ਸਮਾਣਾ (ਸੁਭਾਸ਼ ਚੰਦਰ): ਸਮਾਣਾ ਦੀ ਅਨਾਜ ਮੰਡੀ ਤੇ ਖਰੀਦ ਕੇਂਦਰਾਂ ’ਚ ਲੱਖਾਂ ਕੁਇੰਟਲ ਜੀਰੀ ਦੀ ਆਮਦ ਹੋ ਰਹੀ ਹੈ। ਪਰ ਪਿੰਡ ਢੈਂਠਲ ਦੇ ਖਰੀਦ ਕੇਂਦਰ ’ਚ ਫੜ੍ਹ ਨੂੰ ਪੱਕਾ ਕਰਨ ਦਾ ਕੰਮ ਚੱਲ ਰਿਹਾ ਹੈ। ਉੱਧ, ਕਿਸਾਨ ਜੀਰੀ ਦੀ ਫਸਲ ਨੂੰ ਖਰੀਦ ਕੇਂਦਰ ’ਚ ਸੁੱਟਣ ਲਈ ਥਾਂ ਨਾ ਹੋਣ ਕਾਰਨ ਪ੍ਰੇਸ਼ਾਨ ਹੋ ਰਹੇ ਹਨ। ਜਾਣਕਾਰੀ ਅਨੁਸਾਰ ਪਿੰਡ ਢੈਂਠਲ ਦੇ ਖਰੀਦ ਕੇਂਦਰ ਦਾ ਫਰਸ਼ ਕਾਫੀ ਨੀਵਾਂ ਹੋਣ ਕਾਰਨ ਪਾਣੀ ਖੜ੍ਹ ਜਾਂਦਾ ਸੀ। ਇਸ ਦਿੱਕਤ ਨੂੰ ਦੂਰ ਕਰਨ ਲਈ ਪੰਜਾਬ ਮੰਡੀ ਬੋਰਡ ਵੱਲੋਂ 23 ਲੱਖ ਰੁਪਏ ਦੀ ਲਾਗਤ ਨਾਲ ਫੜ੍ਹ ਤਿਆਰ ਕਰਨ ਲਈ ਕੰਮ ਸ਼ੁਰੂ ਕਰਵਾਇਆ ਸੀ ਜੋ ਸਤੰਬਰ ਮਹੀਨੇ ਤੱਕ ਪੂਰਾ ਕਰਨਾ ਸੀ। ਪਰ ਖਰੀਦ ਕੇਂਦਰ ’ਚ ਕਾਫੀ ਜੀਰੀ ਆਉਣ ਦੇ ਬਾਵਜੂਦ ਕੰਮ ਅੱਧ-ਵਿਚਾਲੇ ਹੀ ਲਟਕਿਆ ਪਿਆ ਹੈ। ਇਸ ਸੰਬਧੀ ਮਾਰਕੀਟ ਕਮੇਟੀ ਦੇ ਚੇਅਰਮੈਨ ਪ੍ਰਦੁਮਨ ਸਿੰਘ ਵਿਰਕ ਨੇ ਫੜ੍ਹ ਦਾ ਕੰਮ ਲੇਟ ਹੋਣ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਸੰਬਧਤ ਅਫਸਰਾਂ ਨੂੰ ਨੋਟਿਸ ਜਾਰੀ ਕਰਕੇ ਕੰਮ ਜਲਦੀ ਕਰਨ ਲਈ ਕਿਹਾ ਗਿਆ ਹੈ। ਇਸ ਸੰਬਧੀ ਜਦੋਂ ਐਸ.ਡੀ.ਓ. ਚਰਨਜੀਤ ਸਿੰਘ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਪਿੰਡ ਦੀ ਪੰਚਾਇਤ ਵੱਲੋਂ ਮਿੱਟੀ ਪਾਉਣ ਵਿਚ ਦੇਰੀ ਕੀਤੇ ਜਾਣ ਕਾਰਨ ਫੜ੍ਹਾਂ ਦਾ ਫਰਸ਼ ਲਗਾਉਣ ਦਾ ਕੰਮ ਲੇਟ ਹੋਇਆ ਹੈ। ਜਿਸ ਨੂੰ ਜਲਦੀ ਹੀ ਮੁੰਕਮਲ ਕਰ ਲਿਆ ਜਾਵੇਗਾ।