workers agitation: ਵਰਕਰਾਂ ਵੱਲੋਂ ਗੈਸ ਏਜੰਸੀ ਖ਼ਿਲਾਫ਼ ਮੁਜ਼ਾਹਰਾ

ਆਗੂਆਂ ਨੇ ਕਿਹਾ ਕਿ ਪ੍ਰਦਰਸ਼ਨਕਾਰੀਆਂ ਦਾ ਸ਼ਿਕਵਾ ਹੈ ਕਿ ਏਜੰਸੀ ਵੱਲੋਂ ਵਰਕਰਾਂ ਦੀ ਤਨਖ਼ਾਹ ਰੋਕੀ ਹੋਈ ਹੈ ਤੇ ਕੁਝ ਵਰਕਰਾਂ ਨੂੰ ਨੌਕਰੀ ਤੋਂ ਫਾਰਗ ਕੀਤਾ ਜਾ ਰਿਹਾ ਹੈ। ਗੈਸ ਏਜੰਸੀ ਦੇ ਅਜਿਹੇ ਵਿਵਹਾਰ ਕਾਰਨ ਵਰਕਰਾਂ ਦਾ ਰੁਜ਼ਗਾਰ ਖ਼ਤਰੇ ’ਚ ਪੈ ਗਿਆ ਹੈ, ਜਿਸ ਕਾਰਨ ਏਜੰਸੀ ਖ਼ਿਲਾਫ਼ ਵਰਕਰਾਂ ਵਿੱਚ ਰੋਸ ਹੈ।

ਰੋਸ ਧਰਨੇ ਦੌਰਾਨ ਸਟੇਜ ਦੀ ਕਾਰਵਾਈ ਮੀਤ ਪ੍ਰਧਾਨ ਅਵਤਾਰ ਸਿੰਘ ਨੰਦਪੁਰ ਕੇਸ਼ੋ ਨੇ ਚਲਾਈ ਜਦੋਂ ਕਿ ਸਕੱਤਰ ਸੁਰਜੀਤ ਸਿੰਘ, ਜਸਵਿੰਦਰ ਸਿੰਘ ਜੱਸੀ, ਧੀਰਜ ਕੁਮਾਰ, ਰਘਵੀਰ ਸਿੰਘ, ਸਿਮੂ ਸਿੰਘ, ਜੈਪਾਲ, ਸੋਨੀ, ਕੁਲਵੰਤ ਸਿੰਘ ਨੇ ਸੰਬੋਧਨ ਦੌਰਾਨ ਮੰਗਾਂ ਦੇ ਨਿਪਟਾਰੇ ਤੱਕ ਸੰਘਰਸ਼ ਮਘਾਈ ਰੱਖਣ ਦਾ ਐਲਾਨ ਕੀਤਾ | ਦੱਸਣਯੋਗ ਹੈ ਕਿ ਇਸ ਏਜੰਸੀ ਦੀ ਵਾਗਡੋਰ ਹੁਣ ਨਵੇਂ ਮਾਲਕਾਂ ਦੇ ਹੱਥ ਹੈ |

ਦੂਜੇ ਪਾਸੇ ਸੁਰਿੰਦਰ ਗੈਸ ਏਜੰਸੀ ਦੇ ਮੈਨੇਜਰ ਰਵੀ ਕੁਮਾਰ ਨੇ ਦੱਸਿਆ ਕਿ ਅਸਲ ’ਚ ਦੋ ਤਿੰਨ ਵਰਕਰਾਂ ਨੂੰ ਅਨੁਸ਼ਾਸ਼ਨਹੀਣਤਾ ਦੇ ਦੋਸ਼ ਹੇਠ ਕੱਢਿਆ ਗਿਆ ਹੈ, ਬਾਕੀ ਸਾਰੇ ਵਰਕਰ ਰੋਜ਼ਮੱਰ੍ਹਾ ਵਾਂਗ ਕੰਪਨੀ ਦਾ ਕੰਮ ਕਰ ਰਹੇ ਹਨ| ਉਨ੍ਹਾਂ ਕਿਹਾ ਕਿ ਕੁਝ ਲੋਕ ਏਜੰਸੀ ਦੇ ਨਵੇਂ ਮਾਲਕਾਂ ਨੂੰ ਬੇਵਜ੍ਹਾ ਪ੍ਰੇਸ਼ਾਨੀ ’ਚ ਪਾ ਰਹੇ ਹਨ। ਇਸ ਸਬੰਧੀ ਮਾਮਲੇ ਸਬੰਧੀ ਪੁਲੀਸ ਥਾਣੇ ’ਚ ਸੂਚਿਤ ਕੀਤਾ ਹੋਇਆ ਹੈ।