Patiala: ਪੁਲੀਸ ਨੇ ਪਾਸੀ ਰੋਡ ’ਤੇ ਧਰਨਾਕਾਰੀ ਰੋਕੇ

ਮੰਗਾਂ ਦੀ ਪੂਰਤੀ ਲਈ ਇਥੇ ਸਥਿਤ ਜਲ ਸਪਲਾਈ ਤੇ ਸੈਨੀਟੇਸ਼ਨ ਵਿਭਾਗ ਦੇ ਮੁੱਖ ਦਫਤਰ ਵਿੱਚ ਸੱਤ ਦਿਨਾਂ ਤੋਂ ਪੱਕਾ ਮੋਰਚਾ ਲਾ ਕੇ ਬੈਠੇ ਕੰਟਰੈਕਟ ਵਰਕਰਾਂ ਵੱਲੋਂ ਯੂਨੀਅਨ ਦੇ ਸੂਬਾਈ ਪ੍ਰਧਾਨ ਵਰਿੰਦਰ ਮੋਮੀ ਦੀ ਅਗਵਾਈ ਹੇਠ ਅੱਜ ਇਥੇ ਪਾਸੀ ਰੋਡ ’ਤੇ ਸਥਿਤ ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਦੀ ਕੋਠੀ ਦੇ ਘਿਰਾਓ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਪਹਿਲਾਂ ਤੋਂ ਹੀ ਤਾਇਨਾਤ ਪੁਲੀਸ ਨੇ ਪ੍ਰਦਰਸ਼ਨਕਾਰੀਆਂ ਨੂੰ ਕੋਠੀ ਤੋਂ ਕੁਝ ਮੀਟਰ ਪਿੱਛੇ ਪਾਸੀ ਰੋਡ ’ਤੇ ਹੀ ਰੋਕ ਲਿਆ। ਇਸ ਉਪਰੰਤ ਧਰਨਾਕਾਰੀ ਸੜਕ ’ਤੇ ਹੀ ਧਰਨਾ ਮਾਰ ਕੇ ਬੈਠ ਗਏ। ਇਸ ਦੌਰਾਨ ਆਵਾਜਾਈ ’ਚ ਵਿਘਨ ਪਿਆ। ਧਰਨੇ ਨੂੰ ਪ੍ਰਧਾਨ ਵਰਿੰਦਰ ਮੋਮੀ ਸਣੇ ਕੁਲਦੀਪ ਬੁੱਢੇਵਾਲ, ਹਾਕਮ ਧਨੇਠਾ, ਭੁਪਿੰਦਰ ਕੁਤਬੇਵਾਲ, ਜਸਵੀਰ ਜਿੰਦਵੜੀ ਅਤੇ ਬਲਜੀਤ ਭੱਟੀ ਨੇ ਸੰਬੋਧਨ ਕੀਤਾ। ਉਨ੍ਹਾਂ ਕਿਹਾ ਕਿ ਉਹ ਮੰਗਾਂ ਦੀ ਪੂਰਤੀ ਲਈ 28 ਮਈ ਤੋਂ ਵਿਭਾਗ ਦੇ ਮੁੱਖ ਦਫਤਰ ਵਿਖੇ ਮੋਰਚਾ ਲਾ ਕੇ ਬੈਠੇ ਹਨ ਪਰ ਸਰਕਾਰ ਕੋਈ ਧਿਆਨ ਨਹੀਂ ਦੇ ਰਹੀ। ਇਸ ਕਾਰਨ ਅੱਜ ਸਿਹਤ ਮੰਤਰੀ ਦੀ ਕੋਠੀ ਅੱਗੇ ਪ੍ਰਦਰਸ਼ਨ ਕਰਨਾ ਪਿਆ ਹੈ।