patiala news: ਅਧਿਆਪਕ ਜਥੇਬੰਦੀਆ ਦੀ ਜ਼ਿਲ੍ਹਾ ਸਿੱਖਿਆ ਅਫ਼ਸਰਾਂ ਨਾਲ ਮੀਟਿੰਗ

ਮੀਟਿੰਗ ਮਗਰੋਂ ਅਧਿਆਪਕ ਆਗੂਆਂ ਡਾ. ਰਾਮਸ਼ਰਨ ਅਲੌਹਰਾਂ, ਗੁਰਜੀਤ ਸਿੰਘ ਘੱਗਾ, ਹਰਪ੍ਰੀਤ ਉੱਪਲ, ਨਿਰਭੈ ਸਿੰਘ, ਰਾਜਿੰਦਰ ਸਮਾਣਾ, ਅਤੇ ਪ੍ਰਿਤਪਾਲ ਸਿੰਘ ਨੇ ਦੱਸਿਆ ਕਿ ਵਿਭਾਗੀ ਤਰੱਕੀਆਂ ਹੋਣ ਉਪਰੰਤ ਅਧਿਆਪਕਾਂ ਵਿੱਚ ਖੁਸ਼ੀ ਘੱਟ ਅਤੇ ਰੋਸ ਜ਼ਿਆਦਾ ਹੈ ਕਿਉਂਕਿ ਬਹੁਤ ਸਾਰੀਆਂ ਖਾਲੀ ਅਸਾਮੀਆਂ ਦਾ ਡਾਟਾ ਜਾਰੀ ਨਾ ਹੋਣ ਕਰਕੇ ਤਰੱਕੀ ਪ੍ਰਾਪਤ ਕਰਨ ਵਾਲੇ ਅਧਿਆਪਕਾਂ ਨੂੰ ਦੂਰ ਦੁਰਾਡੇ ਦੇ ਸਟੇਸ਼ਨ ਮਿਲੇ ਹਨ ਅਤੇ ਮਿਲੇ ਸਟੇਸ਼ਨਾਂ ਦੀ ਵੰਡ ਵੀ ਸੀਨੀਆਰਤਾ ਨੂੰ ਧਿਆਨ ਵਿੱਚ ਰੱਖ ਕੇ ਨਹੀਂ ਕੀਤੀ ਗਈ|

ਜ਼ਿਲ੍ਹਾ ਸਿੱਖਿਆ ਅਫਸਰ (ਪ੍ਰਾਇਮਰੀ ਤੇ ਸੈਕੰਡਰੀ) ਨਾਲ ਹੋਈਆਂ ਮੀਟਿੰਗਾਂ ਵਿੱਚ ਇਹ ਸਮੱਸਿਆਵਾਂ ਵਿਚਾਰਦੇ ਹੋਏ ਮੰਗ ਕੀਤੀ ਗਈ ਕਿ ਸਾਰੀਆਂ ਖਾਲੀ ਅਸਾਮੀਆਂ ਦਾ ਡਾਟਾ ਜਾਰੀ ਕੀਤਾ ਜਾਵੇ। ਇਸ ’ਚ 30 ਸਤੰਬਰ ਤੱਕ ਹੋਈਆਂ ਰਿਟਾਇਰਮੈਂਟਾਂ ਨਾਲ ਖਾਲੀ ਹੋਈਆਂ ਅਸਾਮੀਆਂ ਵੀ ਸ਼ਾਮਲ ਕੀਤੀਆਂ ਜਾਣ, ਪ੍ਰਮੋਸ਼ਨ ਨਾ ਲੈਣ ਵਾਲੇ ਅਧਿਆਪਕਾਂ ਦੀਆਂ ਅਸਾਮੀਆਂ ਖਾਲੀ ਸ਼ੋਅ ਕੀਤੀਆਂ ਜਾਣ, ਦੋ ਵਿਸ਼ਿਆਂ ਵਿੱਚ ਪ੍ਰਮੋਟ ਅਧਿਆਪਕਾਂ ਵੱਲੋਂ ਨਾ-ਜੁਆਇਨ ਕੀਤੀਆਂ ਅਸਾਮੀਆਂ ਵੀ ਖਾਲੀ ਸ਼ੋਅ ਕੀਤੀਆਂ ਜਾਣ, ਪ੍ਰਮੋਸ਼ਨ ਲਈ ਵਰਤੀ ਗਈ ਸੀਨੀਅਰਤਾ ਸੂਚੀ ਜਾਰੀ ਕੀਤੀ ਜਾਵੇ,ਸਟੇਸ਼ਨਾਂ ਦੀ ਵੰਡ ਸੀਨੀਅਰਤਾ ਅਨੁਸਾਰ ਕਰਦੇ ਹੋਏ ਇਤਰਾਜ਼ ਦੇਣ ਵਾਲੇ ਅਧਿਆਪਕਾਂ ਨੂੰ ਸੀਨੀਅਰਤਾ ਅਨੁਸਾਰ ਸਟੇਸ਼ਨ ਚੁਣਨ ਦੀ ਤਰਜੀਹ ਦਿੱਤੀ ਜਾਵੇ।

ਅਧਿਆਪਕ ਜਥੇਬੰਦੀਆਂ ਵੱਲੋਂ ਮੰਗ ਕੀਤੀ ਗਈ ਕਿ ਉਕਤ ਮਸਲਿਆਂ ਦਾ ਤੁਰੰਤ ਨਿਬੇੜਾ ਕਰ ਕੇ ਖਾਲੀ ਅਸਾਮੀਆਂ ਅਤੇ ਸੀਨੀਅਰਤਾ ਸੂਚੀ ਜਾਰੀ ਕੀਤੀ ਜਾਵੇ ਅਤੇ ਸਮੁੱਚੀ ਪ੍ਰਕਿਰਿਆ ਪਾਰਦਰਸ਼ੀ ਢੰਗ ਨਾਲ ਨੇਪਰੇ ਚਾੜ੍ਹੀ ਜਾਵੇ।