ਸਰਬਜੀਤ ਸਿੰਘ ਭੰਗੂ
ਪਟਿਆਲਾ, 12 ਅਗਸਤ
ਇੱਥੇ ਸਥਿਤ ਪਾਵਰਕੌਮ ਦੇ ਮੁੱਖ ਦਫ਼ਤਰ ਦੇ ਸਾਹਮਣੇ ਆਪਣੀਆਂ ਹੱਕੀ ਮੰਗਾਂ ਦੀ ਪੂਰਤੀ ਲਈ 27 ਜੁਲਾਈ ਤੋਂ ਧਰਨੇ ’ਤੇ ਬੈਠੇ ਅਪ੍ਰੈਂਟਸ਼ਿਪ ਵਰਕਰ ਯੂਨੀਅਨ ਦੇ ਛੇ ਨੁਮਾਇੰਦੇ ਅੱਜ ਪਾਵਰਕੌਮ ਦੇ ਨਜ਼ਦੀਕ ਹੀ ਸਥਿਤ ਪਾਣੀ ਵਾਲੀ ਇੱਕ ਟੈਂਕੀ ਦੇ ਉਪਰ ਜਾ ਚੜ੍ਹੇ। ਸ਼ਾਮ ਤੱਕ ਵੀ ਇਨ੍ਹਾਂਂ ਨੇ ਇਸ ਟੈਂਕੀ ’ਤੇ ਹੀ ਡੇਰੇ ਲਾਏ ਹੋਏ ਸਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜਿੰਨਾ ਚਿਰ ਉਨ੍ਹਾਂ ਦੀਆਂ ਮੰਗਾਂ ਦੀ ਪੂਰਤੀ ਨਹੀਂ ਹੁੰਦੀ, ਓਨੀ ਦੇਰ ਉਹ ਹੇਠਾਂ ਨਹੀਂ ਉਤਰਨਗੇ। ਇਸ ਮੌਕੇ ਅਪ੍ਰੈਂਟਸ਼ਿਪ ਵਰਕਰ ਯੂਨੀਅਨ ਦੇ ਸੂਬਾਈ ਪ੍ਰਧਾਨ ਮਲਕੀਤ ਸਿੰਘ ਅਤੇ ਹੋਰਾਂ ਵੱਲੋਂ ਮੰਗ ਕੀਤੀ ਗਈ ਕਿ ਪੰਜਾਬ ਸਰਕਾਰ ਵੱਲੋਂ ਕੁਝ ਸਮਾਂ ਪਹਿਲਾਂ 1690 ਲਾਈਨਮੈਨਾਂ ਦੀ ਭਰਤੀ ਕਰਨ ਸਬੰਧੀ ਦਿੱਤਾ ਗਿਆ ਇਸ਼ਤਿਹਾਰ ਰੱਦ ਕਰ ਕੇ ਇਸ ਨੂੰ ਉਨ੍ਹਾਂ ਦੀਆਂ ਮੰਗਾਂ ਦੇ ਮੁਤਾਬਕ ਸੋਧਣ ਮਗਰੋਂ ਹੀ ਮੁੜ ਜਾਰੀ ਕੀਤਾ ਜਾਵੇ ਜਿਸ ਦੌਰਾਨ ਉਮਰ ਹੱਦ 37 ਸਾਲ ਤੋਂ ਵਧਾ ਕੇ 45 ਸਾਲ ਕੀਤੀ ਜਾਵੇ। ਆਗੂਆਂ ਦਾ ਕਹਿਣਾ ਸੀ ਕਿ ਜਿਵੇਂ ਪਹਿਲਾਂ ਪਾਵਰਕੌਮ ਵੱਲੋਂ ਕਰਵਾਈ ਜਾਂਦੀ ਅਪ੍ਰੈਂਟਸ਼ਿਪ ਦੇ ਆਧਾਰ ’ਤੇ ਬਣਦੀ ਮੈਰਿਟ ਤਹਿਤ ਹੀ ਲਾਈਨਮੈਨ ਅਤੇ ਸਹਾਇਕ ਲਾਈਨਮੈਨ ਦੀ ਭਰਤੀ ਕੀਤੀ ਜਾਂਦੀ ਸੀ, ਹੁਣ ਵੀ ਉਸੇ ਤਰਜ਼ ’ਤੇ ਹੀ ਭਰਤੀ ਕੀਤੀ ਜਾਵੇ। ਇਨ੍ਹਾਂ ਆਗੂਆਂ ਦਾ ਤਰਕ ਸੀ ਕਿ ਹੁਣ ਸਰਕਾਰ ਨੇ ਇੱਕ ਵਾਧੂ ਟੈਸਟ ਲੈਣ ਦਾ ਥੋਪਿਆ ਗਿਆ ਫ਼ੈਸਲਾ ਵਾਪਸ ਲਿਆ ਜਾਵੇ। ਇਸ ਦੌਰਾਨ ਇਨ੍ਹਾਂ ਵਰਕਰਾਂ ਵੱਲੋਂ ਟੈਂਕੀ ’ਤੇ ਚੜ੍ਹਨ ਦੀ ਇਸ ਘਟਨਾ ਦੇ ਮੱਦੇਨਜ਼ਰ ਇੱਥੇ ਪਾਵਰਕੌਮ ਦਫ਼ਤਰ ਅਤੇ ਟੈਂਕੀ ਦੇ ਇਰਦ-ਗਿਰਦ ਪੁਲੀਸ ਫੋਰਸ ਦੀ ਤਾਇਨਾਤੀ ਕੀਤੀ ਗਈ ਹੈ ਜਦਕਿ ਟੈਂਕੀ ’ਤੇ ਡੇਰੇ ਲਾਉਣ ਵਾਲੇ ਵਰਕਰਾਂ ਦੇ ਬਾਕੀ ਸਾਥੀਆਂ ਵੱਲੋਂ ਹੇਠਾਂ ਪ੍ਰਦਰਸ਼ਨ ਕੀਤਾ ਜਾ ਰਿਹਾ ਹੈ।