Canada ’ਚ ਪੰਜਾਬੀ ਵਿਦਿਆਰਥੀਆਂ ਲਈ ਵੱਡੀ ਖ਼ਬਰ: MITT ਕਾਲਜ ਹੋਵੇਗਾ ਬੰਦ !
ਪੜ੍ਹਾਈ ਤੋਂ ਨੌਕਰੀ ਤੱਕ ਦਾ ਸਫ਼ਰ ਤੈਅ ਕਰਨ ਵਾਲੇ ਹਜ਼ਾਰਾਂ ਪੰਜਾਬੀ ਨੌਜਵਾਨਾਂ ਦੀਆਂ ਯੋਜਨਾਵਾਂ ਨੂੰ ਲੱਗਾ ਵੱਡਾ ਝਟਕਾ
ਸਤੰਬਰ ਆਉਂਦੇ ਹੀ ਕੈਨੇਡਾ ਦੇ ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਦੇ ਕੈਂਪਸ ਨਵੇਂ ਚਿਹਰਿਆਂ ਨਾਲ ਭਰ ਜਾਂਦੇ ਸਨ। ਹੱਥ ਵਿੱਚ ਦਾਖ਼ਲੇ ਦੀ ਫ਼ਾਈਲ, ਮੋਢੇ ’ਤੇ ਬੈਗ ਅਤੇ ਅੱਖਾਂ ਵਿੱਚ ਵੱਡੇ ਸੁਪਨੇ, ਇਨ੍ਹਾਂ ਚਿਹਰਿਆਂ ਵਿੱਚ ਪੰਜਾਬੀ ਨੌਜਵਾਨ ਵੀ ਵੱਡੀ ਗਿਣਤੀ ਵਿੱਚ ਹੁੰਦੇ ਸਨ। ਪਰ ਹੁਣ ਕੈਂਪਸਾਂ ਦੀ ਇਹ ਰੌਣਕ ਘੱਟ ਹੋ ਰਹੀ ਹੈ।
ਫ਼ੈਡਰਲ ਸਰਕਾਰ ਵੱਲੋਂ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ ਲਾਗੂ ਕੀਤੀ ਕੈਪ (ਸੀਮਾ) ਦਾ ਅਸਰ ਹੁਣ ਸਿੱਧਾ ਸਿੱਖਿਆ ਸੰਸਥਾਵਾਂ ਦੀਆਂ ਕਲਾਸਾਂ ਅਤੇ ਖਾਤਿਆਂ ਵਿੱਚ ਦਿਖਾਈ ਦੇ ਰਿਹਾ ਹੈ। ਇਮੀਗ੍ਰੇਸ਼ਨ, ਰਿਫ਼ਿਊਜੀਜ਼ ਐਂਡ ਸਿਟੀਜ਼ਨਸ਼ਿਪ ਕੈਨੇਡਾ ਦੇ ਅੰਕੜਿਆਂ ਮੁਤਾਬਕ, 2026 ਦੇ ਪਹਿਲੇ ਛੇ ਮਹੀਨਿਆਂ ਵਿੱਚ ਸਿਰਫ਼ 22,405 ਨਵੇਂ ਅੰਤਰਰਾਸ਼ਟਰੀ ਵਿਦਿਆਰਥੀ ਕੈਨੇਡਾ ਪਹੁੰਚੇ ਹਨ। ਸਰਕਾਰ ਨੇ ਪੂਰੇ ਸਾਲ ਲਈ 1,55,000 ਨਵੇਂ ਵਿਦਿਆਰਥੀਆਂ ਦਾ ਟੀਚਾ ਰੱਖਿਆ ਹੈ।
ਇਹ ਸਿਰਫ਼ ਦਾਖ਼ਲਿਆਂ ਦੀ ਕਮੀ ਨਹੀਂ, ਸਗੋਂ ਕਈ ਕਾਲਜਾਂ ਲਈ ਵੱਡਾ ਵਿੱਤੀ ਝਟਕਾ ਹੈ। ਸਾਲ 2024 ਵਿੱਚ 2,92,885 ਨਵੇਂ ਅੰਤਰਰਾਸ਼ਟਰੀ ਵਿਦਿਆਰਥੀ ਕੈਨੇਡਾ ਆਏ ਸਨ। ਸਾਲ 2025 ਵਿੱਚ ਇਹ ਅੰਕੜਾ ਘੱਟ ਕੇ 1,15,005 ਰਹਿ ਗਿਆ। ਸਰਕਾਰ ਇਸ ਨੀਤੀ ਨੂੰ ਰਿਹਾਇਸ਼, ਸਿਹਤ ਸੇਵਾਵਾਂ ਅਤੇ ਬੁਨਿਆਦੀ ਢਾਂਚੇ ਉੱਤੇ ਦਬਾਅ ਘਟਾਉਣ ਲਈ ਜ਼ਰੂਰੀ ਦੱਸਦੀ ਹੈ। ਪਰ ਜਿਨ੍ਹਾਂ ਸੰਸਥਾਵਾਂ ਦੀ ਆਮਦਨ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਫ਼ੀਸ ਉੱਤੇ ਟਿਕੀ ਸੀ, ਉਨ੍ਹਾਂ ਲਈ ਇਹ ਨੀਤੀ ਸੰਕਟ ਬਣ ਗਈ ਹੈ।
