ਜਬਰ-ਜਨਾਹ ਮਗਰੋਂ ਕਤਲ ਮਾਮਲੇ ’ਚ ਦੋਸ਼ੀ ਨੂੰ ਉਮਰ ਕੈਦ

ਇੱਥੋਂ ਦੀ ਜ਼ਿਲ੍ਹਾ ਅਦਾਲਤ ਨੇ ਕਰੀਬ 15 ਸਾਲ ਪੁਰਾਣੇ ਐੱਮ ਬੀ ਏ ਵਿਦਿਆਰਥਣ ਦੇ ਜਬਰ-ਜਨਾਹ ਅਤੇ ਕਤਲ ਮਾਮਲੇ ਵਿੱਚ ਸੀਰੀਅਲ ਕਿਲਰ ਮੋਨੂੰ ਕੁਮਾਰ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਅਦਾਲਤ ਨੇ ਦੋਸ਼ੀ ਨੂੰ ਇੱਕ ਲੱਖ ਰੁਪਏ ਦਾ ਜੁਰਮਾਨਾ ਵੀ ਲਾਇਆ ਹੈ। ਇਹ ਮਾਮਲਾ ਸਾਲ 2010 ਦਾ ਹੈ, ਜਦੋਂ ਸੈਕਟਰ-38 ਦੀ ਰਹਿਣ ਵਾਲੀ 21 ਸਾਲਾ ਵਿਦਿਆਰਥਣ ਦੀ ਲਾਸ਼ ਸੈਕਟਰ-28 ਦੀਆਂ ਝਾੜੀਆਂ ਵਿੱਚੋਂ ਮਿਲੀ ਸੀ। ਇਸ ਕੇਸ ਵਿੱਚ ਪੁਲੀਸ ਮੁਲਜ਼ਮ ਨੂੰ ਲੱਭਣ ’ਚ ਨਾਕਾਮ ਰਹੀ ਸੀ ਤੇ ਅਦਾਲਤ ਵਿੱਚ ਸੁਰਾਗ ਨਾ ਮਿਲਣ ਦੀ ਰਿਪੋਰਟ ਦਾਖਲ ਕਰਵਾ ਦਿੱਤੀ ਸੀ। ਹਾਲਾਂਕਿ ਸਾਲ 2022 ਵਿੱਚ ਚੰਡੀਗੜ੍ਹ ’ਚ ਇੱਕ ਹੋਰ ਔਰਤ ਦਾ ਕਤਲ ਹੋਇਆ, ਜਿਸ ਦੀ ਜਾਂਚ ਦੌਰਾਨ ਡੱਡੂਮਾਜਰਾ ਦੇ ਰਹਿਣ ਵਾਲੇ ਮੋਨੂੰ ਕੁਮਾਰ ਦਾ ਨਾਂ ਸਾਹਮਣੇ ਆਇਆ, ਜੋ ਸ਼ਹਿਰ ਛੱਡ ਕੇ ਬਿਹਾਰ ਚਲਾ ਗਿਆ ਸੀ। ਉਸ ਨੂੰ ਗ੍ਰਿਫ਼ਤਾਰ ਕਰਨਾ ਪੁਲੀਸ ਲਈ ਵੱਡੀ ਚੁਣੌਤੀ ਸੀ ਕਿਉਂਕਿ ਉਸ ਕੋਲ ਨਾ ਤਾਂ ਕੋਈ ਮੋਬਾਈਲ ਫੋਨ ਸੀ, ਨਾ ਬੈਂਕ ਖਾਤਾ ਅਤੇ ਨਾ ਹੀ ਆਧਾਰ ਕਾਰਡ। ਸਾਲ 2024 ਵਿੱਚ ਜਦੋਂ ਉਹ ਵਾਪਸ ਚੰਡੀਗੜ੍ਹ ਆਇਆ ਤਾਂ ਪੁਲੀਸ ਨੇ ਉਸ ਨੂੰ ਫੜ ਲਿਆ। ਪੜਤਾਲ ਦੌਰਾਨ ਮੋਨੂੰ ਨੇ ਨਾ ਸਿਰਫ਼ ਇਸ ਵਾਰਦਾਤ ਨੂੰ ਕਬੂਲਿਆ ਸਗੋਂ ਇਹ ਵੀ ਮੰਨਿਆ ਕਿ ਉਸ ਨੇ ਹਿਮਾਚਲ ਪ੍ਰਦੇਸ਼ ਦੇ ਚੰਬਾ ਖੇਤਰ ਵਿੱਚ ਵੀ ਇੱਕ ਬੱਚੀ ਨਾਲ ਜਬਰ-ਜਨਾਹ ਕਰਕੇ ਉਸ ਦਾ ਕਤਲ ਕਰ ਦਿੱਤਾ ਸੀ।