Punjab Police: ਪੰਜਾਬ ਵਿੱਚ ਵੀ Facial Recognition System ਚਾਲੂ

ਸ਼ਹੀਦ ਕਰਨੈਲ ਸਿੰਘ ਦੀ ਯਾਦ ਵਿੱਚ ਈਸੜੂ ਪਿੰਡ ’ਚ ਰਾਜ ਪੱਧਰੀ ਸਮਾਗਮ ਲਈ ਕੀਤੇ ਸੁਰੱਖਿਆ ਪ੍ਰਬੰਧਾਂ ਦੌਰਾਨ ਖੰਨਾ ਪੁਲੀਸ ਨੇ ਇਸ ਤਕਨਾਲੋਜੀ ਦੀ ਅਜ਼ਮਾਇਸ਼ ਕੀਤੀ। ਇਹ ਸਿਸਟਮ ਉੱਚ ਤਕਨੀਕੀ ਵੈਨ ਵਿੱਚ ਲੱਗਾ ਸੀ ਜਿਸ ਤੋਂ ਲਾਈਵ ਸਕੈਨਿੰਗ ਕੀਤੀ ਗਈ। ਸਮਾਗਮ ਵਾਲੀ ਥਾਂ ’ਤੇ ਸੀ ਸੀ ਟੀ ਵੀ ਕੈਮਰੇ ਵੀ ਲਾਏ ਗਏ ਸਨ। ਸਮਾਗਮ ਵਿੱਚ ਸ਼ਾਮਲ ਕੈਬਨਿਟ ਮੰਤਰੀ ਤਰੁਣਪ੍ਰੀਤ ਸਿੰਘ ਸੌਂਧ ਨੇ ਖੰਨਾ ਪੁਲੀਸ ਵੱਲੋਂ ਕੀਤੇ ਸੁਰੱਖਿਆ ਪ੍ਰਬੰਧਾਂ ਦੀ ਸ਼ਲਾਘਾ ਕੀਤੀ ਹੈ। ਖੰਨਾ ਪੁਲੀਸ ਦੀ ਇਹ ਪਹਿਲਕਦਮੀ ਪੰਜਾਬ ਪੁਲੀਸ ਦੇ ਮੁਖੀ ਗੌਰਵ ਯਾਦਵ ਦੇ ਧਿਆਨ ਵਿੱਚ ਵੀ ਲਿਆਂਦੀ ਗਈ ਹੈ। ਪੰਜਾਬ ਪੁਲੀਸ ਦੇ ਤਕਨੀਕੀ ਸੇਵਾ ਵਿੰਗ ਨੂੰ ਹੁਣ ਇਸ ਸਬੰਧੀ ਪੇਸ਼ਕਾਰੀ ਦਿੱਤੀ ਜਾਵੇਗੀ, ਉਥੋਂ ਹਰੀ ਝੰਡੀ ਮਗਰੋਂ ਇਸ ਨੂੰ ਪੂਰੇ ਪੰਜਾਬ ਵਿੱਚ ਲਾਗੂ ਕੀਤਾ ਜਾ ਸਕਦਾ ਹੈ।

ਖੰਨਾ ਦੇ ਐੱਸ ਐੱਸ ਪੀ ਦਰਪਣ ਆਹਲੂਵਾਲੀਆ ਦੇ ਦਿਮਾਗ ਦੀ ਉਪਜ ਇਹ ਸਿਸਟਮ ਖੰਨਾ ਪੁਲੀਸ ਦੇ ਸਾਈਬਰ ਅਤੇ ਤਕਨੀਕੀ ਵਿੰਗ ਵੱੱਲੋਂ ਵਿਕਸਤ ਕੀਤਾ ਗਿਆ ਹੈ। ਐੱਸ ਐੱਸ ਪੀ ਨੇ ਦੱੱਸਿਆ ਕਿ ਇਸ ਸਾਲ ਈਸੜੂ ਵਿੱਚ ਸੁਰੱਖਿਆ ਪ੍ਰਬੰਧਾਂ ਦੀ ਸਭ ਤੋਂ ਵੱਡ ਖਿੱਚ ਚਿਹਰੇ ਦੀ ਪਛਾਣ ਵਾਲੀ ਪ੍ਰਣਾਲੀ ਦੀ ਤਾਇਨਾਤੀ ਸੀ। ਪੰਜਾਬ ਵਿੱਚ ਆਪਣੀ ਕਿਸਮ ਦੀ ਇਹ ਪਹਿਲੀ ਵਰਤੋਂ ਸੀ। ਤਕਨਾਲੋਜੀ ਦੀ ਮਦਦ ਨਾਲ ਸੀ ਸੀ ਟੀ ਵੀ ਫੁਟੇਜ ਅਤੇ ਲਾਈਵ ਕੈਮਰਾ ਫੀਡ ਦੀ ਵਰਤੋਂ ਕਰ ਕੇ ਮਸ਼ਕੂਕ ਅਤੇ ਲੋੜੀਂਦੇ ਅਪਰਾਧੀਆਂ ਦੀ ਪਛਾਣ ਕਰਨ ਦੇ ਪ੍ਰਬੰਧ ਕੀਤੇ ਗਏ ਸਨ। ਲੋੜੀਂਦੇ ਵਿਅਕਤੀ ਦੀ ਫੋਟੋ ਅਤੇ ਸਬੰਧਤ ਵੇਰਵਿਆਂ ਨੂੰ ਐੱਫ ਆਰ ਐੱਸ ’ਤੇ ਅਪਲੋਡ ਕਰਨ ਤੋਂ ਬਾਅਦ ਸੀ ਸੀ ਟੀ ਵੀ ਕੈਮਰਿਆਂ ਅਤੇ ਲਾਈਵ ਫੀਡ ਵਿੱਚ ਜੇ ਕੋਈ ਸੰਭਾਵੀ ਮੇਲ ਪਤਾ ਲੱਗਦਾ ਹੈ, ਤਾਂ ਸਿਸਟਮ ਤੁਰੰਤ ਵਿਅਕਤੀ ਦਾ ਨਾਮ, ਸਥਾਨ ਅਤੇ ਖੋਜ ਦੀ ਮਿਤੀ ਅਤੇ ਸਮਾਂ ਪ੍ਰਦਰਸ਼ਿਤ ਕਰਦੇ ਹੋਏ ਚਿਤਾਵਨੀ ਜਾਰੀ ਕਰਦਾ ਹੈ। ਹਰੇਕ ਚਿਤਾਵਨੀ ਡੈਸ਼ਬੋਰਡ ’ਤੇ ਲੌਗ ਹੋ ਜਾਂਦੀ ਹੈ, ਜਿਸ ਨਾਲ ਪੁਲੀਸ ਅਧਿਕਾਰੀ ਤਸਦੀਕ ਅਤੇ ਹੋਰ ਜਾਂਚ ਕਰ ਸਕਦੇ ਹਨ।