ਗੁਰਨਾਮ ਸਿੰਘ ਅਕੀਦਾ
ਪਟਿਆਲਾ, 7 ਅਗਸਤ
ਜੰਗਲਾਤ ਵਰਕਰਜ਼ ਯੂਨੀਅਨ ਪੰਜਾਬ ਵਣ ਮੰਡਲ ਪਟਿਆਲਾ ਅਧੀਨ ਕੰਮ ਕਰਦੇ ਵਰਕਰਾਂ ਵੱਲੋਂ ਪਿਛਲੇ 12 ਦਿਨਾਂ ਤੋਂ ਚੱਲ ਰਿਹਾ ਮੋਰਚਾ ਉਸ ਵੇਲੇ ਹੋਰ ਭਖਵੇਂ ਦੌਰ ’ਚ ਆ ਗਿਆ ਜਦੋਂ ਦਫ਼ਤਰ ’ਚ ਆਉਂਦੀ ਡੀਐੱਫਓ ਦੀ ਗੱਡੀ ਉਨ੍ਹਾਂ ਨੇ ਘੇਰ ਕੇ ਪਿੱਟ ਸਿਆਪਾ ਕੀਤਾ। ਇਸ ਵੇਲੇ ਆਗੂਆਂ ਨੇ 10 ਅਗਸਤ ਨੂੰ ਮੋਤੀ ਮਹਿਲ ਵੱਲ ਰੋਸ ਮਾਰਚ ਕਰਨ ਦਾ ਐਲਾਨ ਵੀ ਕੀਤਾ। ਜਾਰੀ ਬਿਆਨ ਅਨੁਸਾਰ ਜਥੇਬੰਦੀ ਦੇ ਆਗੂਆਂ ਨੇ ਡੀਐੱਫਓ ਦੇ ਅਮਲੇ ਨੂੰ ਘੇਰਾ ਪਾ ਕੇ ਆਪਣੀਆਂ ਹੱਕੀ ਮੰਗਾਂ ਲਈ ਤੁਰੰਤ ਫ਼ੈਸਲਾ ਕਰਾਉਣ ਤੇ ਦੋਸ਼ੀਆਂ ਵਿਰੁੱਧ ਕਾਰਵਾਈ ਕਰਨ ਦੀ ਮੰਗ ਕੀਤੀ। ਜ਼ਿਲ੍ਹਾ ਪ੍ਰਧਾਨ ਵੀਰਪਾਲ ਸਿੰਘ ਲੂੰਬਾ, ਜ਼ੋਨ ਦੱਖਣ ਦੇ ਪ੍ਰਧਾਨ ਬਲਵੀਰ ਸਿੰਘ ਮੰਡੋਲੀ, ਜਸਵਿੰਦਰ ਸੋਜਾ, ਮੇਜਰ ਸਿੰਘ ਸਰਹਿੰਦੀ ਨੇ ਕਿਹਾ ਕਿ ਉਹ ਕਈ ਮੀਟਿੰਗਾਂ ਅਧਿਕਾਰੀਆਂ ਨਾਲ ਕਰ ਚੁੱਕੇ ਹਨ ਕੋਈ ਸੁਣਵਾਈ ਨਹੀਂ ਹੋਈ। ਉਨ੍ਹਾਂ ਫ਼ੈਸਲਿਆਂ ’ਤੇ ਵੀ ਅਮਲ ਨਹੀਂ ਹੋਇਆ ਜੋ ਫ਼ੈਸਲੇ ਮੀਟਿੰਗਾਂ ’ਚ ਕੀਤੇ ਸਨ। ਮੰਗਾਂ ਮਨ ਕੇ ਲਾਗੂ ਨਹੀਂ ਕੀਤੀਆਂ ਜਾਂਦੀਆਂ। ਇੱਥੋਂ ਦੇ ਕਈ ਅਧਿਕਾਰੀ ਕਈ ਵਰਕਰਾਂ ਦੇ ਭਵਿੱਖ ਦਾ ਨੁਕਸਾਨ ਕਰਨ ਦੇ ਭਾਗੀਦਾਰ ਹਨ।
ਅਧਿਕਾਰੀਆਂ ਨਾਲ ਭੜਕੇ ਵਰਕਰਾਂ ਨੇ ਅਖੀਰ ਗੇਟ ਰੋਕ ਲਿਆ। ਇਸ ਦੌਰਾਨ ਪ੍ਰਸ਼ਾਸਨ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ। ਕਾਫ਼ੀ ਜੱਦੋ ਜਹਿਦ ਚੱਲਦੀ ਰਹੀ। ਵਰਕਰਾਂ ਦਾ ਰੋਸ ਪ੍ਰਦਰਸ਼ਨ ਤੇ ਪਿੱਟ ਸਿਆਪਾ ਜਾਰੀ ਰਿਹਾ। ਜੰਗਲਾਤ ਕਾਮਿਆਂ ਨੇ ਦੱਸਿਆ ਕਿ ਉਹ 5 ਮਹੀਨਿਆਂ ਤੋਂ ਤਨਖ਼ਾਹਾਂ ਤੋਂ ਵਾਂਝੇ ਹਨ। ਸਾਰਾ ਲੌਕਡਾਊਨ ਬਿਨਾਂ ਤਨਖ਼ਾਹਾਂ ਤੋਂ ਲੰਘ ਗਿਆ ਹੈ। ਜੇ ਆਰ-ਪਾਰ ਦੀ ਲੜਾਈ ਲਈ ਮਜਬੂਰ ਕੀਤਾ ਹੈ ਤਾਂ ਸੰਘਰਸ਼ ਹੋਰ ਤੇਜ਼ ਕੀਤਾ ਜਾਵੇਗਾ। ਜਥੇਬੰਦੀ ਆਗੂਆਂ ਨੇ ਕਿਹਾ ਕਿ ਇੱਥੇ ਸਰਕਾਰ ਦੇ ਪੁਤਲੇ ਫੂਕਾਂਗੇ ਤੇ 10 ਅਗਸਤ ਨੂੰ ਮੋਤੀ ਮਹਿਲ ਵੱਲ ਰੋਸ ਮਾਰਚ ਕਰਕੇ ਸਾਰੇ ਕੱਚੇ ਚਿੱਠੇ ਪੇਸ਼ ਕੀਤੇ ਜਾਣਗੇ ਤੇ ਮੰਗ ਪੱਤਰ ਦਿੱਤਾ ਜਾਵੇਗਾ।