ਜੈਸਮੀਨ ਭਾਰਦਵਾਜ
ਨਾਭਾ, 15 ਫਰਵਰੀ
ਆਮ ਆਦਮੀ ਪਾਰਟੀ ਦੇ ਮੁੱਖ ਮੰਤਰੀ ਅਹੁਦੇ ਦੇ ਉਮੀਦਵਾਰ ਭਗਵੰਤ ਮਾਨ ਖਿਲਾਫ ਨਾਭਾ ਦੇ ਵਕੀਲ ਹਰਕੀਰਤ ਸਿੰਘ ਸਕਰਾਲੀ ਵੱਲੋਂ ਚੋਣ ਕਮਿਸ਼ਨ ਨੂੰ ਸ਼ਿਕਾਇਤ ਦਰਜ ਕਰਾਈ ਗਈ ਕਿ ਭਗਵੰਤ ਮਾਨ ਨੇ ਵਿਆਹੇ ਹੋਣ ਦੇ ਬਾਵਜੂਦ ਆਪਣੀ ਪਤਨੀ ਦੀ ਸੰਪਤੀ ਦਾ ਵੇਰਵਾ ਆਪਣੇ ਹਲਫੀਆ ਬਿਆਨ ਵਿਚ ਨਹੀਂ ਦਿੱਤਾ। ਉਨ੍ਹਾਂ ਕਿਹਾ ਕਿ ਭਗਵੰਤ ਮਾਨ ਦਾ ਤਲਾਕ ਨਹੀਂ ਹੋਇਆ ਤੇ ਉਨ੍ਹਾਂ ਆਪਣੇ ਵਿਆਹ ਦੀ ਸਥਿਤੀ ਬਾਰੇ ਵੀ ਕੁਝ ਜਾਣਕਾਰੀ ਨਾ ਦਿੰਦੇ ਹੋਏ ਨਾਟ ਐਪਲੀਕੇਬਲ ਲਿਖਿਆ ਹੈ, ਜੋ ਗਲਤ ਹੈ ਤੇ ਉਨ੍ਹਾਂ ਨੂੰ ਤਲਾਕ ਜਾਂ ਵਿਆਹੇ ਹੋਣ ’ਚੋਂ ਇੱਕ ਵਿਕਲਪ ਦੱਸਣਾ ਚਾਹੀਦਾ ਸੀ। ਸਕਰਾਲੀ ਨੇ ਦੱਸਿਆ ਮਾਨ ਅਤੇ ਉਨ੍ਹਾਂ ਦੀ ਪਤਨੀ ਵੱਲੋਂ ਸਾਲ 2015 ਵਿਚ ਤਲਾਕ ਦੀ ਇੱਕ ਪਟੀਸ਼ਨ ਜ਼ਰੂਰ ਪਾਈ ਗਈ ਸੀ ਪਰ ਅਦਾਲਤ ਵੱਲੋਂ ਦਿੱਤੀਆਂ ਅਗਲੀਆਂ ਪੇਸ਼ੀਆਂ ‘ਤੇ ਇਹ ਹਾਜ਼ਰ ਨਾ ਹੋਏ ਤੇ ਆਖ਼ਰ ਅਦਾਲਤ ਨੇ ਉਹ ਪਟੀਸ਼ਨ ਖਾਰਜ ਕੀਤੀ। ਇਸ ਕਰਕੇ ਭਗਵੰਤ ਕਾਨੂੰਨੀ ਤੌਰ ‘ਤੇ ਅਜੇ ਵੀ ਸ਼ਾਦੀਸ਼ੁਦਾ ਹਨ। ਧੂਰੀ ਦੇ ਰਿਟਰਨਿੰਗ ਅਫਸਰ ਇਸਮਤ ਵਿਜੇ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਨਾਮਜ਼ਦਗੀ ਪੱਤਰ ਖਿਲਾਫ ਕਿਸੇ ਤਰਾਂ ਦੀ ਸ਼ਿਕਾਇਤ ਦਰਜ ਨਹੀਂ ਹੋਈ ਸੀ ਤੇ ਹੁਣ ਸਮਾਂ ਲੰਘਣ ’ਤੇ ਇਸ ਸਬੰਧੀ ਫੈਸਲਾ ਉੱਚ ਅਦਾਲਤ ਹੀ ਲੈ ਸਕਦੀ ਹੈ।