ਵਿੰਨੀਪੈਗ ਦਾ ਮੈਨੀਟੋਬਾ ਇੰਸਟੀਚਿਊਟ ਆਫ਼ ਟਰੇਡਜ਼ ਐਂਡ ਟੈਕਨਾਲੋਜੀ (MITT) ਇਸ ਬਦਲਾਅ ਦੀ ਸਭ ਤੋਂ ਸਪੱਸ਼ਟ ਮਿਸਾਲ ਹੈ। ਟਰੇਡਜ਼ ਅਤੇ ਤਕਨੀਕੀ ਸਿੱਖਿਆ ਲਈ ਪੰਜਾਬੀ ਵਿਦਿਆਰਥੀਆਂ ਵਿੱਚ ਪ੍ਰਸਿੱਧ ਰਹੇ MITT ਨੇ ਆਪਣੀਆਂ ਸਰਗਰਮੀਆਂ ਹੌਲੀ-ਹੌਲੀ ਸਮੇਟਣ ਦਾ ਫ਼ੈਸਲਾ ਕੀਤਾ ਹੈ। ਸੰਸਥਾ ਦੇ ਅੰਤਰਰਾਸ਼ਟਰੀ ਦਾਖ਼ਲਿਆਂ ਵਿੱਚ 55 ਫ਼ੀਸਦੀ ਤੋਂ ਵੱਧ ਕਮੀ ਆਈ ਹੈ, ਜਿਸ ਕਾਰਨ ਇਸ ਦਾ ਮੌਜੂਦਾ ਵਿੱਤੀ ਮਾਡਲ ਟਿਕਾਊ ਨਹੀਂ ਰਿਹਾ।
MITT ਦੀ ਕਾਰਵਾਈ ਬੰਦ ਹੋਣ ਨਾਲ ਇਸ ਦੇ ਚੁਣੇ ਹੋਏ ਪ੍ਰੋਗਰਾਮਾਂ ਅਤੇ ਕੈਂਪਸ ਦੀ ਜ਼ਿੰਮੇਵਾਰੀ ਰੈੱਡ ਰਿਵਰ ਕਾਲਜ ਪੌਲੀਟੈਕਨਿਕ (RRC Polytech) ਸੰਭਾਲੇਗਾ। ਪਤਝੜ 2026 ਤੋਂ ਦੋਵੇਂ ਸੰਸਥਾਵਾਂ ਸਾਊਥ ਵਿੰਨੀਪੈਗ ਕੈਂਪਸ ਤੋਂ ਮਿਲ ਕੇ ਕੰਮ ਕਰਨਗੀਆਂ। MITT ਮੌਜੂਦਾ ਵਿਦਿਆਰਥੀਆਂ ਦੀ ਪੜ੍ਹਾਈ ਪੂਰੀ ਕਰਵਾਏਗਾ, ਜਦਕਿ RRC Polytech ਨਵੇਂ ਵਿਦਿਆਰਥੀਆਂ ਨੂੰ ਦਾਖ਼ਲਾ ਦੇਵੇਗਾ।
ਮੌਜੂਦਾ ਵਿਦਿਆਰਥੀਆਂ ਲਈ ਰਾਹਤ ਦੀ ਗੱਲ ਇਹ ਹੈ ਕਿ ਉਹ ਆਪਣੇ ਪ੍ਰੋਗਰਾਮ ਪੂਰੇ ਕਰ ਸਕਣਗੇ ਅਤੇ ਉਨ੍ਹਾਂ ਨੂੰ MITT ਦੀ ਹੀ ਡਿਗਰੀ/ਡਿਪਲੋਮਾ (ਕਰੈਡੈਂਸ਼ਲ) ਮਿਲੇਗੀ। ਹੇਨਲੋ ਬੇਅ ਅਤੇ ਫੁਲਟਜ਼ ਬੁਲੇਵਾਰਡ ਦੀਆਂ ਇਮਾਰਤਾਂ ਆਉਣ ਵਾਲੇ ਸਮੇਂ ਵਿੱਚ RRC Polytech ਦੇ ਸਾਊਥ ਵਿੰਨੀਪੈਗ ਕੈਂਪਸ ਦਾ ਹਿੱਸਾ ਬਣਨਗੀਆਂ।
ਪੰਜਾਬੀ ਭਾਈਚਾਰੇ ਲਈ ਇਹ ਤਬਦੀਲੀ ਸਿਰਫ਼ ਇੱਕ ਕਾਲਜ ਦਾ ਬਦਲਾਅ ਨਹੀਂ ਹੈ। ਬਿਜ਼ਨਸ, ਟੈਕਨਾਲੋਜੀ, ਹੈਲਥ ਕੇਅਰ ਅਤੇ ਹੁਨਰਮੰਦ ਟਰੇਡਜ਼ ਵਿੱਚ ਪੜ੍ਹਦੇ ਕਈ ਨੌਜਵਾਨਾਂ ਲਈ MITT ਪੜ੍ਹਾਈ ਤੋਂ ਨੌਕਰੀ ਅਤੇ ਨੌਕਰੀ ਤੋਂ ਸਥਿਰ ਜੀਵਨ ਤੱਕ ਪਹੁੰਚਣ ਦਾ ਰਸਤਾ ਸੀ। ਹੁਣ ਉਹ ਰਸਤਾ ਬਦਲ ਰਿਹਾ ਹੈ। ਵਿਦਿਆਰਥੀ ਕੈਪ ਨੇ ਸਿਰਫ਼ ਵੀਜ਼ੇ ਹੀ ਨਹੀਂ ਘਟਾਏ, ਸਗੋਂ ਇਸ ਨੇ ਕੈਂਪਸਾਂ ਦੀ ਰੌਣਕ, ਕੋਰਸਾਂ ਦੀ ਗਿਣਤੀ ਅਤੇ ਹਜ਼ਾਰਾਂ ਪੰਜਾਬੀ ਨੌਜਵਾਨਾਂ ਦੀ ਕੈਨੇਡਾ ਪਹੁੰਚਣ ਦੀ ਯੋਜਨਾ ਨੂੰ ਵੀ ਬਦਲ ਦਿੱਤਾ ਹੈ।
