ਕਥਿਤ ਨਸ਼ੇੜੀ ਵੱਲੋਂ ਲੁੱਟ ਦੀ ਕੋਸ਼ਿਸ਼ ਦੌਰਾਨ ਬਿਰਧ ਮਹਿਲਾ ਦੀ ਕੁੱਟਮਾਰ

ਜਾਣਕਾਰੀ ਮੁਤਾਬਕ ਦੁਪਹਿਰੇ ਤਕਰੀਬਨ 1 ਵਜੇ ਪੀੜਤ ਮਹਿਲਾ ਪੁਰਾਣੇ ਹਾਈ ਕੋਰਟ ਬਾਜ਼ਾਰ ਵਿਖੇ ਬੈਂਕ ਵਿੱਚੋਂ 20,000 ਰੁਪਏ ਕਢਵਾ ਕੇ ਈ-ਰਿਕਸ਼ਾ ਰਾਹੀਂ ਘਰ ਜਾ ਰਹੀ ਸੀ। ਜਿਵੇਂ ਹੀ ਉਹ ਮੋਤੀ ਬਾਗ ਗਲੀ ਨੰਬਰ 3 ਦੇ ਮੋੜ 'ਤੇ ਉਤਰ ਕੇ ਪੈਦਲ ਆਪਣੇ ਘਰ ਨੂੰ ਜਾਣ ਲੱਗੀ, ਤਾਂ ਇੱਕ ਵਿਅਕਤੀ ਨੇ ਮਹਿਲਾ ਕੋਲੋਂ ਉਸ ਦਾ ਥੈਲਾ ਖੋਹਣ ਦੀ ਕੋਸ਼ਿਸ਼ ਕੀਤੀ, ਪਰ ਬਿਰਧ ਮਹਿਲਾ ਨੇ ਥੈਲਾ ਨਾ ਛੱਡਿਆ। ਜਦੋਂ ਉਹ ਸੰਘਰਸ਼ ਕਰਦੇ ਹੋਏ ਹੇਠਾਂ ਡਿੱਗ ਗਈ, ਤਾਂ ਥੈਲਾ ਛੁਡਵਾਉਣ ਲਈ ਝਪਟਮਾਰ ਨੇ ਉਸ ਦੇ ਢਿੱਡ ਵਿੱਚ ਲੱਤਾਂ ਮਾਰੀਆਂ। ਰੌਲਾ ਸੁਣ ਕੇ ਜਦੋਂ ਲੋਕਾਂ ਨੇ ਬਾਹਰ ਆ ਕੇ ਉਕਤ ਵਾਰਦਾਤ ਹੁੰਦੀ ਦੇਖੀ, ਤਾਂ ਨੇੜੇ ਖੜ੍ਹਾ ਇੱਕ ਮੋਟਰਸਾਈਕਲ ਸਵਾਰ ਤਾਂ ਫ਼ਰਾਰ ਹੋ ਗਿਆ, ਪਰ ਕੁੱਟਮਾਰ ਕਰਨ ਵਾਲੇ ਮੁਲਜ਼ਮ ਨੂੰ ਲੋਕਾਂ ਨੇ ਪਿੱਛਾ ਕਰਕੇ ਧਰ ਦਬੋਚਿਆ।

ਇਸ ਤੋਂ ਬਾਅਦ ਉਸ ਨੂੰ ਖੰਭੇ ਨਾਲ ਬੰਨ੍ਹ ਲਿਆ ਅਤੇ ਪੁਲੀਸ ਨੂੰ ਇਤਲਾਹ ਕਰ ਦਿੱਤੀ। ਮੌਕੇ 'ਤੇ ਮੌਜੂਦ ਇੱਕ ਵਿਅਕਤੀ ਨੇ ਦੱਸਿਆ ਕਿ ਉਸ ਕੋਲੋਂ ਇੱਕ ਸਰਿੰਜ ਬਰਾਮਦ ਕੀਤੀ ਗਈ ਅਤੇ ਉਸ ਨੇ ਕਥਿਤ ਤੌਰ ਉੱਤੇ ਮੰਨਿਆ ਕਿ ਉਹ ਰੋਹਟੀ ਦੇ ਪੁਲਾਂ ਤੋਂ ਨਸ਼ਾ ਖ਼ਰੀਦਦਾ ਹੈ। ਮੌਕੇ 'ਤੇ ਮੌਜੂਦ ਲੋਕਾਂ ਨੇ ਦੱਸਿਆ ਕਿ ਇਸ ਸਾਰੇ ਵਾਕਿਆ ਦੀ ਵੀਡੀਓ ਵੀ ਬਣਾਈ ਗਈ ਅਤੇ ਪੁਲੀਸ ਦੇ ਪਹੁੰਚਣ 'ਤੇ ਉਸ ਨੂੰ ਪੁਲੀਸ ਦੇ ਸਪੁਰਦ ਕਰ ਦਿੱਤਾ।

ਇਸ ਮੌਕੇ ਐੱਸ ਐੱਚ ਓ ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਇੱਕ ਮੁਲਜ਼ਮ ਪੁਲੀਸ ਹਿਰਾਸਤ ਵਿੱਚ ਹੈ ਅਤੇ ਦੂਜੇ ਦੀ ਭਾਲ ਜਾਰੀ ਹੈ। ਉਨ੍ਹਾਂ ਕਿਹਾ ਕਿ ਪੁਲੀਸ ਨੂੰ ਕੋਈ ਸਰਿੰਜ ਬਰਾਮਦ ਨਹੀਂ ਹੋਈ, ਹੋ ਸਕਦਾ ਹੈ ਕਿ ਲੋਕਾਂ ਨਾਲ ਜੱਦੋ-ਜਹਿਦ ਦੌਰਾਨ ਉੱਥੇ ਡਿੱਗ ਗਈ ਹੋਵੇ। ਉਨ੍ਹਾਂ ਕਿਹਾ ਕਿ ਮਾਮਲੇ ਦੀ ਜਾਂਚ ਜਾਰੀ ਹੈ।