁਦਕੁਸ਼ੀ ਕਰਨ ਦਾ ਸ਼ੱਕ ਜਤਾਉਂਦਿਆਂ ਸ਼ਿਕਾਇਤ ਦਿੱਤੀ ਸੀ। ਬਾਅਦ ਵਿਚ ਪੈਟਰੋਲ ਪੰਪ ਸੰਚਾਲਕ ਦੀ ਸ਼ਿਕਾਇਤ ’ਤੇ 13 ਜੁਲਾਈ ਨੂੰ ਕੇਸ ਦਰਜ ਕੀਤਾ ਗਿਆ।

ਡੀ ਐੱਸ ਪੀ ਮੁਤਾਬਕ ਸੀ ਆਈ ਏ ਦੇ ਮੁਖੀ ਸ਼ੈਲੇਂਦਰ ਕੁਮਾਰ ਦੀ ਅਗਵਾਈ ਹੇਠ ਟੀਮ ਨੇ ਸੁਰਾਗ਼ਾਂ ਅਤੇ ਤਕਨੀਕੀ ਸਬੂਤਾਂ ਦੇ ਆਧਾਰ ’ਤੇ ਜੈਪੁਰ ਵਿਚ ਛਾਪਾ ਮਾਰ ਕੇ ਮੁਲਜ਼ਮ ਨੂੰ ਕਾਬੂ ਕੀਤਾ। ਉਸ ਦੀ ਬੱਚੀ ਨੂੰ ਪਰਿਵਾਰ ਹਵਾਲੇ ਕਰ ਦਿੱਤਾ ਗਿਆ ਹੈ। ਬਾਕੀ ਰਕਮ ਦੀ ਬਰਾਮਦਗੀ ਲਈ ਜਾਂਚ ਜਾਰੀ ਹੈ।

Tags :