ਰਵੇਲ ਸਿੰਘ ਭਿੰਡਰ
ਪਟਿਆਲਾ, 10 ਜੂਨ
ਝੋਨੇ ਦੀ ਲੁਆਈ ਦੇ ਪਹਿਲੇ ਦਿਨ ਹੀ ਬਿਜਲੀ ਕੱਟਾਂ ਕਾਰਨ ਸੂਬੇ ਦੇ ਖਪਤਕਾਰਾਂ ’ਚ ਫਿਕਰਮੰਦੀ ਵਧ ਗਈ ਹੈ। ਇਸ ਦੇ ਨਾਲ ਹੀ ਖੇਤੀ ਸਪਲਾਈ ਦੇ ਪਹਿਲੇ ਦਿਨ ਹੀ ਬਿਜਲੀ ਦੀ ਮੰਗ ਦਾ ਅੰਕੜਾ ਅੱਜ ਸਾਢੇ ਗਿਆਰਾਂ ਹਜ਼ਾਰ ਮੈਗਾਵਾਟ ਤੋਂ ਟੱਪ ਜਾਣ ਕਾਰਨ ਪਾਵਰਕੌਮ ਦੀ ਮੈਨੇਜਮੈਂਟ ਵੀ ਫਿਕਰਾਂ ’ਚ ਪੈ ਗਈ ਹੈ। ਬਿਜਲੀ ਪ੍ਰਬੰਧਾਂ ਵਜੋਂ ਅੱਜ ਜਿਥੇ ਪ੍ਰਾਈਵੇਟ ਖੇਤਰ ਦੇ ਗੋਇੰਦਵਾਲ ਸਾਹਿਬ ਥਰਮਲ ਨੂੰ ਕਾਰਜਸ਼ੀਲ ਕਰ ਦਿੱਤਾ ਗਿਆ ਹੈ, ਉਥੇ ਸਰਕਾਰੀ ਖੇਤਰ ਦੇ ਲਹਿਰਾ ਤੇ ਰੋਪੜ ਥਰਮਲਾਂ ਦੇ ਵੱਖ ਵੱਖ ਉਤਪਾਦ ਯੂਨਿਟਾਂ ਨੂੰ ਵੀ ਪੜਾਅਵਾਰ ਭਖਾਇਆ ਜਾ ਰਿਹਾ ਹੈ। ਦੱਸਣਯੋਗ ਹੈ ਕਿ ਪਾਵਰਕੌਮ ਮੈਨੇਜਮੈਂਟ ਵੱਲੋਂ ਐਤਕੀਂ ਝੋਨੇ ਦੇ ਸੀਜ਼ਨ ਦੌਰਾਨ 13 ਹਜ਼ਾਰ ਮੈਗਾਵਾਟ ਤੱਕ ਹੀ ਪੈਦਾਵਾਰ ਦੇ ਪ੍ਰਬੰਧ ਕੀਤੇ ਗਏ ਹਨ ਪਰ ਸੀਜ਼ਨ ਦੇ ਪਹਿਲੇ ਦਿਨ ਹੀ ਬਿਜਲੀ ਦੀ ਮੰਗ ਦਾ ਅੰਕੜਾ ਅੱਜ ਬੀਤੇ ਦਿਨ ਨਾਲੋਂ ਕਰੀਬ 2 ਹਜ਼ਾਰ ਮੈਗਾਵਾਟ ਵਧ ਗਿਆ ਹੈ। ਬਿਜਲੀ ਦੀ ਮੰਗ ਅੱਜ ਦਿਨ ਵਿੱਚ ਇੱਕ ਵਾਰ 11,787 ਮੈਗਾਵਾਟ ਨੂੰ ਵੀ ਛੂਹ ਗਈ ਭਾਵੇਂ ਕਿ ਹਾਲੇ ਤੱਕ ਕਿਸਾਨਾਂ ਨੇ ਪੂਰੀ ਤਰ੍ਹਾਂ ਝੋਨੇ ਦੀ ਲੁਆਈ ਦਾ ਕੰਮ ਨਹੀਂ ਆਰੰਭਿਆ। ਪਾਵਰਕੌਮ ਮੁੱਖ ਦਫ਼ਤਰ ਦੇ ਇੱਕ ਅਧਿਕਾਰੀ ਮੁਤਾਬਿਕ ਬਿਜਲੀ ਕੱਟ ਅਣਐਲਾਨੇ ਹੋ ਸਕਦੇ ਹਨ, ਜਦ ਕਿ ਸ਼ਡਿਊਲ ਵਿੱਚ ਫਿਲਹਾਲ ਕਿਸੇ ਵਰਗ ਲਈ ਕੱਟ ਨਹੀਂ ਹਨ। ਪਾਵਰਕੌਮ ਦੇ ਡਾਇਰੈਕਟਰ ‘ਵੰਡ’ ਇੰਜੀਡੀ ਆਈ.ਪੀ ਸਿੰਘ ਗਰੇਵਾਲ ਨੇ ਦੱਸਿਆ ਕਿ ਪੈਡੀ ਸੀਜ਼ਨ ਦੇ ਪਹਿਲੇ ਦਿਨ ਬਿਜਲੀ ਦੀ ਵੰਡ ਸੰਤੁਸ਼ਟੀਜਨਕ ਰਹੀ ਹੈ। ਉਨ੍ਹਾਂ ਮੰਨਿਆ ਕਿ ਹਾਲੇ ਕੁਝ ਦਿਹਾਤੀ ਇਲਾਕਿਆਂ ਵਿੱਚ ਝੱਖੜਾਂ ਮਗਰੋਂ ਬਿਜਲੀ ਬਹਾਲ ਹੋਣੀ ਬਾਕੀ ਹੈ।