ਸ਼ਾਹ ਦੀ ਰੈਲੀ ਲਈ ਤਿਆਰੀਆਂ

ਵਿਧਾਨ ਸਭਾ ਚੋਣਾਂ ਲਈ ਭਾਜਪਾ ਦੀ ਚੋਣ ਮੁਹਿੰਮ ਦੇ ਆਗਾਜ਼ ਵਜੋਂ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੀ ਅਗਵਾਈ ਹੇਠ 14 ਮਾਰਚ ਨੂੰ ਹੋਣ ਵਾਲੀ ਮੋਗਾ ਰੈਲੀ ਲਈ ਵਰਕਰਾਂ ਵਿੱਚ ਜੋਸ਼ ਹੈ। ਇਹ ਪ੍ਰਗਟਾਵਾ ਰੈਲੀ ਦੀ ਤਿਆਰੀ ਲਈ ਸਨੌਰ ਦੇ ਹਲਕਾ ਇੰਚਾਰਜ ਬਣਾਏ ਹਰਵਿੰਦਰ ਸਿੰਘ ਹਰਪਾਲਪੁਰ ਨੇ ਭਾਜਪਾ ਬਲਬੇੜਾ ਮੰਡਲ ਦੇ ਪ੍ਰਧਾਨ ਕੁਬੇਰ ਸ਼ਰਮਾ ਦੀ ਅਗਵਾਈ ਹੇਠ ਹੋਈ ਮੀਟਿੰਗ ਦੌਰਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਭਾਜਪਾ ਵਿਚੋਂ ਰੌਸ਼ਨੀ ਦੀ ਚਮਕ ਨਜ਼ਰ ਆਉਂਦੀ ਹੋਣ ਕਰਕੇ ਨਾ ਸਿਰਫ਼ ਸ਼ਹਿਰਾਂ, ਬਲਕਿ ਪਿੰਡਾਂ ’ਚ ਵੀ ਰੈਲੀ ਦੀ ਚਰਚਾ ਹੈ। ਉਨ੍ਹਾਂ ਕਿਹਾ ਕਿ ਡੁੱਬਦੇ ਪੰਜਾਬ ਨੂੰ ਪੈਰਾਂ ਸਿਰ ਕਰਕੇ ਪੰਜਾਬ ਦੀ ਅਸਲ ਤਸਵੀਰ ਭਾਜਪਾ ਬਦਲੇਗੀ। ਰੈਲੀ ਲਈ ਸਨੌਰ ਦੇ ਹਲਕਾ ਇੰਚਾਰਜ ਵਜੋਂ ਸੌਂਪੀ ਜ਼ਿੰਮੇਵਾਰੀ ਨੂੰ ਤਨਦੇਹੀ ਨਾਲ ਨਿਭਾਉਣ ਦਾ ਪ੍ਰਣ ਕਰਦਿਆਂ ਹਰਪਾਲਪੁਰ ਨੇ ਕਿਹਾ ਕਿ ਰੈਲੀ ਲਈ ਉਹ ਘਰ ਘਰ ਤੱਕ ਪਹੁੰਚ ਕਰਨਗੇ। ਹਲਕਾ ਇੰਚਾਰਜ ਵਜੋਂ ਅੱਜ ਕਈ ਥਾਵਾਂ ’ਤੇ ਹਰਵਿੰਦਰ ਹਰਪਾਲਪੁਰ ਨੂੰ ਭਾਜਪਾ ਵਰਕਰਾਂ ਨੇ ਸਨਮਾਨਿਤ ਵੀ ਕੀਤਾ।